ທ້າວ ອະພິສິດ ສີສຸນົນ ນັກຮຽນເກັ່ງ ລະດັບຊາດ ອັນດັບທີ 1 ຊັ້ນມັດທະຍົມປາຍ ວິຊາ ພາສາລາວ – ວັນນະຄະດີ ດ້ວຍຄະແນນ 7,85. ປັດຈຸບັນ, ອະພິສິດ ອາຍຸ 17 ປີ ຢູ່ບ້ານຫົງໄຊ ເມືອງປາກຊັນ ສຶກສາຢູ່ໂຮງຮຽນ ມ.ປາຍ ປາກຊັນ ແຂວງບໍລິຄຳໄຊ.
ທ້າວ ອະພິສິດ ສີສຸນົນ ໃຫ້ສໍາພາດວ່າ: ຕົນເອງມີຄວາມຮູ້ສຶກດີໃຈ ແລະ ພາກພູມໃຈຫຼາຍທີ່ສຸດ ທີ່ສາມາດຄວ້າ ແລະ ໄດ້ຮັບລາງວັນ ອັນດັບທີ 1 ລະດັບຊາດ ວິຊາພາສາລາວ-ວັນນະຄະດີ. ຄວາມຮູ້ສຶກເບື້ອງຕົ້ນໃນເວລາລໍຖ້າຟັງປະກາດຜົນການສອບເສັງນັ້ນ ນ້ອງຮູ້ສຶກຮ້ອນຮົນທັງກາຍ ແລະ ຈິດໃຈ, ກັງວົນຫຼາຍ ເພາະບໍ່ຮູ້ວ່າ ຜົນຈະອອກມາແບບໃດ ຈະຕິດອັນດັບທີເທົ່າໃດ ຕໍ່ກັບຄວາມສາມາດໃນບົດຕອບຂອງຕົນເອງ ຈົນມາຮອດວິນາທີສຸດທ້າຍ ທີ່ປະກາດຜົນວ່ານ້ອງໄດ້ຮັບໄຊຊະນະ ນ້ອງແມ່ນຕື່ນເຕັ້ນທີ່ສຸດ ເພາະມັນເປັນສິ່ງທີ່ນັກສອບເສັງທຸກຄົນ ກໍຄືຕົວນ້ອງເອງໄດ້ໃຝ່ຝັນຢາກຈະໄດ້ຮັບມາ ແລະ ມັນກໍແມ່ນເວທີ ແລະ ລາງວັນທີ່ມີກຽດທີ່ສຸດສໍາລັບນ້ອງ ກໍຄືໄດ້ນໍາເອົາຜົນສໍາເລັດ, ຊື່ສຽງ, ກຽດສັກສີ ແລະ ທັງເປັນປະຫວັດສາດ ມາໃຫ້ແກ່ຕົນເອງ, ໂຮງຮຽນ ແລະ ແຂວງ ບໍລິຄໍາໄຊ.
ວິຊາ ພາສາລາວ-ວັນນະຄະດີ ແມ່ນວິຊາໜຶ່ງທີ່ມີຄວາມສໍາຄັນຫຼາຍສໍາລັບຄົນລາວທຸກຄົນ, ພາສາລາວ ແມ່ນພາສາປະຈໍາຊາດຂອງຄົນລາວ ແລະ ແມ່ນພາສາທີ່ໃຊ້ທາງການຂອງປະເທດລາວ, ລະບົບການຮຽນ-ການສອນ ແຕ່ຊັ້ນອະນຸບານ ຈົນຮອດມະຫາວິທະຍາໄລ ໃນປະເທດລາວ ກໍໃຊ້ພາສາລາວ. ພ້ອມນີ້, ພາສາລາວຍັງເປັນການສິດສອນຄວາມຮູ້-ຄວາມສາມາດ, ການພັດທະນາກິລິຍາມາລະຍາດ, ທັດສະນະຄຸນສົມບັດອັນຈົບງາມໃນການວາງຕົວໃນສັງຄົມ ອີກດ້ວຍ ເຊິ່ງພາສາລາວ ຍັງຊ່ວຍໃຫ້ຄົນລາວມີທັກສະໃນການນໍາໃຊ້ທີ່ດີ ເຊັ່ນ: ທັກສະການອ່ານ, ທັກສະການຂຽນ, ທັກສະການຟັງ ແລະ ທັກສະການເວົ້າ ເພື່ອໃຫ້ມີປະສິດທິພາບສູງສຸດ.
ເຄັດລັບໃນການຮຽນຂອງຕົນ ກໍຄືການທໍາຄວາມຮູ້ຈັກກັບຕົນເອງເສຍກ່ອນວ່າຕົວນ້ອງແມ່ນໃຜ? ມັກຫຍັງ?, ຕ້ອງການມັນແທ້ບໍ່? ມັນສາມາດເຮັດຫຍັງໃຫ້ນ້ອງໄດ້ ແດ່? ນີ້ຄືສິ່ງທໍາອິດທີ່ພວກເຮົາທຸກຄົນກ່ອນຈະເຮັດຫຍັງ ຕ້ອງມີຄວາມໃຝ່ຝັນ ແລະ ເປົ້າໝາຍອັນຊັດເຈນ. ຖ້າຫາກວ່າເຮົາມີເປົ້າໝາຍຊັດເຈນແລ້ວ ທຸກສິ່ງທຸກຢ່າງຈະງ່າຍຂຶ້ນ ມັນຈະເຮັດໃຫ້ຄົນເຮົາມີຄວາມຕັ້ງໃຈໃນການສຶກສາຄົ້ນຄວ້າ, ມີລະບຽບວິໄນ ແລະ ບໍ່ໂລເລໄດ້ ແລະ ສາມາດປັບສະພາບແວດລ້ອມ ໃຫ້ເອື້ອອໍານວຍຕໍ່ການຮຽນເຮົາໄດ້.
ອີກເຄັດລັບໜຶ່ງກໍຄື ນ້ອງໄດ້ຮຽນຢ່າງສະໝໍ່າສະເໝີ ຄ່ອຍໆທຳຄວາມເຂົ້າໃຈ ແລະຮຽນຮູ້ເທື່ອລະບາດກ້າວ ໂດຍການຖາມບົດຮຽນນຳຮຸ່ນເອື້ອຍແລະ ຮຸ່ນອ້າຍ, ຄູ – ອາຈານທີ່ສິດສອນໃນໂຮງຮຽນ, ຮຽນນຳຢູທູບ, ຮຽນເພີ່ມອອນລາຍນຳອາຈານ ໃນໂຮງຮຽນ ຊ່ວຍແນະນຳ,ໃຫ້ການປຶກສາ ແລະ ຕິວບົດຮຽນໃຫ້ນ້ອງ ເພາະຮຸ່ນເອື້ອຍ, ຮຸ່ນອ້າຍ ແລະ ອາຈານໝົດທຸກຄົນ ກໍລ້ວນແລ້ວແຕ່ມີຄວາມຮູ້, ຄວາມສາມາດພິເສດ ທີ່ແຕກຕ່າງກັນໄປ ທີ່ເຮົາສາມາດເກັບກຳຄວາມພິເສດຂອງທຸກຄົນນັ້ນ ມາຮວມເຂົ້າຕົວເຮົາໃຫ້ມັນພິເສດທີ່ສຸດ. ທຸກໆມື້ນ້ອງກໍເຊື່ອສະເໝີວ່າ ນ້ອງເຮັດໄດ້ ແລະ ສຸດທ້າຍນ້ອງກໍສາມາດເຮັດມັນໄດ້.
ນ້ອງມີຄວາມໃຝ່ຝັນວ່າ ຢາກເປັນຕິວເຕີສອນວິຊາ ພາສາອັງກິດ, ສອນອອນລາຍພາສາລາວ ແລະ ຢາກສຶກສາຮໍ່າຮຽນວິຊາຫຼັກໃດໜຶ່ງເປັນວິຊາສະເພາະໃນອາຊີບຫຼັກ ແລະ ເປັນບຸກຄົນທີ່ສາມາດສ້າງແຮງບັນດານໃຈໃຫ້ສັງຄົມໄດ້ໃນອະນາຄົດ.
ນ້ອງກໍຢາກເປັນຄົນໜຶ່ງທີ່ປະກອບສ່ວນເຂົ້າໃນອົງກອນຊ່ວຍເຫຼືອສັງຄົມໃນວຽກງານດ້ານໃດໜຶ່ງ ອາຊີບໜຶ່ງທີ່ນ້ອງໃຝ່ຝັນ ກໍຄືອາຊີບທີ່ເຮັດວຽກຢູ່ນໍາໂຄງການ, ອົງກອນ ຫຼື ອາຊີບທີ່ໝັ້ນຄົງໃດໜຶ່ງ ໃນອົງການຈັດຕັ້ງຂອງລັດ ທີ່ສາມາດນໍາພານ້ອງໄປສູ່ຄວາມສໍາເລັດເຫຼົ່ານັ້ນຕາມແຜນທີ່ນ້ອງວາງໄວ້.
