ມອບ – ຮັບ 4 ໂຄງການກອງທຶນຊົດເຊີຍນໍ້າກະທ້າງ ກໍລະນີສະເພາະ

23

ພິທີເຊັນສັນຍາມອບ – ຮັບ 4 ໂຄງການກອງທຶນຊົດເຊີຍນໍ້າກະທ້າງ ກໍລະນີສະເພາະໄດ້ຈັດຂຶ້ນເມື່ອບໍ່ດົນມານີ້ ທີ່ຫ້ອງວ່າການເມືອງຍົມມະລາດ ແຂວງຄໍາມ່ວນ ໂດຍການເຂົ້າຮ່ວມຂອງ ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ ປະທານກອງທຶນຊົດເຊີຍນໍ້າກະທ້າງຂັ້ນແຂວງ, ມີຜູ້ຕາງໜ້າບໍລິສັດໄຟຟ້ານໍ້າເທີນ 2 ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ໄດ້ຮັບຟັງການລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດກອງທຶນຊົດເຊີຍນໍ້າກະທ້າງໃນກໍລະນີສະເພາະ ເຊິ່ງກອງທຶນດັ່ງກ່າວໄດ້ຖືກລົງນາມໃນສັນຍາການຮ່ວມມືລະຫວ່າງລັດຖະບານລາວ ຕາງໜ້າໂດຍແຂວງ ຄໍາມ່ວນ ແລະ ບໍລິສັດໄຟຟ້ານໍ້າເທີນ 2 ຈໍາກັດ.


ສໍາລັບໂຄງການທີ່ເຊັນສັນຍາມອບຮັບໃນຄັ້ງນີ້ ມີ 4 ໂຄງການ ລວມມູນຄ່າທັງໝົດ 4,9 ຕື້ກວ່າກີບ ເຊິ່ງປະກອບມີ: ໂຄງການສົມທົບທຶນກໍ່ສ້າງຕຶກສຸກເສີນໂຮງໝໍຊຸມຊົນ ປະເພດ ກ ເມືອງຍົມມະລາດ ມູນຄ່າ 724 ລ້ານກີບ, ໂຄງການກໍ່ສ້າງຫົວງານ ແລະ ຄອງເໝືອງເບຕົງເສີມເຫຼັກ ມາດຖານ ປະຕູນໍ້າປ່ອງ 5 ມູນຄ່າ 2,4 ຕື້ກວ່າກີບ, ໂຄງການກໍ່ສ້າງຕໍ່ເຕີມໂຮງໝໍຊຸມຊົນ ປະເພດ ຂ ເມືອງມະຫາໄຊ ມູນຄ່າ 408 ລ້ານກວ່າກີບ ແລະ ໂຄງການກໍ່ສ້າງຄອງເໝືອງດິນຈີ່ ຂະຫຍາຍເນື້ອທີ່ນາແຊງເພີ່ມ ເຂດຊົນລະປະທານຝາຍນໍ້າລົ້ນທ່າໂທດ ມູນຄ່າ 1,3 ຕື້ກວ່າກີບ.

ລົງນາມເຊັນສັນຍາຕາງໜ້າຄະນະຮັບຜິດຊອບກອງທຶນຊົດເຊີຍນໍ້າກະທ້າງກໍລະນີສະເພາະໂດຍ ທ່ານ ດຸສິດ ພົມມະຈັນ ຜູ້ອໍານວຍການເຂື່ອນບໍລິສັດໄຟຟ້ານໍ້າເທີນ 2 ກັບ ຫ້ອງການ ແລະ ອົງການປົກຄອງບ້ານທີ່ກ່ຽວຂ້ອງຂອງເມືອງມະຫາໄຊ ແລະ ເມືອງຍົມມະລາດ ໂດຍຊ້ອງໜ້າບັນດາພະແນກການ ແລະ ພາກສ່ວນທີ່ກ່ຽວຂ້ອງ.