ເດືອນເມສາຜ່ານມາ ໄດ້ມີການຈັດ “ ເວທີປາໄສອະນາຄົດອາຊຽນ ” ເຊິ່ງຄະນະຜູ້ແທນລາວເຮົາກໍເຂົ້າຮ່ວມນຳໂດຍ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມຄະນະ ໃນນາມປະທານອາຊຽນ 2024; ໃນໂອກາດນີ້ທ່ານນາຍົກລັດຖະມົນຕີ ໄດ້ເປັນປະທານຮ່ວມການປຶກສາຫາລືກ່ຽວກັບ “ ກ້າວໄປສູ່ປະຊາຄົມເສດຖະກິດອາຊຽນທີ່ມີຄວາມກົມກຽວ; ເຂັ້ມແຂງ ແລະ ຍືນຍົງ: ຈັບເອົາກາລະໂອກາດຍຸກຂອງດີຈີຕອນ ” ໃນງານລ້ຽງອາຫານທ່ຽງແບບເຮັດວຽກ ເພື່ອລະດົມຄວາມຄິດກ່ຽວກັບກາລະໂອກາດ ແລະ ສິ່ງທ້າທາຍໃນການຫັນອາຊຽນໃຫ້ເປັນເຂດເສດຖະກິດດີຈີຕອນ ແລະ ກໍໄດ້ພົບປະກັບທ່ານນາຍົກລັດຖະມົນຕີ ຟາມມິງຈິງ ແຫ່ງ ສສ ຫວຽດນາມ ເພື່ອປຶກສາຫາລືການພົວພັນ ແລະ ຮ່ວມມືສອງຝ່າຍ ລາວ – ຫວຽດນາມ.
ເຮົາມາແນມເບິ່ງອະນາຄົດອາຊຽນ ຜ່ານບົດວິເຄາະຈາກ VOV WORLD ພາຍໃຕ້ຫົວຂໍ້: “ ເວທີປາໄສອະນາຄົດອາຊຽນກຳນົດທີ່ຕັ້ງພາກພື້ນໃນສະພາບການ ໃໝ່.. ”ສະບັບອອນລາຍລົງວັນທີ 28 ເມສາ 2024 ດັ່ງນີ້:
“ ເວທີປາໄສອະນາຄົດອາຊຽນ” ດໍາເນີນຢູ່ຮ່າໂນ້ຍ ໃນວັນທີ 23 ເມສາ ດ້ວຍການເຂົ້າຮ່ວມການນໍາບັນດາປະເທດສະມາຊິກອາຊຽນ, ບັນດາຄູ່ຮ່ວມມື, ຜູ້ຕາງໜ້າອົງການຈັດຕັ້ງສາກົນ, ອົງການພົນລະເຮືອນ, ສັງຄົມ, ນັກຮຽນຮູ້ແຖວໜ້າພາກພື້ນ ແລະ ໂລກ, ແມ່ຍິງ, ຊາວໜຸ່ມ… ເວທີປາໄສໄດ້ແບ່ງປັນຫຼາຍບັນຫາ, ແງ່ມູມ, ປະກອບສ່ວນກໍານົດທີ່ຕັ້ງພາກພື້ນອາຊຽນໃນສະພາບການທີ່ມີສິ່ງທ້າທາຍນາໆປະການຄືໃນປັດຈຸບັນ.
ດ້ວຍຫົວຂໍ້ “ ສ້າງປະຊາຄົມອາຊຽນ ພັດທະນາວ່ອງໄວ ແລະ ຍືນຍົງ ຖືປະຊາເປັນໃຈກາງ ”, ເວທີປາໄສອະນາຄົດອາຊຽນ ແມ່ນຊ່ອງທາງສະໜອງບັນດາແນວ ຄວາມຄິດ, ຂໍ້ລິເລີ່ມໃຫ້ວິວັດທະນາການສ້າງວິໄສທັດອາຊຽນ ຮອດປີ 2045, ປະກອບສ່ວນສຽງເວົ້າຂອງພາກພື້ນເຂົ້າໃນຄວາມມານະພະຍາຍາມກໍານົດທິດພັດທະນາອະນາຄົດຂອງໂລກ ໂດຍຜ່ານກອງປະຊຸມສຸດຍອດອະນາຄົດຂອງ ສປຊ ຄາດວ່າຈະຈັດຂຶ້ນໃນເດືອນກັນຍາ ປີ 2024.
ໃນສະພາບການບັນດາປະເທດ ອາຊຽນ ກໍພວມຢືນຢູ່ຕໍ່ໜ້າຫຼາຍການເລືອກເຟັ້ນທີ່ແຕກຕ່າງກັນໃນຍຸດທະສາດພັດທະນາກໍຄືວິໄສທັດກ່ຽວກັບອາຊຽນ, ເວທີປາໄສອະນາຄົດອາຊຽນ ໄດ້ຊອກຫາຄໍາຕອບໃຫ້ແກ່ບັນດາບັນຫາຄື: ເຮັດແນວໃດເພື່ອຮັກສາບົດບາດເປັນໃຈກາງ, ຮັບມືກັບການປ່ຽນແປງຂອງພາກພື້ນ ແລະ ໂລກ? ເຮັດແນວໃດເພື່ອຮັກສາຄວາມດຸ່ນດ່ຽງ ແລະ ກົມກຽວລະຫວ່າງ ຄວາມສົນໃຈ ແລະ ຜົນປະໂຫຍດຂອງບັນດາສະມາຊິກ, ລະຫວ່າງ ການປ່ຽນແປງໃໝ່ ແລະ ການອະນຸລັກຮັກສາບັນດາຄຸນຄ່າຫຼັກແຫຼ່ງຂອງອາຊຽນ?.
■ ສ້າງຊ່ອງທາງໂອ້ລົມສົນທະນາທີ່ສໍາຄັນ
ທ່ານ ປອ. ນາງ ຟາມລານຢຸງ ຜູ້ຮັກສາການຫົວໜ້າສະຖາບັນການຕ່າງປະເທດ, ກະຊວງການຕ່າງປະເທດຫວຽດນາມ ໂດຍແມ່ນຫົວ ໜ່ວຍເປັນເຈົ້າພາບຈັດຕັ້ງ ໃຫ້ຮູ້ວ່າ: ເວທີປາໄສອະນາຄົດອາຊຽນ ແລະ ບັນດາບັນຫາຂອງອາຊຽນ ຍາມໃດກໍດຶງດູດ ຄວາມສົນໃຈໃນພາກພື້ນ. ອາຊຽນ ນັບແຕ່ກ່ອນມາຮອດປັດຈຸບັນ ໄດ້ຈັດຫຼາຍເວທີປາໄສໃນທຸກຂັ້ນ ເພື່ອປຶກສາຫາລືກ່ຽວກັບບັນຫານີ້ ແຕ່ວ່າທີ່ເວທີປາໄສຄັ້ງນີ້, ຄະນະຈັດຕັ້ງປາດຖະໜາຢາກສ້າງເວທີປາໄສເປີດ, ຊ່ອງທາງໂອ້ລົມສົນທະນາ, ຮັບຟັງບັນດາຄໍາເຫັນຂອງທຸກເປົ້າໝາຍ, ທຸກພາກສ່ວນໃນສັງຄົມຢູ່ບັນດາປະເທດອາຊຽນ:
ອະນາຄົດອາຊຽນ ບໍ່ແມ່ນບັນຫາໃໝ່ ແຕ່ວິທີການສໍາຜັດແມ່ນໃໝ່ທີ່ສຸດ. ພິເສດ, ຊ່ອງທາງທີ່ໃກ້ຊິດກັບປະຊາຊົນຈະສ້າງສະພາບຕົວຈິງທີ່ບໍ່ພຽງແຕ່ຮຸ່ນໜຸ່ມເທົ່ານັ້ນ ຫາກນັກຮຽນຮູ້, ນັກທຸລະກິດ… ກໍລ້ວນແຕ່ເວົ້າເຖິງເລື່ອງລາວນັ້ນ. ຈາກນັ້ນ, ສຽງເວົ້າ, ທັດສະນະ ແລະ ວິທີການແບ່ງປັນຂອງເຂົາເຈົ້າ ກໍຈະໄດ້ຮັບຟັງ ແລະ ເຕື້ອງເຖິງບັນດາການ ປຶກສາຫາລືທາງການຂອງບັນດານັກການເມືອງ “.
ປັດຈຸບັນ, ອາຊຽນ ພວມກ້າວເຂົ້າສູ່ໄລຍະພັດທະນາໃໝ່, ພາຍຫຼັງປະຕິບັດສໍາເລັດວິໄສທັດປະຊາຄົມ ອາຊຽນ 2025, ອາຊຽນ ພວມຢູ່ໃນວິວັດການຫັນປ່ຽນໃນສະພາບການໂລກ ແລະ ພາກພື້ນມີການປ່ຽນແປງວ່ອງໄວ, ດ້ວຍຫຼາຍກາລະໂອກາດ ແລະ ສິ່ງທ້າທາຍໃໝ່. ເວທີປາໄສໄດ້ຈັດຂຶ້ນຕາມຮູບແບບເປີດ, ມີການເຂົ້າຮ່ວມຂອງຜູ້ຕາງໜ້າ ລັດຖະບານ ແລະ ບັນດາອົງການອື່ນໆ, ຕາມນັກຊ່ຽວຊານໄດ້ໃຫ້ຂໍ້ສັງເກດແມ່ນສ້າງຂອບເຂດເພື່ອໃຫ້ບັນດາຝ່າຍທີ່ກ່ຽວຂ້ອງຂອງພາກພື້ນ ແລະ ນອກພາກພື້ນ ພ້ອມກັນເຂົ້າຮ່ວມສະໜອງບັນດາຄໍາຄິດເຫັນ, ຂໍ້ລິເລີ່ມໃຫ້ແກ່ວິວັດທະນາການສ້າງວິໄສທັດອາຊຽນ ຮອດປີ 2045 ແລະ ປະຕິບັດວິໄສທັດໃນອະນາຄົດ.
ໂດຍຕີລາຄາກ່ຽວກັບແງ່ຫວັງເວທີປາໄສອະນາຄົດອາຊຽນ ອາດຈະກາຍເປັນການເຄື່ອນໄຫວປະຈໍາປີ, ພັດທະນາຕາມເສັ້ນທາງຂອງບັນດາເຫດການທີ່ມີຊື່ສຽງໃນພາກພື້ນ ແລະ ໂລກ ຄື: ກອງປະຊຸມເຈລະຈາ Shangri-La ( ສິງກະໂປ ), ສະພາຄວາມໝັ້ນຄົງ Munich ( ເຢຍລະມັນ), ກອງປະຊຸມອະນາຄົດອາຊີ ( ຍີ່ປຸ່ນ ), ທ່ານ ປ.ອ ນາງ ຟ້າມ ລານຢຸງ ຜູ້ຮັກສາການຫົວໜ້າສະຖາບັນການຕ່າງປະເທດ, ກະຊວງການຕ່າງປະເທດຫວຽດນາມ ຖືວ່າ:
ຂ້າພະເຈົ້າຄິດວ່າ ເພື່ອຈັດຕັ້ງ Shangri-La ຫຼື Munich ໄດ້ນັ້ນ ແມ່ນຍັງຕ້ອງຜ່ານຜ່າເສັ້ນທາງທີ່ຍາວໄກ ແລະ ຕ້ອງມີຄວາມມານະພະຍາຍາມຫຼາຍຢ່າງ. ແຕ່ວ່າຖ້າ ອາຊຽນກ້າວໄປກໍຈະຮອດ ເພາະວ່າພວກເຮົາມີຄວາມມານະພະຍາຍາມ, ເປົ້າໝາຍ ແລະ ຄວາມຕັດສິນໃຈ. ວິທີການສໍາຜັດຂອງອາຊຽນ ແມ່ນຕັດສິນໃຈຈົນສຸດ ຄວາມສາມາດຂອງຕົນ ສ່ວນໝາກຜົນບັນລຸໄດ້ຄືແນວໃດຍັງຕ້ອງໄດ້ອີງຕາມຫຼາຍປັດໄຈ. ພວກຂ້າພະເຈົ້າເຊື່ອໝັ້ນ ແລະ ມີຄວາມປະເອີບໃຈ, ເວທີປາໄສແມ່ນຂີດໝາຍພິເສດຂອງ ອາຊຽນ ແລະ ຫວຽດນາມ.
■ ສ້າງການກໍານົດທິດອະນາຄົດຂອງອາຊຽນ
ເວທີປາໄສອະນາຄົດອາຊຽນ ລວມມີບັນດາວາລະປຶກສາຫາລື: ກ້າວໄປເຖິງປະຊາຄົມອາຊຽນທີ່ມີການຂະຫຍາຍຕົວຢ່າງວ່ອງໄວ ແລະ ຍືນຍົງ, ສ້າງທີ່ຕັ້ງບົດບາດເປັນໃຈກາງຂອງອາຊຽນ ຄືນໃໝ່, ຈັບເອົາກາລະໂອກາດພັດທະນາໃນຍຸກສະໄໝດີຈີຕອນ, ຍູ້ແຮງວິທີການສໍາຜັດກັບຄວາມໝັ້ນຄົງຢ່າງຮອບດ້ານ ເພື່ອປະຊາຄົມອາຊຽນ ຖືປະຊາຊົນເປັນໃຈກາງ… ຕາມທ່ານ ປອ. ນາງ ຟ້າມລານຢຸງ ແລ້ວ, ການເຂົ້າຮ່ວມຂອງນັກຮຽນຮູ້ອາຊຽນ ເປັນຈໍານວນຫຼາຍແມ່ນຈຸດພົ້ນເດັ່ນທີ່ເປັນໜ້າສົນໃຈຂອງເວທີປາໄສ, ສາມາດຍົກອອກບັນດາຂໍ້ສະເໜີແນະຊ່ວຍອາຊຽນ ກໍານົດທິດກ້າວເດີນໃນອະນາຄົດ.
ກ່ຽວກັບການໃຫ້ຄໍາປຶກສາ ແລະ ໜູນຊ່ວຍດ້ານນະໂຍບາຍ, ບັນດານັກຮຽນຮູ້ໄດ້ສະໜອງຂໍ້ມູນ ແລະ ການຄົ້ນຄວ້າຢ່າງເລິກເຊິ່ງກ່ຽວກັບບັນດາບັນຫາສໍາຄັນ ແລະ ທ່າອ່ຽງໃນພາກພື້ນ, ຈາກນັ້ນ ກໍສະເໜີບັນດາວິທີການລະອຽດ, ຊ່ວຍກໍານົດທິດກ້າວໄປ ແລະ ນະໂຍບາຍຂອງ ອາຊຽນໃນອະນາຄົດ. ບັນດາກົນໄກຄືເວທີປາໄສຄວາມໝັ້ນຄົງໃນ ພາກພື້ນ ( ARF ), ສະຖາບັນຄົ້ນຄວ້າຍຸດທະສາດ ແລະ ສາກົນອາຊຽນ (ASEAN-ISIS), ສະພາການຮ່ວມມືດ້ານຄວາມໝັ້ນຄົງອາຊີ – ປາຊີຟິກ (CSCAP) ໄດ້ຢັ້ງຢືນຄຸນຄ່າ ແລະ ບົດບາດສໍາຄັນກ່ຽວກັບການໃຫ້ຄໍາປຶກສາດ້ານນະໂຍບາຍໃຫ້ແກ່ອາຊຽນ. ກ່ຽວກັບການແລກປ່ຽນການຮຽນຮູ້, ພົບປະແລກປ່ຽນ, ບັນດາການເຄື່ອນໄຫວໄຂຊ່ອງທາງນັກຮຽນຮູ້ ຈະສ້າງເງື່ອນໄຂເພື່ອໃຫ້ບັນດານັກຄົ້ນຄວ້າ, ນັກຊ່ຽວຊານ ແລກປ່ຽນຄວາມຮູ້, ຄໍາເຫັນ, ປະກອບສ່ວນຍົກສູງຄວາມຮັບຮູ້, ຄວາມຮູ້, ຊຸກຍູ້ການຮ່ວມມືໃນອາຊຽນ.
ເວທີປາໄສອະນາຄົດອາຊຽນ ແມ່ນຂໍ້ລິເລີ່ມຂອງ ຫວຽດນາມ, ເປັນຄັ້ງທໍາອິດທີ່ໄດ້ຈັດຂຶ້ນດ້ວຍຫຼາຍການເຄື່ອນໄຫວທີ່ແທດຈິງ ແລະ ມີຄວາມໝາຍ. ເວທີປາໄສໄດ້ປະກອບສ່ວນເຂົ້າໃນຄວາມມານະພະຍາຍາມລວມ ເພື່ອແນໃສ່ມຸ່ງໄປເຖິງການສ້າງປະຊາຄົມອາຊຽນ ຖືປະຊາຊົນເປັນໃຈກາງ, ຊຸກຍູ້ວິວັດການຂະຫຍາຍຕົວຢ່າງວ່ອງໄວ ແລະ ຍືນຍົງຂອງປະຊາຄົມ ອາຊຽນ.
ນັ້ນຄືບາງຂໍ້ມູນທີ່ຢາກໃຫ້ເພື່ອນຜູ້ອ່ານກຳໄດ້ນໍ?.
