2 ນັກເຕະເຍົາວະຊົນລາວຈາກສະໂມສອນ W.I.G NAGA ທ້າວ ເອກະລາດ ວິໄລກຸນ ( ໄທເກີ ) ຜູ້ເປັນອ້າຍອາຍຸ 11 ປິີ ແລະ ອານຸສັກ ວິໄລກຸນ ( ບຽວເກດ ) ຜູ້ເປັນນ້ອງອາຍຸ 10 ໄດ້ເດີນທາງຈາກປະເທດແອັດສະປາຍ ມາຮອດບ້ານເກີດ ສປປ ລາວ ໃນຄໍ່າຄືນຂອງວັນທີ 13 ພຶດສະພາ 2024 ທີ່ສະໜາມບິນສາກົນ ວັດໄຕ ໂດຍໄດ້ຮັບການຕ້ອນຮັບຈາກພໍ່ແມ່ອ້າຍເອື້ອຍນ້ອງ ແລະ ແຟນບານຊາວລາວ ຫຼັງຈາກທີ່ຜ່ານການຄັດເລືອກ ແລະ ຕິດສະໂມສອນໃນປະເທດແອັດສະປາຍ.
ກ່ອນໜ້ານີ້ ທັງ 2 ນ້ອງຖືກເຊີນໄປຝຶກຊ້ອມ ແລະ ຄັດເລືອກກັບສະໂມສອນໃນປະເທດແອັດສະປາຍ ເນື່ອງຈາກຜົນງານໂດດເດັ່ນແຕ່ຍັງນ້ອຍ ໂດຍສະເພາະລາຍການ TAR ນໍາໂດຍ ເອກະລາດ ວິໄລກຸນ ນັກເຕະເຍົາວະຊົນລາວ ທີ່ຖືກດືງຕົວໄປຫຼິ້ນໃຫ້ກັບ ຟຸດບອຍສ໌ ທີມຈາກໄທ ຍິງໄປ 10 ກວ່າປະຕູພາທີມຄວ້າແຊັມຮອບຄັດເລືອກລາຍການ TAR ທີ່ປະເທດໄທ ແລະ ໄດ້ສິດໄປແຂ່ງຂັນຮອບສຸດທ້າຍທີ່ປະເທດແອັດສະປາຍ ພາທີມເຂົ້າຮອບ 16 ທີມກ່ອນຕົກຮອບໄປ ໃນປີ 2023.
ສ່ວນ ອານຸສັກ ວິໄລກຸນ ສ້າງປະຫວັດສາດຍິງໄປ 10 ກວ່າພາ W.I.G NAGA ຮຸ່ນອາຍຸບໍ່ເກີນ 10 ປີທີມບານເຕະເຍົາວະຊົນລາວ ທັງທີມສ້າງສະຫວັດສາດຄວ້າແຊັມຮອບຄັດເລືອກລາຍການ TAR ທີ່ປະເທດໄທ ກ່ອນພາທີມໄປຫຼິ້ນຮອບສຸດທ້າຍທີ່ປະເທດແອັດສະປາຍ ໃນທ້າຍເດືອນເມສາ 2024 ກ່ອນຈົບອັນດັບທີ 22 ຈາກ 50 ສະໂມສອນຊັ້ນນໍາຂອງເອີຣົບເຂົ້າຮ່ວມຊີງໄຊ.
ຈາກຜົນງານດັ່ງກ່າວ ທາງສະໂມສອນໃນເທດແອັດສະປາຍ ໄດ້ແກ່ Esportiu Europa ສະໂມສອນໃນເຄືອຂອງ ບາເຊໂລນາ ແລະ Hospitalet ໄດ້ເຊີນໄປຝຶກຊ້ອມເປັນໄລຍະເວລາ 2-3 ອາທິດ ກ່ອນທີ່ທັງສອງຈະສາມາດຜ່ານການຄັດເລືອກໃຫ້ຕິດທີມ ແຕ່ຈະຕ້ອງຕັດສິນໃຈວ່າຈະຢູ່ກັບສະໂມສອນໃດ.
ຫຼ້າສຸດຫຼັງຈາກເດີນທາງຮອດ ສປປ ລາວ ທັງ 2 ນ້ອງໃຫ້ສໍາພາດວ່າ: ພູມໃຈຫຼາຍທີ່ໄດ້ໄປຝຶກຊ້ອມ ແລະ ຜ່ານການຄັດເລືອກກັບທັງ 2 ສະໂມສອນດັ່ງກ່າວ ໄດ້ທົດສອບກັບນັກເຕະເຍົາວະຊົນໃນປະເທດແອັດສະປາຍ ເຂົາເຈົ້າມີຄວາມແຂງແກ່ນ, ຮູບຮ່າງໃຫຍ່ ແລະ ວ່ອງໄວ ແຕ່ພວກຫຼານກໍສາມາດເຮັດໄດ້ ແລະ ຈະນໍາເອົາປະສົບການດັ່ງກ່າວມາພັດທະນາຕົວເອງ, ສ່ວນການທີ່ຈະໄປຢູ່ແອັດສະປາຍ ແມ່ນພວກຫຼານຈະຕ້ອງຕັດສິນໃຈອີກຄັ້ງໜຶ່ງ.
ຂະນະທີ່ ທ່ານ ຕົ້ນຈັກກິດ ນ້ອຍສົມສີ ( ອາຈານ ເສືອ ) ຄູຝຶກຂອງ W.I.G NAGA ທີ່ຕິດຕາມໄປນໍາໄດ້ໃຫ້ສໍາພາດວ່າ: ມີຄວາມພາກພູມໃຈຫຼາຍທີ່ເປັນລູກສິດຂອງຕົວເອງ ສາມາດຜ່ານການຄັດເລືອກກັບສະໂມສອນໃນປະເທດແອັດສະປາຍ ເຊິ່ງເປັນຄັ້ງປະຫວັດສາດ ແລະ ສາມາດປັບຕົວຝຶກຊ້ອມກັບນັກເຕະເຍົາວະຊົນທີິ່ເກັ່ງໆຂອງແອັດສະປາຍໄດ້ ຈົນສາມາດຜ່ານການຄັດເລືອກກັບ 2 ສະໂມສອນກໍຄື Esportiu Europa ໃນເຄືອຂອງ ບາເຊໂລນາ ແລະ Hospitalet ລວມທັງຍັງໄດ້ຮົບຄວາມສົນໃຈຈາກສະໂມສອນ Damm FC ອີກໜຶ່ງທີມ ໂດຍທາງເຂົາເຈົ້າຢາກໃຫ້ຢູ່ຕໍ່ 1 ອາທິດ, ແຕ່ຕ້ອງກັບມາກ່ອນເນື່ອງຈາກມາຈັດການເລືອກການຮຽນຂອງ 2 ນ້ອງ ແລະ ເອກະສານອື່ນໆ, ສ່ວນການຕັດສິນໃຈວ່າຈະໄປຢູ່ກັບສະໂມສອນໃດນັ້ນແມ່ນຕ້ອງຕັດສິນໃຈອີກຄັ້ງໜຶ່ງ.
ຂ່າວ-ຮູບຈາກ: Larh Creators
