ພິທີມອບ – ຮັບໜ້າທີ່ ລະຫວ່າງ ທ່ານ ອາລຸນໄຊ ສູນນະລາດ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ( ຜູ້ເກົ່າ ) ກັບ ທ່ານ ບົວຄົງ ນາມມະວົງ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ( ຜູ້ໃໝ່ ) ມີຂຶ້ນໃນຕອນເຊົ້າວັນທີ 10 ພຶດສະພາ 2024 ທີ່ສຳນັກງານນາຍົກລັດຖະມົນຕີ ( ສນຍ ).
ໂດຍການໃຫ້ກຽດເຂົ້າຮ່ວມເປັນສັກຂີພິຍານ ແລະ ໃຫ້ກຽດໂອ້ລົມຂອງ ສະຫາຍ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ຜູ້ຊີ້ນໍາວຽກງານ ຫສນຍ.
ໃນພິທີ, ສະຫາຍ ທອງຈັນ ໂຂງພູມຄໍາ ຮອງຫົວໜ້າຄະນະຈັດຕັ້ງສູນກາງພັກ ໄດ້ຜ່ານບັນດານິຕິກໍາທີ່ກ່ຽວຂ້ອງ ເປັນຕົ້ນ: ຄຳສັ່ງຂອງກົມການເມືອງສູນກາງພັກ ວ່າດ້ວຍການຍົກຍ້າຍ ທ່ານ ອາລຸນໄຊ ສູນນະລາດ ກຳມະການສູນກາງພັກ, ເລຂາຄະນະບໍລິຫານງານພັກ ຫ້ອງວ່າການສຳນັກງານນາຍົກລັດຖະມົນຕີ ໄປຮັບໜ້າທີ່ໃໝ່ຢູ່ແຂວງ ຈຳປາສັກ.
ຜ່ານມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງ ທ່ານ ບົວຄົງ ນາມມະວົງ ກຳມະການສູນກາງພັກ, ເປັນເລຂາຄະນະບໍລິຫານງານພັກ ຫ້ອງວ່າການສໍານັກງານນາຍົກລັດຖະມົນຕີ ແລະ ຜ່ານລັດຖະດຳລັດ ວ່າດ້ວຍການແຕ່ງຕັ້ງ ທ່ານ ບົວຄົງ ນາມມະວົງ ເປັນລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ( ຫສນຍ ).
ພ້ອມນີ້, ໄດ້ຜ່ານລັດຖະດໍາລັດ ວ່າດ້ວຍການແຕ່ງຕັ້ງ ທ່ານ ຄຳເຈນ ວົງໂພສີ ເປັນລັດຖະມົນຕີ ປະຈຳສຳນັກງານນາຍົກລັດຖະມົນຕີ.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນງານໃນການນໍາພາ – ຊີ້ນຳວຽກງານ ທີ່ໄດ້ຮັບມອບໝາຍຂອງທ່ານ ອາລຸນໄຊ ສູນນະລາດ ແລະ ທ່ານ ບົວຄົງ ນາມມະວົງ ໃນໄລຍະຜ່ານມາ ເຊິ່ງມີຜົນສຳເລັດພົ້ນເດັ່ນຫຼາຍດ້ານ ແລະ ໄດ້ຮັບຄວາມເຊື່ອໝັ້ນ, ໄວ້ເນື້ອເຊື່ອໃຈຈາກກົມການເມືອງສູນກາງພັກ, ຄະນະເລຂາທິການສູນກາງພັກ ແລະ ລັດຖະບານ ມອບໝາຍໜ້າທີ່ໃໝ່ທີ່ສຳຄັນໃຫ້ໃນຄັ້ງນີ້.
ອັນສໍາຄັນ, ທ່ານຮອງນາຍົກລັດຖະມົນຕີ ຕາງໜ້າກົມການເມືອງສູນກາງພັກ ແລະ ລັດຖະບານ ໄດ້ຊີ້ນໍາໃຫ້ສະຫາຍ ລັດຖະມົນຕີ, ຫົວໜ້າ ຫສນຍ ຜູ້ໃໝ່ ກໍຄືສະມາຊິກພັກ, ພະນັກງານ – ລັດຖະກອນ ທົ່ວ ຫສນຍ ໃຫ້ເອົາໃຈໃສ່ບາງບັນຫາສຳຄັນ ໂດຍໃຫ້ສືບຕໍ່ຮັກສາຄວາມສາມັກຄີເປັນເອກະພາບ, ປະຕິບັດແບບແຜນວິທີເຮັດວຽກ ຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ມອບໃຫ້ບຸກຄົນຮັບຜິດຊອບຢ່າງຈະແຈ້ງ; ຕັ້ງໜ້າຮໍ່າຮຽນນໍາວຽກຕົວຈິງ, ຮຽນນໍາໝູ່ຄະນະ, ຮຽນນໍາມະຫາຊົນ, ຈິງໃຈຊ່ວຍເຫຼືອ, ຖອດຖອນບົດຮຽນເຊິ່ງກັນ ແລະ ກັນ, ຕ້ານທັດສະນະແນວຄິດໃນຕົວ ຫຼື ໂຍນຄວາມຮັບຜິດຊອບໃຫ້ກັນ ແລະ ໃສ່ຮ້າຍປ້າຍສີສິ່ງທີ່ບໍ່ດີ; ເອົາໃຈໃສ່ດໍາເນີນຊີວິດການເມືອງເປັນປົກກະຕິ, ຕຳນິຕິຊົມເຊິ່ງກັນ ແລະ ກັນ ດ້ວຍຄວາມຈິງໃຈ; ມີແບບແຜນດຳລົງຊີວິດທີ່ປອດໃສຂາວສະອາດ; ຖືສໍາຄັນ ແລະ ເອົາໃຈໃສ່ການກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ; ເອົາໃຈໃສ່ກໍ່ສ້າງພັກທາງດ້ານການເມືອງ, ແນວຄິດ ແລະ ການຈັດຕັ້ງ; ຕັ້ງໜ້າປັບປຸງແບບແຜນນໍາພາຂອງອົງຄະນະພັກ, ປັບປຸງແກ້ໄຂຂໍ້ຂາດຕົກບົກພ່ອງ ແລະ ຝຶກຝົນຫຼໍ່ຫຼອມຕົນເອງໃຫ້ດີຂຶ້ນ.
ຕ້ອງປັບປຸງຢ່າງຈິງຈັງ ວຽກງານພະນັກງານ, ນັບແຕ່ການສ້າງ ແລະ ປະຕິບັດແຜນກຳນົດພະນັກງານ; ການເລືອກເຟັ້ນ ແລະ ສັບຊ້ອນພະນັກງານ; ການປະຕິບັດນະໂຍບາຍ ແລະ ສະຫວັດດີການຕໍ່ພະນັກງານ; ການເພີ່ມທະວີການຄຸ້ມຄອງ ຕິດຕາມກວດກາ ແລະ ປະຕິບັດວິໄນຕໍ່ພະນັກງານຢ່າງຖືກຕ້ອງເຂັ້ມງວດ; ຍູ້ແຮງການຈັດຕັ້ງປະຕິບັດວຽກງານແຂ່ງຂັນ – ຍ້ອງຍໍຢ່າງຖືກຕ້ອງເໝາະສົມ, ທັນການ, ຖືກທິດ ແລະ ທົ່ວເຖິງ.
ສືບຕໍ່ສຸມໃສ່ຍົກສູງບົດບາດ ແລະ ຄຸນນະພາບການກຳແໜ້ນສະພາບການ, ການຄົ້ນຄວ້າ – ສັງລວມ, ການກວດກາ – ກັ່ນກອງ, ການບັນນາທິການ ແລະ ການສະເໜີທັດສະນະ, ຄວາມຄິດເຫັນຊ່ວຍການນໍາໃຫ້ຮອບດ້ານ, ເລິກເຊິ່ງ ແລະ ແທດເຖິງຕົວຈິງ; ເອົາໃຈໃສ່ສ້າງ ແລະ ປັບປຸງໂຄງການດໍາເນີນງານ, ແຜນການເຄື່ອນໄຫວວຽກງານຂອງລັດຖະບານ, ນາຍົກ – ບັນດາຮອງນາຍົກລັດຖະມົນຕີ ແຕ່ລະໄລຍະໃຫ້ລະອຽດ ແລະ ສອດຄ່ອງກວ່າເກົ່າ; ຊ່ວຍອໍານວຍຄວບຄຸມ, ຕິດຕາມຊຸກຍູ້ການຈັດຕັ້ງປະຕິບັດມະຕິ, ຄໍາສັ່ງ, ແຈ້ງການ ແລະ ນິຕິກຳຕ່າງໆທັງຢູ່ສູນກາງ ແລະ ທ້ອງຖິ່ນ; ຍົກສູງຄວາມສາມາດເປັນເສນາທິການໃນການກະກຽມ ແລະ ດຳເນີນກອງປະຊຸມລັດຖະບານ, ກອງປະຊຸມນາຍົກ – ຮອງນາຍົກລັດຖະມົນຕີ, ກອງປະຊຸມກັບຂະແໜງການຕ່າງໆໃຫ້ມີຄຸນນະພາບ ແລະ ມີປະສິດທິຜົນ; ເອົາໃຈໃສ່ວິເຄາະ, ວິໄຈ, ກັ່ນກອງຂໍ້ມູນ – ຂ່າວສານ, ສະພາບຄວາມບໍ່ສະຫງົບ ແລະ ປາກົດການຫຍໍ້ທໍ້ຕ່າງໆ ຕະຫຼອດຮອດສະພາບພົ້ນເດັ່ນທາງດ້ານເສດຖະກິດ – ສັງຄົມ ແລະ ການເມືອງພາຍໃນ ແລະ ຕ່າງປະເທດ ແລະ ສະເໜີວິທີແກ້ໄຂ ເພື່ອເປັນຂໍ້ມູນໃນການຊີ້ນໍາ ແລະ ພິຈາລະນາຕົກລົງບັນຫາຕ່າງໆ; ປັບປຸງ ແລະ ເພີ່ມທະວີການປະສານງານກັບຂະແໜງການກ່ຽວຂ້ອງ ແລະ ອົງການປົກຄອງທ້ອງຖິ່ນ ເຮັດໃຫ້ການເຄື່ອນໄຫວກົມກຽວ, ຊ່ວຍໜູນເຊິ່ງກັນ ແລະ ກັນ; ເອົາໃຈໃສ່ເປັນພິເສດຕໍ່ການຮັກສາຄວາມລັບທາງລັດຖະການ; ຍົກສູງບົດບາດ, ໜ້າທີ່ ແລະ ຄວາມຮັບຜິດຊອບ ໃນວຽກງານໂຄສົກລັດຖະບານ, ການສະໜອງຂໍ້ມູນຂ່າວສານ, ການໂຄສະນາເຜີຍແຜ່ ຕ້ອງວ່ອງໄວ ແລະ ຮັບປະກັນຄຸນນະພາບ, ການແກ້ຂ່າວບິດເບືອນໃຫ້ທັນການ. ພ້ອມກັນນັ້ນ, ຂໍ້ມູນຈາກລັດຖະບານ ຫາ ປະຊາຊົນ ແລະ ຈາກປະຊາຊົນ ເຖິງ ລັດຖະບານ ຕ້ອງຊັດເຈນ, ແທດຕົວຈິງ ແລະ ທັນການ.
[ ຮູບ – ຂ່າວ: ກົມປະຊາສຳພັນ ຫສນຍ ]
