ນໍ້າເທີນ 2 ຊ່ວຍພັດທະນາພື້ນຖານໂຄງລ່າງ ເມືອງຍົມມະລາດ

20

ພິທີເຊັນບົດບັນທຶກມອບ – ຮັບ 3 ໂຄງການທີ່ໄດ້ຮັບການຊ່ວຍເຫຼືອຈາກ ບໍລິສັດໄຟຟ້ານໍ້າເທີນ 2 ໃຫ້ອົງການປົກຄອງເມືອງຍົມມະລາດ ປະກອບມີການກໍ່ສ້າງຊົນລະປະທານປ່ອງ 4 ແລະ ອ່າງພັກນໍ້າ, ການສ້ອມແປງເສັ້ນທາງຫຼວງແຫ່ງຊາດ 1E ແລະ ອຸປະກອນການແພດ ມີຂຶ້ນໃນວັນທີ 14 ກຸມພາ ທີ່ຫ້ອງວ່າການເມືອງຍົມມະລາດ ແຂວງຄໍາມ່ວນ.


ຮ່ວມລົງນາມລະຫວ່າງ ທ່ານ ບຸນທັນ ສຸວັນນະລາດ ເຈົ້າເມືອງຍົມມະລາດ ກັບ ທ່ານ ມາກ ອ່ອງຕວນ ຣູບ ຜູ້ອໍານວຍການໃຫຍ່ ບໍລິສັດໄຟຟ້ານໍ້າເທີນ 2 ໂດຍມີຫົວໜ້າ – ຮອງຫົວໜ້າພະແນກການທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມເປັນສັກຂີພິຍານ.
ທ່ານຜູ້ອໍານວຍການ ບໍລິສັດໄຟຟ້ານໍ້າເທີນ 2 ກ່າວວ່າ: ຂ້າພະເຈົ້າ ມີຄວາມພາກພູມໃຈຫຼາຍທີ່ບໍລິສັດ ໄດ້ເປັນສ່ວນໜຶ່ງໃນການຊ່ວຍເຫຼືອພັດທະນາພື້ນຖານໂຄງລ່າງ ພ້ອມທັງສ້າງເງື່ອນໄຂສໍາລັບສົ່ງເສີມຄວາມຍືນຍົງ ແລະ ການພັດທະນາເສດຖະກິດ – ສັງຄົມໃຫ້ແກ່ຊຸມຊົນອ້ອມຂ້າງໂຄງການ. ການມອບ 3 ໂຄງການຄັ້ງນີ້ ລວມມີມູນຄ່າທັງໝົດ 109.768 ໂດລາ; ປະກອບມີ ໂຄງການກໍ່ສ້າງຊົນລະປະທານປ່ອງ 4 ທີ່ມີຄວາມຍາວ 200 ແມັດ ແລະ ອ່າງພັກນໍ້າ ເພື່ອນໍາໃຊ້ນໍ້າສໍາລັບການປູກຝັງໃນລະດູແລ້ງຂອງປະຊາຊົນຢູ່ບ້ານຍົມມະລາດໃຕ້ ແລະ ບ້ານຖໍ້າພວງ; ຄາດຄະເນຕອບສະໜອງພື້ນທີ່ທໍາການຜະລິດນາແຊງເບື້ອງຕົ້ນແມ່ນ 84,76 ເຮັກຕາ. ການສ້ອມແປງທາງຫຼວງແຫ່ງຊາດ 1E ເຂດບ້ານ ສ້າງແກ້ວ ລະຫວ່າງ ເຂື່ອນດັດສົມນໍ້າ ຫາ ເຮືອນຈັກ ມີຄວາມຍາວ 150 ແມັດ ແລະ ອຸປະກອນການແພດໃຫ້ກັບທີມສຸກເສີນຂອງໂຮງໝໍເມືອງຍົມມະລາດ.

ທ່ານ ບຸນທັນ ເຈົ້າເມືອງຍົມມະລາດ ໄດ້ສະແດງຄວາມຂອບໃຈມາຍັງທ່ານຜູ້ອໍານວຍການ ໃຫຍ່ ບໍລິສັດໄຟຟ້ານ້ຳເທີນ 2 ພ້ອມຄະນະ ທີ່ໃຫ້ການຊຸກຍູ້ຊ່ວຍເຫຼືອເປັນຜົນງານອັນລ້ຳຄ່າ ຕິດພັນກັບຍຸດທະສາດການພັດທະນາຂອງເມືອງ, ເວົ້າສະເພາະແມ່ນພັດທະນາ ເພື່ອຍົກລະດັບຊີວິດການເປັນຢູ່ຂອງພໍ່ແມ່ປະຊາຊົນໃນເຂດລຸ່ມເຂື່ອນເຮືອນຈັກ ບໍລິສັດ ໄຟຟ້ານໍ້າເທີນ 2, ສ້າງເງື່ອນໄຂສໍາລັບສົ່ງເສີມ ຄວາມຍືນຍົງ ແລະ ການພັດທະນາເສດຖະກິດ – ສັງຄົມ ໃຫ້ແກ່ຊຸມຊົນອ້ອມຂ້າງໂຄງການກໍຄືບ້ານ ແລະ ເມືອງ, ຕິດພັນກັບວຽກງານກະສິກຳ, ຄົມມະນາຄົມ ແລະ ສາທາລະນະສຸກ.