ຮູ້ຈັກ ບຸນພະທາດມາຫລ້າ ເມືອງທຸລະຄົມ ກຽມຕິດພັນກັບປີທ່ອງທ່ຽວ ແລະ ຈະຈັດຂຶ້ນທ້າຍເດືອນກຸມພາ

40

ບຸນນະມັດສະການພະທາດມາຫລ້າ ບ້ານນາຄອງ ເມືອງທຸລະຄົມ ແຂວງວຽງຈັນ ເປັນອີກບຸນໜຶ່ງທີ່ໄດ້ປະຕູບັດກັນມາຕາມຮອຍບັນພະບູຫຼຸດຫຼາຍເຊັນຄົນ ເຊິ່ງຈຸດພິເສດບຸນນີ້ແມ່ນການເຕົ້າໂຮມຄະນະພັກ, ຫົວໜ້າຫ້ອງການ, ພະນັກງານສາຂາອາຊີບຕ່າງໆ, ພະສົງ-ສາມະເນນ, ເຈົ້າພາບເຈົ້າສັດທາ, ພາກທຸລະກິດ, ເອກະຊົນ, ອົງການຈັດຕັ້ງບ້ານ ແລະ ປະຊາຊົນບັນດາເຜົ່າ ຢູ່ເດີ່ນສໍານັກງານປົກຄອງເມືອງທີ່ບ້ານເກິນກາງ ແລະ ຕອນບ່າຍເລີ່ມເຄື່ອນຂະບວນຜາສາດເຜິ້ງ, ແຫ່ງຮູບຈໍາລອງຊ້າງ, ມ້າ, ຕົ້ນກັນ, ວັດຖຸທານ ໄປສົມທົບກັບບ້ານເຈົ້າພາບ, ບ້ານໃກ້ຄຽງ ຢູ່ທາງສີ່ແຍກບ້ານນາຄອງ, ພາຍຫລັງເຕົ້າໂຮມກັນ ແລະ ເຖິງເວລາແລ້ວ ກໍເຄື່ອນຂະບວນແຫ່ໄປສູ່ວັດອ້ອມພະທາດມາຫລ້າ 3 ຮອບ, ວາງ-ຈັດແຈງເຄື່ອງຂອງວັດຖຸທານ, ດອກໄມ້, ທູບທຽນອ້ອມໄວ້ອົງພະທາດ

ບຸນນະມັດສະການພະທາດມາຫລ້າ ບ້ານນາຄອງ ເມືອງທຸລະຄົມ ແຂວງວຽງຈັນ ຕິດພັນກັບພິທີເປີດປີທ່ອງທ່ຽວ ຈະໄດ້ຈັດຂຶ້ນລະຫວ່າງວັນທີ 22- 24 ກຸມພາ 2024 ເພື່ອອະນຸລັກຮັກສາວັດທະນະທໍາຮີດຄອງປະເພນີອັນດີງາມຂອງຊາດ ກໍຄື ຂອງເມືອງ ທີ່ເຄີຍໄດ້ຈັດຕັ້ງປະຕິບັດຕາມຮອຍບັນພະບູລຸດຫລາຍເຊັ່ນຄົນຜ່ານມາ ເຊິ່ງປີນີ້, ແມ່ນຈະຈັດຂຶ້ນໃນຮູບແບບເປີດກວ້າງ, ຍິ່ງໃຫຍ່ ເນື່ອງຈາກເປັນປີທ່ອງທ່ຽວລາວ ຕາມນະໂຍບາຍຂອງລັດຖະບານວາງອອກ ເພື່ອໂຄສະນາ, ກະຕຸ້ນ, ສົ່ງເສີມ, ດຶງດູດການທ່ອງທ່ຽວ ໃຫ້ມາທ່ອງທ່ຽວເມືອງທຸລະຄົມຫລາຍຂຶ້ນ, ກະຈາຍລາຍໄດ້ສູ່ຊຸມຊົນ ແລະ ກະຕຸ້ນເສດຖະ ກິດ.

ທ່ານ ກິຄໍາ ວົງໄຊ ຮອງເຈົ້າເມືອງທຸລະຄົມ, ຮອງປະທານຈັດງານ ໂດຍຕາງໜ້າໃຫ້ອົງການປົກຄອງເມືອງ ໄດ້ມີຄໍາເຫັນຊີ້ນໍາວ່າ: ໄລຍະການກະກຽມ, ນອກຈາກແຕ່ງຕັ້ງຄະນະກໍາມະການຈັດງານ, ແບ່ງວຽກແບ່ງງານກັນແລ້ວ ຍັງໄດ້ແຈ້ງຂ່າວໄປຍັງປະຊາຊົນບັນດາເຜົ່າຊັ້ນຄົນຕ່າງໆໃນສັງຄົມ, ເຈົ້າພາບເຈົ້າສັດທາ, ບັນດາບ້ານ, ເມືອງອ້ອມຂ້າງໃຫ້ຮັບຮູ້ ແລະ ເຂົ້າມາຮ່ວມງານຢ່າງກວ້າງຂວາງ ເພື່ອຮັກສາໄດ້ວັດທະນະທໍາຮີດຄອງປະເພນີ, ເຕົ້າໂຮມຄວາມສາມັກຄີ, ມີທຶນຮອນສໍາລັບບູລະນະອົງພະທາດ ແລະ ສ້າງສາວັດວາອາຮາມໃຫ້ມີຄວາມຮຸ່ງເຮືອງຄູ່ບ້ານຄູ່ເມືອງຕະຫລອດໄປ. ທາດມາຫລ້າ ເປັນສູນລວມທາງດ້ານຈິດໃຈ, ເອກອ້າງທະນົງໃຈຂອງຊາວເມືອງ, ເປັນພະທາດເກົ່າແກ່ທີ່ຫລາຍຄົນເຊື່ອວ່າມີຄວາມສັກສິດ.

ສໍາລັບລາຍລະອຽດໃນມື້ຈຫດງານ, ວັນທີ 22 ເປັນມື້ຕັ້ງບຸນ ປະກອບມີຕະຫລາດນັດວາງຂາຍສິນຄ້າປະເພດຕ່າງໆ, ມີການຫ້າງຫາກະກຽມເຄື່ອງຂອງວັດຖຸທານ, ຕັ້ງກອງບຸນ, ຟັງທໍາມະເທດສະໜາ ແລະ ກະກຽມຄວາມພ້ອມອື່ນໆ, ວັນທີ 23 ເວລາ 13:00 ໂມງເຕົ້າໂຮມຄະນະພັກ, ຫົວໜ້າຫ້ອງການ, ພະນັກງານສາຂາອາຊີບຕ່າງໆ, ພະສົງ-ສາມະເນນ, ເຈົ້າພາບເຈົ້າສັດທາ, ພາກທຸລະກິດ, ເອກະຊົນ, ອົງການຈັດຕັ້ງບ້ານ ແລະ ປະຊາຊົນບັນດາເຜົ່າ ຢູ່ເດີ່ນສໍານັກງານປົກຄອງເມືອງທີ່ບ້ານເກິນກາງ, ເວລາ 14:00 ໂມງເລີ່ມເຄື່ອນຂະບວນຜາສາດເຜິ້ງ, ແຫ່ງຮູບຈໍາລອງຊ້າງ, ມ້າ, ຕົ້ນກັນ, ວັດຖຸທານ ໄປສົມທົບກັບບ້ານເຈົ້າພາບ, ບ້ານໃກ້ຄຽງ ຢູ່ທາງສີ່ແຍກບ້ານນາຄອງ, ພາຍຫລັງເຕົ້າໂຮມກັນ ແລະ ເຖິງເວລາແລ້ວ ກໍເຄື່ອນຂະບວນແຫ່ໄປສູ່ວັດອ້ອມພະທາດມາຫລ້າ 3 ຮອບ, ວາງ-ຈັດແຈງເຄື່ອງຂອງວັດຖຸທານ, ດອກໄມ້, ທູບທຽນອ້ອມໄວ້ອົງພະທາດ. ຈາກນັ້ນ, ເຂົ້າສູ່ພິທີເປີດງານເປັນທາງການ, ທ່ຽວຊົມຕະຫລາດນັດ, ຊົມການສະແດງສິລະປະ-ວັນະຄະດີ, ຂັບລໍາຮ້ອງເພງ, ມ່ວນຊື່ນລໍາວົງສາມັກຄີ ແລະ ວັນທີ 24 ກຸມພາ 2024 ມີພິທີໃສ່ບາດ-ຖວາຍສັງຂະທານ, ຊົມການແຂ່ງຂັນກິລາເປຕັງ ແລະ ວຽນທຽນອ້ອມພະທາດ ຖືວ່າຈົບພິທີ.
ຂ່າວ-ພາບ: ຄໍາພອນ ຈັນທະວົງສັກ