ສຸດມ່ວນ ເມືອງວຽງພູຄາ ຈັດປະເພນີບຸນກິນຈຽງເຜົ່າຢັ້ງ ຕິດພັນກັບການສົ່ງເສີມປີທ່ອງທ່ຽວລາວ

56

ເມືອງວຽງພູຄາ ແຂວງຫລວງນ້ຳທາ ຈັດປະເພນີບຸນກິນຈຽງເຜົ່າຢັ້ງ ຄົບຮອບ 152 ປີ ຕິດພັນກັບການສົ່ງເສີມປີທ່ອງທ່ຽວລາວ 2024 ໃນວັນທີ 12 ກຸມພາ 2024 ຜ່ານມາ ທີ່ບ້ານນໍ້າຟ້າ ໂດຍການເຂົ້າຮ່ວມຂອງທ່ານ ບຸນຊົງ ວາໄຊຢີ ເຈົ້າເມືອງໆວຽງພູຄາ ພ້ອມດ້ວຍພະແນກການກ່ຽວຂ້ອງຂອງແຂວງ, ແຂກພາຍໃນ ແລະ ຕ່າງປະເທດ ຕະຫລອດຮອດພໍ່ແມ່ປະຊາຊົນບ້ານອ້ອມຂ້າງເຂົ້າຮ່ວມ.

ທ່ານ ສິງຄໍາ ແກ້ວບຸນເຕັມ ຮອງນາຍບ້ານໆນໍ້າຟ້າ ໃຫ້ຮູ້ວ່າ: ບ້ານນໍ້າຟ້າ ເປັນຊົນເຜົ່າຢັ້ງ ມີ 253 ຫລັງຄາເຮືອນ, 282 ຄອບຄົວ, ພົນລະເມືອງ 1.218 ຄົນ, ຍິງ 585 ຄົນ, ມີຮີດຄອງປະເພນີ ອັນດີງາມ, ການນຸ່ງຖື, ການປາກເວົ້າທີ່ເປັນເອກະລັກຂອງເຜົ່າ, ປະຊາຊົນສ່ວຍຫລາຍຍຶດຖືອາຊີບເຮັດນາ ແລະ ຄ້າຂາຍ, ອາຊີບສໍາຮອງ ແມ່ນປູກຝັງ-ລ້ຽງສັດ ແລະ ອື່ນໆ. ຜ່ານມາ ອົງການປົກຄອງບ້ານ ໄດ້ນໍາເອົາ ແນວທາງນະໂຍບາຍຂອງພັກ-ລັດ, ນິຕິກໍາ, ລະບຽບກົດໝາຍຕ່າງໆມາເຜີຍແຜ່ໃຫ້ປະຊາຊົນພາຍໃນບ້ານໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ, ທົ່ວບ້ານມີເນື້ອທີ່ທໍາການຜະລິດທັງໝົດ 1.717,2 ເຮັກຕາ ເປັນຕົ້ນ ເນື້ອທີ່ສວນຢາງພາລາ, ໝາກແໜ່ງ, ເຂົ້າໂພດ, ໝາກເດືອຍ, ຢ່າສູບ, ໄມ້ໃຫ້ໝາກ ແລະ ອື່ນໆ. ສ່ວນເນື້ອທີ່ນາ ມີ 260,30 ເຮັກຕາ ສະມັດຕະພາບ 4,5 ໂຕນຕໍ່ເຮັກຕາ ແລະ ສາມາດສ້າງລາຍຮັບເຂົ້າບ້ານຈາກການຂາຍຜົນຜະລິດ, ສັດລ້ຽງ, ເຄື່ອງປາຂອງດົງອື່ນໆ 5,5 ຕື້ກວ່າກີບ ສະເລຍໃສ່ຫົວຄົນໄດ້ຮັບ 4,5 ລ້ານກວ່າກີບ, ສ້າງລາຍຮັບເຂົ້າຄັງບ້ານ ໄດ້ 17 ລ້ານກວ່າກີບ ແລະ ວຽກງານອື່ນໄດ້ຮັບການຂະຕົວຢ່າງກວ້າງຂວາງ.

ໃນໂອກາດດັ່ງກ່າວ, ທ່ານ ບຸນຊົງ ວາໄຊຢີ ໄດ້ກ່າວວ່າ: ການຈັດປີທ່ອງທ່ຽວລາວ 2024 ທີ່ເມືອງວຽງພູຄາ ຕິດພັນກັບບຸນປະເພນີ ກິນຈຽງເຜົ່າຢັ້ງນີ້ ເປັນກິດຈະກໍາໜຶ່ງທີ່ສໍາຄັນ ເພື່ອສົ່ງເສີມການທ່ອງທ່ຽວ, ການປົກປັກຮັກສາທໍາມະຊາດອັນສວຍສົດງົດງາມ, ອະນຸລັກ, ສົ່ງເສີມ ວັດທະນະທໍາທີ່ເປັນເອກະລັກ ແລະ ຮີດຄອງປະເພນີອັນດີງາມຂອງປະຊາຊົນບັນດາເຜົ່າ ຢູ່ບັນດາບ້ານທົ່ວເມືອງວຽງພູຄາ ແລະ ຍັງເປັນການສ້າງຜະລິດຕະພັນທ່ອງທ່ຽວໃຫ້ມີຄວາມຫລາກຫລາຍ, ຍົກລະດັບຄຸນນະພາບການບໍລິການ, ໂຄສະນາເຜີຍແຜ່ຂໍ້ມູນຂ່າວສານເຂົ້າເຖິງກຸ່ມຕະຫລາດເປົ້າໝາຍ, ເຊື່ອມໂຍງກັບບັນດາເມືອງ, ແຂວງ ແລະ ປະເທດໃກ້ຄຽງ ພ້ອມນີ້ກໍເພື່ອເປັນການສົ່ງເສີມກິດຈະກໍາ ບຸນປະເພນີ, ບັນດາເຜົ່າຕ່າງໆ ຢູ່ຂັ້ນເມືອງ, ບ້ານ ແລະ ການມີສ່ວນຮ່ວມຂອງທຸກພາກສ່ວນ ທັງເປັນການສົ່ງເສີມ ການທ່ອງທ່ຽວພາຍໃນ ແລະ ດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວເມືອງວຽງພູຄາ ນັບມື້ນັບຫລາຍຂຶ້ນແນໃສ່ສ້າງວຽກເຮັດງານທໍາໃຫ້ສັງຄົມ ແລະ ສ້າງລາຍຮັບ ໂດຍສະເພາະ ເງິນຕາເຂົ້າສູ່ປະເທດ ກໍຄືເມືອງວຽງພູຄາ ໂດຍສຸມໃສ່ພັດທະນາການທ່ອງທ່ຽວທາງທໍາມະຊາດ, ວັດທະນະທໍາ ແລະ ປະຫວັດສາດ ພາຍໃຕ້ຄໍາຂວັນທີ່ວ່າ “ທ່ອງທ່ຽວລາວປອດໄພ, ຊື່ນໃຈໃນວັດທະນະ ທໍາ, ທໍາມະຊາດ ແລະ ປະຫວັດສາດ. ປັດຈຸບັນ, ເມືອງວຽງພູຄາ ມີແຫລ່ງທ່ອງທຽວທີ່ໄດ້ຮັບການສໍາຫລວດຂຶ້ນບັນຊີແລ້ວ ຈໍານວນ 26 ແຫ່ງ ໃນນີ້, ມີແຫລ່ງທ່ອງທ່ຽວທາງດ້ານທໍາມະຊາດ 19 ແຫ່ງ, ແຫລ່ງທ່ອງທ່ຽວວັດທະນະທໍາ 4 ແຫ່ງ ແລະ ແຫລ່ງທ່ອງທ່ຽວປະຫວັດສາດ 3 ແຫ່ງ. ສໍາລັບແຫລ່ງທ່ອງທ່ຽວທີ່ພົ້ນເດັ່ນຂອງເມືອງແມ່ນ ແຫລ່ງທ່ອງທ່ຽວຖໍ້າເກົາເລົາ, ຖໍ້າພູຜາສາດນໍ້າມາຍ, ນໍ້າຕົກ ຕາດພູສອງພັນ, ສະຖານທີ່ທ່ອງທ່ຽວສວນພູເພັດ-ພູຄໍາ ແລະ ລາຍການທ່ອງທ່ຽວຍ່າງປ່າຊົມທໍາມະຊາດ ແລະ ສໍາພັດວິທີການດໍາລົງຊີວິດ-ວັດທະນະທໍາບັນດາເຜົ່າ.
ຂ່າວ: ຄໍາປິງ