ເມືອງ ພູວົງ ເປີດປີທ່ອງທ່ຽວລາວຕິດພັນກັບງານປະເພນີ “ບຣະວຽງ” ຂອງຊົນເຜົ່າເບົຣາ

51

ວັນທີ 13 ກຸມພາ 2024 ທີ່ບ້ານ ວັງຍາງ ເມືອງ ພູວົງ ແຂວງ ອັດຕະປື, ໄດ້ຈັດ ງານບຸນປະເພນີ “ບຣະວຽງ” ຂອງຊົນເຜົ່າເບົຣາ ຂຶ້ນຢ່າງເປັນທາງການ ໂດຍການເປັນປະທານຂອງທ່ານ ສຸລິຈັນ ໂຊກຄຳຈັນ ເຈົ້າເມືອງໆ ພູວົງ, ໂດຍມີ ທ່ານ ນາງ ບຸນນານ ບຸນນະເເສງ ຫົວໜ້າຄະນະຈັດຕັ້ງ ເເຂວງ, ມີຄະນະນຳຂັ້ນເເຂວງ, ຄະນະນຳ 4 ຕົວເມືອງ ຫົວໜ້າ ຫ້ອງການ ຖວທ 4 ຕົວເມືອງ,ພ້ອມດ້ວຍພະນັກງານກໍ່ສ້າງຮາກຖານການເມືອງ ອຳນາດການປົກຄອງບ້ານ ວັງຍາງ ແລະປະຊາຊົນບ້ານຕ່າງໆເຂົ້າຮ່ວມ.

ທ່ານ ສຸລິຈັນ ໂຊກຄຳຈັນ ເຈົ້າເມືອງໆ ພູວົງ ກ່າວເປີດພິທີ ໂດຍໄດ້ເລົ່າປະຫວັດຄວາມເປັນມາຂອງບຸນ “ບຣະວຽງ” ບາງຕອນວ່າ: ພິທີເປີດປີທ່ອງທ່ຽວ ປີ 2024 ຢູ່ເມືອງ ພູວົງ ເເມ່ນຈັດຂຶ້ນ ພ້ອມກັບການຈັດງານບຸນ ບຣະວຽງ ເຊິ່ງເປັນປະເພນີໜຶ່ງທີ່ເຄີຍຈັດມາທຸກປີ ເຊິ່ງປີນີ້ປະກອບດ້ວຍກິດຈະກຳປະຕິບັດຮີດຄອງເຂົ້າບ້ານ ເເລະ ບັນດາກິດຈຳກຳກິລາພື້ນບ້ານ, ກິລາຊ່ວງເເພ, 3 ສີພາຍ, ກິລາດຶງເຊືອກ, ກິລາຍູ້ສ້າວ, ການສະເເດງຍ່າງໄມ້ໂຢກເຢກ ເເລະ ອາຫານພື້ນບ້ານ, ງານບຸນຄັ້ງ ນີ້ມີຄວາມໝາຍສໍາຄັນຢ່າງເລິກເຊິ່ງທາງດ້ານວັດທະນະທໍາ ແລະ ຮີດຄອງປະເພນີອັນດີງາມຂອງຊົນ ເຜົ່າເບຣົາ, ເຊິ່ງອຳນາດການປົກຄອງບ້ານພ້ອມດ້ວຍພໍ່ແມ່ປະຊາຊົນ, ໄດ້ພ້ອມໃຈກັນ ຫ້າງຫາກະກຽມງານບຸນ ບຣະວຽງ ໃນຄັ້ງນີ້, ເພື່ອສ່ອງແສງ ໃຫ້ເຫັນເຖິງການດຳລົງຊີວິດ, ການນຳໃຊ້ອຸປະກອນ ໃນສະໄໝກ່ອນທີ່ປູຍ່າຕານາຍໄດ້ ພ້ອມກັນຄົ້ນຄິດຂຶ້ນມາ ເພື່ອທໍາມາຫາກິນລ້ຽງຊີບ ຕະຫຼອດຮອດການສືບສານຮີດຄອງປະເພນີ ທັງເປັນການລະນຶກເຖິງຄຸນຄ່າ ແລະ ຄວາມສຳຄັນຂອງບຸນ “ບຣະວຽງ” ຂອງຊົນເຜົ່າເບົຣາທີ່ ບ້ານ ວັງຍາງໃຫ້ເຍົາວະຊົນ-ອະນຸຊົນຮຸ່ນຫຼັງໄດ້ຮຽນຮູ້ ແລະ ພ້ອມກັນສືບສານຮີດຄອງປະເພນີນີ້ໄວ້ຈາກລຸ້ນສູ່ລຸ້ນສືບຕໍ່ກັນໄປ.
(ພາບ-ຂ່າວ: ສິງໂຕ)