ເປີດສູນຂໍ້ມູນ ຂ່າວສານການທ່ອງທ່ຽວ ເມືອງວຽງໄຊ

30

 

ວັນທີ 7 ກຸມພາ 2024, ອົງການຄົນພິການອາຊີ ເພື່ອການພັດທະນາ ໄດ້ຈັດພິທີມອບ – ຮັບ ແລະ ເປີດນຳໃຊ້ສູນຂໍ້ມູນຂ່າວສານການທ່ອງທ່ຽວເມືອງວຽງໄຊ ຢູ່ເມືອງວຽງໄຊ ແຂວງ ວພັນ ໂດຍມີ ທ່ານ ຄຳແພງ ໄຊສົມແພງ ເຈົ້າ ແຂວງຫົວພັນ, ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ, ມີພາກສ່ວນກ່ຽວຂ້ອງຂັ້ນກະຊວງ, ຂັ້ນແຂວງ, ເມືອງວຽງໄຊ ແລະ ພະນັກງານອົງການຄົນພິການອາຊີ ເພື່ອການພັດທະນາເຂົ້າຮ່ວມນຳ.

ໂຄງການກໍ່ສ້າງສູນຂໍ້ມູນຂ່າວສານການທ່ອງທ່ຽວເມືອງວຽງໄຊ ແມ່ນໄດ້ລົງມືກໍ່ສ້າງມາແຕ່ວັນທີ 31 ມີນາ 2023 ແລະ ໄດ້ສຳເລັດໃນວັນທີ 31 ມັງກອນ 2024, ເປັນອາຄານກໍ່ຊັ້ນດຽວ ມີ 2 ຫ້ອງ ກວ້າງ 5 ແມັດ ຍາວ 10 ແມັດ, ເຄື່ອງເຟີນີເຈີຄົບຊຸດ ລວມມູມຄ່າກໍ່ສ້າງ 300 ລ້ານກວ່າກີບ ເຊິ່ງແມ່ນທຶນຊ່ວຍເຫຼືອຈາກອົງການຄົນພິການອາຊີເພື່ອການພັດທະນາ.


ການກໍ່ສ້າງກໍເພື່ອເປັນການສະໜອງຂໍ້ມູນການທ່ອງທ່ຽວສຳຄັນຕ່າງໆຢູ່ ສປປ ລາວ ໂດຍສະເພາະແມ່ນແຂວງຫົວພັນ ພ້ອມທັງພັດທະນາ, ຍົກລະດັບການທ່ອງທ່ຽວ ພາຍໃນແຂວງຫົວພັນ ໃຫ້ມີຄວາມສະດວກ ເປັນຕົ້ນແມ່ນແຫຼ່ງທ່ອງທ່ຽວທາງດ້ານປະຫວັດສາດ, ວັດທະນະທຳ ແລະ ທຳມະຊາດ. ພິເສດແມ່ນທ່ຽວຊົມຖ້ຳທ່ານຜູ້ນຳຕ່າງໆ, ດອກຄາຍປ່າ ແລະ ດອກຊາກຸຣະ, ພ້ອມທັງເປັນການໂຄສະນາ, ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ເຂົ້າມາແຂວງ ຫົວພັນໃຫ້ນັບມື້ຫຼາຍຂຶ້ນ.
ໃນໂອກາດດຽວກັນນີ້, ບັນດາທ່ານແຂກເຂົ້າຮ່ວມພິທີ ຍັງໄດ້ຮ່ວມຕັດແຖບຜ້າ ແລະ ຍ່າງທ່ຽວຊົມເມືອງວຽງໄຊຕື່ມອີກ.