ດ່ານພາສີສາກົນນາເພົ້າ ເກັບລາຍຮັບໄດ້ເພີ່ມຂຶ້ນກວ່າ 69%

10

ປີ 2023 ດ່ານພາສີສາກົນນາເພົ້າ ຈັດເກັບລາຍຮັບໄດ້ 160 ຕື້ກວ່າກີບ ເທົ່າກັບ 99,06% ຂອງແຜນການປີ ເພີ່ມຂຶ້ນ 69,82% ຈາກປີຜ່ານມາ.


ທ່ານ ສຸພັດ ສຸແສງໄທ ຫົວໜ້າດ່ານພາສີສາກົນນາເພົ້າ ແຂວງຄຳມ່ວນ ໄດ້ໃຫ້ສໍາພາດວ່າ: ປີ 2023 ດ່ານພາສີສາກົນນາເພົ້າ ໄດ້ຮັບການມອບໝາຍເກັບລາຍຮັບເຂົ້າງົບປະມານທັງໝົດ 162,4 ຕື້ກີບ ຜ່ານການຈັດຕັ້ງປະຕິບັດ ສາມາດຈັດເກັບລາຍຮັບໄດ້ທັງໝົດ 160,8 ຕື້ກີບ ເທົ່າກັບ 99,06% ຂອງແຜນການປີ, ທຽບໃສ່ປີ 2022 ການເກັບລາຍຮັບເພີ່ມຂຶ້ນ 66,1 ຕື້ກີບ ຫຼື ເທົ່າກັບ 69,82%.

ການເກັບລາຍຮັບສ່ວນຫຼາຍແມ່ນໄດ້ຈາກຄ່າທຳນຽມຕ່າງໆ, ນໍ້າມັນເຊື້ອໄຟ, ສິນຄ້າຕາມສັນຍາອາຊຽນ, ຄ່າສັກພິເສດ ປະເພດແຮ່ທາດຕ່າງໆ ( ປະເພດໄມ້ແປຮູບ, ອຸປະກອນກໍ່ສ້າງ, ອຸປະກອນໄຟຟ້າ ແລະ ອື່ນໆ ).
ສາເຫດທີ່ພາໃຫ້ການຈັດເກັບລາຍຮັບບໍ່ບັນລຸຕາມແຜນແມ່ນມີຫຼາຍປັດໄຈ ເປັນຕົ້ນແຜນການຈັດເກັບລາຍຮັບເພີ່ມຂຶ້ນສູງ ຖ້າທຽບໃສ່ປີທີ່ຜ່ານມາ. ການນໍາເຂົ້າສິນຄ້າຈໍານວນໜຶ່ງແມ່ນນຳເຂົ້າຕາມຂອບຂອງອາຊຽນ ເຊິ່ງໄດ້ຮັບບຸລິມະສິດໃນການຍົກເວັ້ນ ແລະ ຫຼຸດຜ່ອນອັດຕາພາສີນຳເຂົ້າ, ການນຳເຂົ້າສິນຄ້າຕາມໂຄງການການລົງທຶນກໍໄດ້ຮັບການຍົກເວັ້ນອາກອນມູນຄ່າເພີ່ມຕາມກົດໝາຍອາກອນ ແລະ ກົດໝາຍສົ່ງເສີມການລົງທຶນ.

ສໍາລັບໃນປີ 2024 ດ່ານພາສີສາກົນນາເພົ້າ ແມ່ນໄດ້ຮັບຕົວເລກມອບໝາຍຈັດເກັບລາຍຮັບທັງໝົດ ຈໍານວນ 305 ຕື້ກີບ ທຽບໃສ່ປີ 2023 ເພີ່ມຂຶ້ນ 142,6 ຕື້ກີບ ຫຼື ເພີ່ມຂຶ້ນ 87,80% ເຊິ່ງເປັນຕົວເລກທີ່ເພີ່ມຂຶ້ນສູງພໍສົມຄວນ. ສະນັ້ນ ເພື່ອເຮັດໃຫ້ຕົວເລກລາຍຮັບປະຕິບັດໄດ້ຕາມແຜນການທີ່ໄດ້ວາງໄວ້ ດ່ານພາສີສາກົນນາເພົ້າ ຈຶ່ງໄດ້ກຳນົດມາດຕະການຈຳນວນໜຶ່ງ ເປັນວຽກງານຈຸດສຸມໃນຕໍ່ໜ້າ ເປັນຕົ້ນ ເອົາໃຈໃສ່ສຶກສາອົບຮົມດ້ານການເມືອງ – ແນວຄິດ ໃຫ້ອ້າຍນ້ອງພະນັກງານຢ່າງເປັນປົກກະຕິ, ຈັດວາງໜ້າວຽກແບ່ງຄວາມຮັບຜິດຊອບໃຫ້ພະນັກງານໃນໜ້າວຽກແຕ່ລະບ່ອນໃຫ້ແທດເໝາະກັບຄວາມຮູ້ – ຄວາມສາມາດຂອງແຕ່ລະຄົນ, ເພີ່ມທະວີການປະຕິບັດໜ້າທີ່ວຽກງານວິຊາສະເພາະໃຫ້ເຂັ້ມງວດຕາມກົດໝາຍພາສີ ແລະ ລະບຽບການອື່ນໆທີ່ກ່ຽວຂ້ອງ.


ໃນໂອກາດນີ້, ທ່ານກໍໄດ້ຂໍສະເໜີມາຍັງການປົກຄອງຂັ້ນເທິງ ແລະ ພາກສ່ວນທີ່ກ່ຽວຂ້ອງ ຊ່ວຍຄົ້ນຄວ້າແກ້ໄຂບັນຫາລະບົບສັນຍານອິນເຕີເນັດ ແຕ່ຈຸດບ້ານຫຼັງຄັງ ຂຶ້ນຫາຈຸດຊາຍແດນ ບາງບ່ອນຍັງບໍ່ມີສັນຍານ ແລະ ຮຽກຮ້ອງມາຍັງຄະນະດ່ານພ້ອມດ້ວຍພະນັກງານຫຼັກແຫຼ່ງພາຍໃນດ່ານພາສີສາກົນນາເພົ້າ ຈົ່ງພ້ອມກັນເອົາໃຈໃສ່ປະຕິບັດໜ້າທີ່ວຽກງານວິຊາສະເພາະທີ່ການຈັດຕັ້ງຂັ້ນເທິງໄດ້ມອບໝາຍໃຫ້ສຳເລັດຕາມເປົ້າໝາຍ, ເອົາໃຈໃສ່ເພີ່ມທະວີທາງດ້ານຂອດການບໍລິການໃຫ້ວ່ອງໄວ, ຫຼີກລ່ຽງການບໍລິການແບບຫຼາຍຂັ້ນຫຼາຍຂອດ, ຮັບປະກັນບົນພື້ນຖານໃຫ້ຖືກຕ້ອງສອດຄ່ອງຕາມລະບຽບກົດໝາຍ ຫຼີກລ່ຽງຫາງສຽງ ແລະ ປາກົດການຫຍໍ້ທໍ້ທີ່ເປັນສາເຫດກົດໜ່ວງຖ່ວງດຶງຜູ້ປະກອບການ ເພື່ອແນໃສ່ເຮັດໃຫ້ການຈັດເກັບລາຍຮັບປີນີ້ ໃຫ້ໄດ້ບັນລຸຕາມແຜນ ແລະ ລື່ນແຜນການທີ່ວາງໄວ້.