ມາຮອດເດືອນເມສາ 2024 ທົ່ວປະເທດມີ 361 ຫົວໜ່ວຍ, 1 ພັນກວ່າຜະລິດຕະພັນສິນຄ້າ ທີ່ໄດ້ຮັບກາໝາຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ ຫຼື ໂອດ໊ອບ; ໃນນັ້ນຫົວໜ່ວຍຜະລິດສິນຄ້າປະເພດຫັດຖະກໍາ ກວມເອົາຫຼາຍກວ່າເຄິ່ງໜຶ່ງ.
ກົມສົ່ງເສີມການຄ້າ ແລະ ຫັດຖະກໍາ ກະຊວງອຸດສາຫະກໍາ ແລະ ການຄ້າ ເຜີຍໃຫ້ຮູ້ວ່າ: ປັດຈຸບັນໄດ້ມີການຈັດຕັ້ງປະຕິບັດອອກອະນຸຍາດນຳໃຊ້ກາໝາຍສິນຄ້າ ໜຶ່ງເມືອງ ໜຶ່ງຜະລິດຕະພັນແຫ່ງຊາດ ໄດ້ທັງໝົດ 361 ຫົວໜ່ວຍ ມີ 1.305 ຜະລິດຕະພັນສິນຄ້າ ກວມເອົາ 336 ບ້ານ ໃນ 117 ເມືອງ ໃນຂອບເຂດທົ່ວປະເທດ.
ໃນນັ້ນ, ຫົວໜ່ວຍຜະລິດສິນຄ້າປະເພດຫັດຖະກໍາ ກວມເອົາ 51% ( 185 ຫົວໜ່ວຍ ) ມີປະມານ 866 ຜະລິດຕະພັນ; ຫົວໜ່ວຍຜະລິດສິນຄ້າປະເພດ ອາຫານ ແລະ ເຄື່ອງດື່ມ ກວມເອົາ 42% ( 150 ຫົວໜ່ວຍ ) ມີ 350 ຜະລິດຕະພັນ; ຫົວໜ່ວຍຜະລິດສິນຄ້າປະເພດຢາພື້ນເມືອງ ກວມເອົາ 7% ( 25 ຫົວໜ່ວຍ ) ມີປະມານ 88 ຜະລິດຕະພັນ; ຫົວໜ່ວຍຜະລິດສິນຄ້າປະເພດຮູບແບບການບໍລິການ ກວມເອົາ 0,02% ( 1 ຫົວໜ່ວຍ ); ສິນຄ້າປະເພດຮູບແບບການບໍລິການ ມີ 1 ຜະລິດຕະພັນ ( ຜະລິດຕະພັນການບໍລິການດ້ານວັດທະນະທຳບັນດາເຜົ່າ ).
ໃນບັນດາ 361 ຫົວໜ່ວຍ ( ກຸ່ມ/ວິສາຫະກິດ ) ໄດ້ແບ່ງອອກເປັນ 186 ກຸ່ມ; ໃນນີ້ກຸ່ມຜະລິດສິນຄ້າຫັດຖະກຳ 125 ກຸ່ມ ແລະ ກຸ່ມຜະລິດສິນຄ້າ ອາຫານ – ເຄື່ອງດື່ມ 61 ກຸ່ມ; ແບ່ງເປັນວິສາຫະກິດ 175 ວິສາຫະກິດ ມີວິສາຫະກິດ ຜະລິດສິນຄ້າຫັດຖະກຳ 61 ວິສາຫະກິດ; ວິສາຫະກິດ ຜະລິດສິນຄ້າອາຫານ – ເຄື່ອງດື່ມ 88 ວິສາຫະກິດ; ວິສາຫະກິດຜະລິດສິນຄ້າຢາພື້ນເມືອງ 25 ວິສາຫະກິດ ແລະ ວິສາຫະກິດຮູບແບບການບໍລິການ 1 ວິສາຫະກິດ.
ໃນປີ 2022 ໄດ້ມີການອອກອະນຸຍາດໄດ້ທັງໝົດແມ່ນ 44 ຫົວໜ່ວຍ 175 ຜະລິດຕະພັນ; ໃນປີ 2023 ໄດ້ມີການອອກອະນຸຍາດໄດ້ທັງໝົດແມ່ນ 52 ຫົວໜ່ວຍ 186 ຜະລິດຕະພັນ; ສ່ວນປີ 2024 ( ຮອດເດືອນເມສາ ) ໄດ້ມີການອອກອະນຸຍາດ 9 ຫົວໜ່ວຍ 17 ຜະລິດຕະພັນ.
ການຄັດເລືອກຮັບຮອງສິນຄ້າໂອດ໊ອບ ຫຼື ສິນຄ້າໜຶ່ງເມືອງ ໜຶ່ງຜະລິດຕະພັນແຫ່ງຊາດ ໄດ້ເລີ່ມມາແຕ່ປີ 2013 ຈົນຮອດປັດຈຸບັນຄ່ອຍໆຂະຫຍາຍຕົວເປັນລໍາດັບ ໂດຍນະຄອນຫຼວງວຽງຈັນ ມີຈໍານວນທີ່ຖືກຮັບຮອງຫຼາຍກວ່າແຂວງອື່ນມີ 60 ກວ່າຫົວໜ່ວຍ 287 ຜະລິດຕະພັນ; ຕາມດ້ວຍແຂວງຈໍາປາສັກ ມີ 40 ກວ່າຫົວໜ່ວຍ 141 ຜະລິດຕະພັນ ແລະ ແຂວງວຽງຈັນ ມີ 20 ກວ່າຫົວໜ່ວຍ 123 ຜະລິດຕະພັນ.
