ສຳເລັດການກໍ່ສ້າງທາງຫຼວງແຫ່ງຊາດເລກ 11 ແຕ່ຂົວນໍ້າສັງ ຫາ ບ້ານຄົກເຂົ້າດໍ

45

 

ກະຊວງໂຍທາທິການ ແລະ ຂົນສົ່ງ ໄດ້ຈັດພິທີເປີດນໍາໃຊ້ໂຄງການກໍ່ສ້າງທາງຫຼວງແຫ່ງຊາດເລກ 11 ແຕ່ຂົວນໍ້າສັງ ເມືອງສັງທອງ ນະຄອນຫຼວງ ວຽງຈັນ ຫາ ບ້ານຄົກເຂົ້າດໍ ເມືອງຊະນະຄາມ ແຂວງວຽງຈັນ ໃນວັນທີ 20 ກຸມພາ 2024.
ເຂົ້າຮ່ວມຂອງ ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ, ທ່ານ ນາງ ມໍລະກົດ ສີສະຫວັດ ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈໍາລາວ, ທ່ານຮອງເຈົ້າຄອງນະຄອນຫຼວງວຽງຈັນ, ທ່ານຮອງລັດຖະມົນຕີ ກະຊວງ ຍທຂ ທ່ານຮອງເຈົ້າແຂວງວຽງຈັນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂຄງການກໍ່ສ້າງທາງເລກ 11 ມີຄວາມລວງຍາວ 104,98 ກິໂລແມັດ ແລະ ກໍ່ສ້າງທາງຮ່ອມ ແຕ່ບ້ານໂນນສະຫວັນ ຫາ ເທສະບານເມືອງຊະນະຄາມ ລວງຍາວ 16,55 ກິໂລແມັດ ເປັນໂຄງການບຸລິມະສິດຂອງລັດຖະບານ, ນອນຢູ່ໃນແຜນຍຸດທະສາດຂອງກະຊວງໂຍທາທິການ ແລະ ຂົນສົ່ງ ກໍຄືແຜນພັດທະນາເສດຖະກິດ – ສັງຄົມ ຂອງລັດຖະບານ.


ຍ້ອນເຫັນໄດ້ຄວາມສຳຄັນຂອງເສັ້ນທາງດັ່ງກ່າວ, ລັດຖະບານ ແຫ່ງ ສປປ ລາວ ຈຶ່ງໄດ້ສະເໜີຂໍທຶນສະໜັບສະໜູນຈາກລັດຖະບານແຫ່ງຣາຊະອານາຈັກໄທ ເພື່ອມາກໍ່ສ້າງເສັ້ນທາງດັ່ງກ່າວ. ຈາກນັ້ນ, ລັດຖະບານແຫ່ງຣາຊະອານາຈັກໄທ ຈຶ່ງມອບໃຫ້ອົງການຮ່ວມມືພັດທະນາເສດຖະກິດ ກັບປະເທດເພື່ອນບ້ານ ( ອົງການ NEDA ) ເປັນຜູ້ຮັບຜິດຊອບ ແລະ ໄດ້ເຊັນສັນຍາເງິນກູ້ຢືມ ໃນວັນທີ 26 ກັນຍາ 2018 ລວມມູນຄ່າທັງໝົດ 1.826 ລ້ານກວ່າບາດ ເພື່ອນໍາໃຊ້ເຂົ້າໃນການຈັດຕັ້ງປະຕິບັດໂຄງການດັ່ງກ່າວ ຄື: ວຽກກໍ່ສ້າງ, ຈ້າງທີ່ປຶກສາ, ບໍລິຫານຄຸ້ມຄອງໂຄງການ; ສ່ວນມູນຄ່າຍົກຍ້າຍສິ່ງກີດຂວາງອອກຈາກແລວທາງນັ້ນ ແມ່ນນໍາໃຊ້ງົບປະມານຂອງລັດຖະບານ ສປປ ລາວ.

ມາດຖານເຕັກນິກຂອງການອອກແບບເປັນປະເພດທາງຊັ້ນ 3 ຕາມມາດຕະຖານເຕັກນິກຂອງກະຊວງໂຍທາທິການ ແລະ ຂົນສົ່ງ, ຄວາມກວ້າງໜ້າທາງ 10 ແມັດ ປູດ້ວຍຢາງຂົ້ວ ຄວາມໜາ 5 ຊັງຕີແມັດ, ມີ 2 ຊ່ອງຈະລາຈອນກວ້າງ 3,50 ແມັດ ແລະ ບ່າທາງກວ້າງເບື້ອງລະ 1,50 ແມັດ, ສາມາດຮັບນໍ້າໜັກໄດ້ 11 ໂຕນຕໍ່ເພົາ ແລະ ກໍ່ສ້າງທາງຮ່ອມແຕ່ບ້ານໂນນສະຫວັນ ຫາ ເທສະບານ ເມືອງຊະນະຄາມ ຄວາມຍາວ 16,55 ກິໂລແມັດ ການອອກແບບເປັນປະເພດທາງຊັ້ນ 4 ຄວາມກວ້າງໜ້າທາງ 9 ແມັດ, ປູຢາງ 2 ຊັ້ນ ມີ 2 ຊ່ອງຈະລາຈອນ ກວ້າງ 3,50 ແມັດ, ບ່າທາງກວ້າງເບື້ອງລະ 1 ແມັດ, ສາມາດຮັບນໍ້າໜັກໄດ້ 9,1 ໂຕນຕໍ່ເພົາ.


ໂຄງການກໍ່ສ້າງທາງເລກ 11 ໄດ້ເຊັນສັນຍາຮັບເໝົາ ຄັ້ງວັນທີ 28 ມິຖຸນາ 2019 ແລະ ເລີ່ມລົງມືກໍ່ສ້າງວັນທີ 1 ຕຸລາ 2019 ເຊິ່ງມີໄລຍະເວລາປະຕິບັດວຽກ 36 ເດືອນ, ຜ່ານການຈັດຕັ້ງປະຕິບັດບັນດາໜ້າວຽກກໍ່ສ້າງຂອງໂຄງການໃນໄລຍະຜ່ານມາ ເຫັນວ່າ ແມ່ນໄດ້ພົບຂໍ້ຫຍຸ້ງຍາກຫຼາຍດ້ານ ເປັນຕົ້ນການແຜ່ລະບາດຂອງພະຍາດໂຄວິດ – 19, ສະພາບເສດຖະກິດມີການຜັນແປ ເຮັດໃຫ້ເກີດໄພເງິນເຟີ້, ລາຄາ ວັດສະດຸ, ນໍ້າມັນເຊື້ອໄຟ ມີການເໜັງຕີງເພີ່ມຂຶ້ນສູງ ເຊິ່ງສົ່ງຜົນກະທົບຕໍ່ການຈັດຕັ້ງປະຕິບັດໂຄງການ, ນອກຈາກນັ້ນ ບໍລິມາດວຽກກໍ່ສ້າງທີ່ຈັດຕັ້ງປະຕິບັດຕົວຈິງ ກໍເພີ່ມຂຶ້ນຢ່າງຫຼວງຫຼາຍ ເມື່ອທຽບກັບບໍລິມາດທີ່ປະເມີນໃນເບື້ອງຕົ້ນ ໂດຍສະເພາະແມ່ນວຽກຕັດຫີນແຂງ ແລະ ຕັດຫີນອ່ອນ ຈຶ່ງໄດ້ມີການດັດປັບເຕັກນິກການກໍ່ສ້າງຊັ້ນໜ້າທາງບາງໄລຍະຄືນໃໝ່ ເປັນຕົ້ນຄວາມກວ້າງໜ້າທາງປູຢາງຂົ້ວ AC ຈາກ 10 ແມັດ ມາເປັນ 7,50 ແມັດ, ສ່ວນບ່າທາງເບື້ອງລະ 1,50 ແມັດ.