ກຽມເຂົ້າຮ່ວມຊົມ ບຸນການສະແດງ 16 – 17 ກຸມພານີ້

7

ງານບຸນການສະແດງ ຄັ້ງທີ 4 ຫຼື Vientiane Performance Arts Festival ຈະມີຂຶ້ນ 16 – 17 ກຸມພາ 2024 ທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ.

ພິທີຖະແຫຼງຂ່າວ ການກຽມພ້ອມຈັດງານບຸນການສະແດງ ມີຂຶ້ນໃນວັນທີ 12 ກຸມພາ 2024 ທີ່ສະຖາບັນຝຣັ່ງ ໂດຍການຖະແຫຼງຂອງ ທ່ານ ບົວເງິນ ຊາພູວົງ ປະທານສະມາຄົມສິລະປິນລາວ, ທ່ານ ລັດຕະນະກອນ ອິນສີຊຽງໃໝ່ ຜູ້ອຳນວຍການ ບໍລິສັດ ເຂົ້າໜຽວ, ທ່ານ ແກ້ວວິໄລສັກ ແສນສັກດາ ຮອງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ( ຖວທ ) ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.


ທ່ານ ລັດຕະນະກອນ ອິນສີຊຽງໃໝ່ ປະທານ ບໍລິສັດ ເຂົ້າໜຽວ ກ່າວວ່າ: ງານບຸນການສະແດງ ຈັດຂຶ້ນມາແລ້ວ 3 ຄັ້ງ ( ປີ 2015, 2016, 2018 ) ແລະ ຄັ້ງທີ 4 ນີ້ ຢາກໃຫ້ເປັນງານບຸນສິລະປະການສະແດງທີ່ຈັດຂຶ້ນທຸກ 2 ປີ ເພື່ອເປັນການພັດທະນາສິລະປິນ ແລະ ການສະແດງ ໃຫ້ສ້າງຜົນງານທີ່ມີເອກະລັກປະສົມປະສານວັດທະນະທຳຂອງຊາດ ມີຄຸນນະພາບ ອອກມາຮັບໃຊ້ສັງຄົມ ທັງພາຍໃນ ແລະ ຕ່າງປະເທດ. ທັງເປັນການສ້າງຂະບວນການຂັບເຄື່ອນ ແລະ ສົ່ງເສີມສິລະປະການສະແດງ, ເວົ້າລວມເພື່ອໃຫ້ມວນຊົນຫັນມາໃຫ້ຄວາມສົນໃຈ ແລະ ສົ່ງເສີມສິລະປະການສະແດງຂອງຄົນລາວ ແລະ ໄດ້ເບິ່ງການສະແດງຂອງຕ່າງປະເທດ. ພ້ອມນີ້ ກໍເປັນອີກກິດຈະກຳພາຍໃນນະຄອນຫຼວງວຽງຈັນ ເພື່ອດຶງດູດເອົານັກທ່ອງທ່ຽວຈາກຕ່າງປະເທດເຂົ້າມາທ່ອງທ່ຽວທີ່ນະຄອນຫຼວງເພີ່ມຂຶ້ນເລື້ອຍໆ.
ຜ່ານຈາກການຈັດງານບຸນມາ 3 ຄັ້ງ ໃນປີ 2015, 2016 ແລະ 2018 ແມ່ນໄດ້ຮັບ ຄວາມສົນໃຈຈາກມວນຊົນທັງພາຍໃນ ແລະ ຕ່າງປະເທດ.


ຈຸດປະສົງການຈັດງານຄັ້ງນີ້ ແມ່ນໃຫ້ມວນຊົນໄດ້ຮັບຊົມການສະແດງຂອງນັກສະແດງລາວ; ສ້າງຄວາມມ່ວນຊື່ນ, ສ້າງຮອຍຍິ້ມ ແລະເປັນການສ້າງຄວາມຜ່ອນຄາຍໃຫ້ແກ່ມວນຊົນຜູ້ທີ່ມາຮ່ວມໃນງານນີ້; ເປີດໂອກາດໃຫ້ ນັກສະແດງເຄິ່ງອາຊີບ ແລະ ມືອາຊີບ ນໍາສະເໜີຜົນງານການສະແດງໃໝ່ໆ; ນັກສະແດງໄດ້ມີໂອກາດແລກປ່ຽນ ແລະ ສ້າງເຄືອຂ່າຍທາງດ້ານສິລະປະການສະແດງ ລະຫວ່າງ ນັກສະແດງລາວ ແລະ ນັກສະແດງຕ່າງປະເທດ; ໂຄສະນາເຜີຍແຜ່ ບຸກຄົນ, ທີມ, ຫ້ອງການ, ຫຼື ບໍລິສັດ ທີ່ເຮັດກ່ຽວກັບການບໍລິການທາງດ້ານການສະແດງ ໃຫ້ແກ່ຜູ້ທີ່ມາຮ່ວມໃນງານ.

ກິດຈະກໍາພາຍໃນງານບຸນສະແດງ ຄັ້ງທີ 4 ລວມມີລາຍການສະແດງທັງໝົດ 35 ລາຍການ ແລະ ຈຳນວນ 24 ທີມເຂົ້າຮ່ວມ ເຊິ່ງລາຍການສະແດງຂອງນັກສະແດງລາວປະກອບມີ: ກາຍະສິນ, ຕຸກກະຕາ, ລະຄອນເວົ້າ, ລຳເລື່ອງ, ລຳພື້ນບ້ານ, ຮ້ອງເພງ, ຟ້ອນພື້ນເມືອງ, ເສບດົນຕີພື້ນເມືອງ, ເສບດົນຕີພື້ນເມືອງຂອງເກົາຫຼີ ( ຄົນເກົາຫຼີທີ່ຢູ່ປະເທດລາວ, ເສບດົນຕີຮ່ວມສະໄໝ, ຟ້ອນຮ່ວມສະໄໝ, ເຕັ້ນບີບອຍ, ລະຄອນຫຸ່ນຮ່ວມສະໄໝ, ລະຄອນຫຸ່ນບັກຕື້ ສ.ວ.ດ ສະຫວັນນະເຂດ, ລະຄອນຫຸ່ນອີ່ປ໋ອກ ສ.ວ.ດ ຫຼວງພະບາງ. ການສະແດງຂອງຄົນພິການ, ການວາງສະແດງຮູບພາບ…


ທ່ານ ບົວເງິນ ຊາພູວົງ ປະທານສະມາຄົມສິລະປິນລາວ ກ່າວບາງຕອນວ່າ: ຂໍຊົມເຊີຍບັນດາສິລະປິນທັງຫຼາຍ ທີ່ມາຮ່ວມສະແດງງານນີ້ທັງສິລະປິນລາວ ແລະ ສິລະປິນຈາກຕ່າງປະເທດ ເພາະຈະເປັນການແລກປ່ຽນ ແລະ ພັດທະນາສິລະປະ, ວັດທະນະທຳເຊິ່ງກັນ ແລະ ກັນ. ຂໍໃຫ້ທ່ານຈົ່ງພູມໃຈກັບອາຊີບຕົນເອງ ເພາະມັນເປັນອາຊີບໜຶ່ງທີ່ສາມາດສ້າງຄວາມມ່ວນຊື່ນໃຫ້ກັບສັງຄົມໄດ້ ເຊິ່ງມີທັງຄົນຮຸ່ນໃໝ່ໆທີ່ເປັນຜູ້ສືບທອດສິລະປິນລາວ; ອີກອັນໜຶ່ງທີ່ສຳຄັນຂອງງານບຸນສະແດງຄັ້ງນີ້ແມ່ນນອກຈາກຈະເປັນການສະແດງໃຫ້ຄົນລາວໄດ້ເບິ່ງໄດ້ຊົມແລ້ວ ຍັງເປັນການສະແດງໃຫ້ຄົນຕ່າງປະເທດທີ່ຢູ່ ສປປ ລາວ ໄດ້ຮັບຊົມ ແລະ ຫວັງວ່າໃນຕໍ່ໜ້າອາດຈະມີໂອກາດໄປສະແດງຢູ່ຕ່າງປະເທດ ແລະ ສະແດງໃຫ້ນັກທ່ອງທ່ຽວຕ່າງປະເທດທີ່ມາທ່ຽວລາວໄດ້ຮັບຊົມ.