ປິດກອງປະຊຸມຄວາມໝັ້ນຄົງ ມິວນິກ 2024

45

ວິທະຍຸກະຈາຍສຽງຫວຽດນາມລາຍງານວ່າ: ພາຍຫຼັງ ດຳເນີນເປັນເວລາ 3 ວັນ ດ້ວຍເຫດການນ້ອຍ, ໃຫຍ່ ກວ່າ 200 ເຫດການ ແລະ ມີການເຂົ້າຮ່ວມຂອງຜູ້ແທນ ກວ່າ 900 ທ່ານ; ໃນນັ້ນ ມີປະມຸກລັດ ແລະ ຜູ້ນຳລັດຖະບານຂອງ 50 ປະເທດ, ລັດຖະມົນຕີກວ່າ 100 ທ່ານ ກໍຄືຜູ້ຕາງໜ້າຂອງບັນດາອົງການໃຫ້ຄຳປຶກສາ, ອົງການບໍ່ສັງກັດກັບລັດຖະບານ ແລະ ວິສາຫະກິດ, ກອງປະຊຸມຄວາມໝັ້ນຄົງ ມິວນິກ ( MSC ) 2024 ກໍໄດ້ປິດລົງໃນວັນທີ 18 ກຸມພາ.

“ ພ້ອມກັນປະລາໄຊ ” ( Lose-Lose ) ແມ່ນຫົວຂໍ້ຂອງ MSC 2024 ແລະ ກໍແມ່ນຫົວຂໍ້ຂອງບົດລາຍງານຄວາມໝັ້ນຄົງ ປະຈໍາປີ 2024 ຂອງ MSC, ໃນນັ້ນ ມີຜູ້ຂຽນຫຼາຍທ່ານໄດ້ສະແດງຄວາມວິຕົກກັງວົນຍ້ອນຄວາມເຄັ່ງຕຶງດ້ານພູມສາດການເມືອງ ແລະ ຄວາມຂາດສະຖຽນລະພາບທາງດ້ານເສດຖະກິດທີ່ນັບມື້ນັບເພີ່ມຂຶ້ນ, ມີລັດຖະບານຫຼາຍປະເທດກໍບໍ່ສຸມໃສ່ຜົນປະໂຫຍດຂອງການຮ່ວມມືທົ່ວໂລກອີກ.

ຕາມທັດສະນະຂອງກຸ່ມນັກຂຽນແລ້ວ, ຫຼາຍປະເທດມີ ຄວາມວິຕົກກັງວົນຈະໄດ້ຮັບຜົນປະໂຫຍດນັບມື້ໜ້ອຍລົງຈາກການຮ່ວມມືສາກົນ ເມື່ອທຽບໃສ່ບັນດາປະເທດອື່ນ. ທ່າອ່ຽງດັ່ງກ່າວ ສາມາດສົ່ງຜົນກະທົບຕໍ່ການຮ່ວມມື ແລະ ເຮັດໃຫ້ຄວາມເປັນລະບຽບຮຽບຮ້ອຍສາກົນໃນປັດຈຸບັນຊຸດໂຊມລົງ.

ໃນເວລາກ່າວຄຳປາໄສໃນພິທີປິດກອງປະຊຸມ, ທ່ານ   ຄຣິສໂຕຟ ເຮອຸສເກນ ປະທານກອງປະຊຸມຄວາມໝັ້ນຄົງມິວນິກ ກ່າວວ່າ: ໃນໂລກປັດຈຸບັນ, ໃຜກໍບໍ່ສາມາດແກ້ໄຂບັນຫາຄວາມໝັ້ນຄົງດ້ວຍຕົວເອງໄດ້. ປະຊາຄົມໂລກຕ້ອງປະຖິ້ມແນວຄິດແບບເກົ່າ ແລະ ເຂົ້າມາເກາະແຂນກັນເພື່ອດຳເນີນການຮ່ວມມືກັນດ້ວຍທ່າທີເປີດກວ້າງຂຶ້ນຕື່ມອີກ.