ປີ 2023 ການຄ້າ ລາວ – ອັງກິດ ມີມູນຄ່າ 46,3 ລ້ານກວ່າໂດລາ

28

ມູນຄ່າການຄ້າ ລາວ – ອັງກິດ ໃນປີ 2023 ບັນລຸ 46,3 ລ້ານ ກວ່າໂດລາ. ສ່ວນການລົງທຶນ ນັບແຕ່ປີ 2008 ຮອດປັດຈຸບັນ ອັງກິດ ຢືນຢູ່ອັນດັບທີ 12 ມີວິສາຫະກິດທັງໝົດ 38 ຫົວໜ່ວຍ ມູນຄ່າການລົງທຶນ 862 ຕື້ກວ່າກີບ.
ໃນວັນທີ 26 ກຸມພາ 2024 ທີ່ກະຊວງອຸດສາຫະກໍາ ແລະ ການຄ້າ ( ອຄ ), ທ່ານ ມະໄລທອງ ກົມມະສິດ ລັດຖະມົນຕີກະຊວງ ອຄ ພ້ອມຄະນະ ໄດ້ຕ້ອນຮັບການເຂົ້າຢ້ຽມຄໍານັບຂອງ ທ່ານ ນາງ Melanie Barlow ເອກອັກຄະຣາຊະທູດ ແຫ່ງຣາຊະອານາຈັກອັງກິດ ປະຈໍາ ສປປ ລາວ ເພື່ອປຶກສາຫາລືກ່ຽວກັບການສົ່ງເສີມດ້ານການຄ້າ ແລະ ການລົງທຶນ ລະຫວ່າງ ລາວ-ອັງກິດ.

ທ່ານ ມະໄລທອງ ກົມມະສິດ ໄດ້ກ່າວສະແດງຄວາມຕ້ອນຮັບ ແລະ ຕີລາຄາສູງເຖິງການຮ່ວມມືສອງປະເທດໃນໄລຍະຜ່ານມາ ພ້ອມທັງຍົກໃຫ້ເຫັນແບບຫຍໍ້ກ່ຽວກັບສະພາບການພັດທະນາເສດຖະກິດຂອງ ສປປ ລາວ ໃນປັດຈຸບັນ ລວມທັງສະພາບຄວາມຫຍຸ້ງຍາກ ແລະ ສິ່ງທ້າທາຍດ້ານເສດຖະກິດ, ການເງິນທີ່ ສປປ ລາວ ກໍາລັງປະເຊີນ; ທົບທວນຄືນການພົບປະສອງຝ່າຍ ໃນລະຫວ່າງເຂົ້າຮ່ວມກອງປະຊຸມ AEM ຄັ້ງທີ 55 ປີ 2023 ທີ່ອິນໂດເນເຊຍ ກັບ ທ່ານ ນິເວດ ຮູໂດຕັນ ລັດຖະມົນຕີກະຊວງທຸລະກິດ ແລະ ການຄ້າ ປະເທດອັງກິດ ທີ່ໄດ້ປຶກສາຫາລືກ່ຽວກັບຄວາມເປັນໄປໄດ້ໃນການສະໜັບສະໜູນຊ່ວຍເຫຼືອຂອງອັງກິດ ກ່ຽວກັບແຜນວຽກບຸລິມະສິດພາຍໃຕ້ເສົາຄໍ້າເສດຖະກິດອາຊຽນ ( PEDs ) ໃນການເປັນປະທານອາຊຽນຂອງ ສປປ ລາວ ປີ 2024.

ເພື່ອຮັບປະກັນການຈັດຕັ້ງປະຕິບັດ ແລະ ການເຂົ້າເຖິງສິດທິພິເສດທາງດ້ານການຄ້າ ( DCTS ) ສະເໜີໃຫ້ທາງສະຖານທູດອັງກິດ ປະຈໍາ ສປປ ລາວ ພິຈາລະນາສືບຕໍ່ໃຫ້ການຊ່ວຍເຫຼືອໃນການຈັດຝຶກອົບຮົມ ແລະ ເຜີຍແຜ່ສິດທິພິເສດດັ່ງກ່າວໃຫ້ແກ່ພາກລັດ ( ໂດຍສະເພາະແມ່ນເຈົ້າໜ້າທີ່ອອກຟອມແຫຼ່ງກໍາເນີດສິນຄ້າ ) ແລະ ພາກທຸລະກິດຂອງ ສປປ ລາວ.
ຂໍ້ມູນໃຫ້ຮູ້ວ່າການພົວພັນທາງດ້ານການຄ້າ ລະຫວ່າງ ລາວ ແລະ ອັງກິດ ໃນປີ 2023 ສາມາດບັນລຸໄດ້ 46,3 ລ້ານ ກວ່າໂດລາສະຫະລັດ. ໃນນັ້ນ, ມູນຄ່າການສົ່ງອອກໄປອັງກິດ ບັນລຸໄດ້ 27,1 ລ້ານກວ່າໂດລາສະຫະລັດ ແລະ ມູນຄ່າການນໍາເຂົ້າຈາກອັງກິດ ບັນລຸໄດ້ 19,2 ລ້ານກວ່າໂດລາສະຫະລັດ.


ສິນຄ້າຫຼັກທີ່ ສປປ ລາວ ສົ່ງອອກໄປອັງກິດ ມີ: ເກີບ, ເຄື່ອງນຸ່ງຫົ່ມ, ນ້ຳຕານ, ເຄື່ອງຊຸບຫົວ ( ໝວກ, ຜ້າຄຸມຫົວ ), ເຂົ້າໜົມ,ເຫຼົ້າ – ເບຍ – ວາຍ, ເຂົ້າ ແລະ ອື່ນໆ.
ສິນຄ້າຫຼັກທີ່ ສປປ ລາວ ນໍາເຂົ້າຈາກອັງກິດມີ ເຫຼົ້າ, ເບຍ, ວາຍ, ພາຫະນະທາງບົກ ( ນອກຈາກລົດຈັກ, ລົດໄຖ ), ຊິ້ນສ່ວນອາໄຫຼ່ລົດ ( ລວມທັງຢາງ, ແວ່ນ,ໂສ້… ); ອຸປະກອນກົນຈັກ ( ນອກຈາກເຄື່ອງກົນຈັກພາຫະນະ ) ແລະ ອື່ນໆ.
ນັບແຕ່ປີ 2008 ຮອດປັດຈຸບັນ ອັງກິດ ຖືເປັນປະເທດທີ່ມາລົງທຶນໃນ ສປປ ລາວ ມີມູນຄ່າຫຼາຍສຸດອັນດັບທີ 12 ( ສະເພາະການລົງທຶນໃນຂະແໜງກິດຈະການທົ່ວໄປ ບໍ່ກວມເອົາໃນເຂດເສດຖະກິດພິເສດ ແລະ ເຂດສໍາປະທານ ) ໂດຍມີຈໍານວນວິສາຫະກິດທັງໝົດ 38 ຫົວໜ່ວຍ ແລະ ມູນຄ່າການລົງທຶນລວມທັງໝົດ 862,38 ຕື້ກີບ.

ຂະແໜງການທີ່ນັກລົງທຶນປະເທດອັງກິດ ໄດ້ໃຫ້ຄວາມສົນໃຈເຂົ້າມາລົງທຶນໃນ ສປປ ລາວ ທີ່ມີມູນຄ່າຫຼາຍສຸດແມ່ນຂະແໜງການກະສິກຳ, ປ່າໄມ້ ແລະ ການປະມົງ ມີມູນຄ່າ 435,5 ຕື້ກີບ ກວມເອົາ 50,5% ຂອງມູນຄ່າລົງທຶນທັງໝົດ; ຮອງລົງມາແມ່ນຂະແໜງອຸດສາຫະກໍາປຸງແຕ່ງ ມູນຄ່າ 147,2 ຕື້ກີບ ກວມເອົາ 17,1%; ຂະແໜງອຸດສາຫະກໍາບໍ່ແຮ່ ແລະ ການຂຸດຄົ້ນ ມູນຄ່າ 105,8 ຕື້ກີບ ກວມເອົາ 12,3%; ແລະ ຂະແໜງການຄ້າຂາຍຍົກ ແລະ ຂາຍຍ່ອຍ, ສ້ອມແປງລົດຍົນ ແລະ ລົດຈັກ ມູນຄ່າ 84,6 ຕື້ກີບ ກວມເອົາ 9,8%.