ພາສີປະຈຳແຂວງຫຼວງນໍ້າທາ ເກັບລາຍຮັບໄດ້ລື່ນຄາດໝາຍ 315 ຕື້ກວ່າກີບ

13

 

ພາສີປະຈໍາແຂວງຫຼວງນໍ້າທາ ໄດ້ສະຫຼຸບການຈັດຕັ້ງປະຕິບັດວຽກງານວິຊາສະເພາະ ປະຈໍາປີ 2023 ແລະ ກໍານົດທິດທາງ 2024 ໄດ້ຈັດຂຶ້ນໃນວັນທີ 1 ກຸມພາ 2024 ທີ່ຫ້ອງປະຊຸມພາສີປະຈຳແຂວງ ໂດຍການເຂົ້າຮ່ວມຂອງ ທ່ານ ອ່ອນຈັນ ຄຳພາວົງ ຮອງເຈົ້າແຂວງຫຼວງ ນໍ້າທາ, ຜູ້ຊີ້ນຳວຽກງານເສດຖະກິດ.

ມີທ່ານ ຄຳພັນ ໄຊສີ ຫົວໜ້າພະແນກການເງິນແຂວງ, ທ່ານ ບຸນແອງ ພັນທະວົງ ຫົວໜ້າພາສີປະຈຳແຂວງ, ມີຫົວໜ້າ – ຮອງຫົວໜ້າດ່ານພາສີຊາຍແດນ, ດ່ານພາສີສາກົນບໍ່ເຕັນ, ດ່ານທ້ອງຖິ່ນປາງໄຮ, ຊຽງກົກ, ແຂກຖືກເຊີນ, ຫົວໜ້າ – ຮອງຂະແໜງ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.


ໃນກອງປະຊຸມ ທ່ານ ບຸນແອງ ພັນທະວົງ ຫົວໜ້າພາສີປະຈຳແຂວງຫຼວງນໍ້າທາ ໄດ້ຕີລາຄາການຈັດຕັ້ງປະຕິບັດວຽກງານຮອບດ້ານໃນໄລຍະຜ່ານມາ ວ່າ: ປີ 2023 ພາສີປະຈຳແຂວງໄດ້ຮັບແຜນການຈັດເກັບລາຍຮັບທັງໝົດ 970 ຕື້ກີບ, ຜ່ານການຈັດຕັ້ງປະຕິບັດໄດ້ 1.285 ຕື້ກີບ ລື່ນແຜນການ 315 ຕື້ກວ່າກີບ; ໃນນັ້ນ ຂະແໜງກວດກາ ແລະ ກວດສອບຄືນການແຈ້ງໄດ້ 32 ຕື້ກີບ ລື່ນແຜນ 17 ຕື້ກວ່າກີບ, ດ່ານພາສີສາກົນບໍ່ເຕັນແຜນການປີ 726 ຕື້ກວ່າກີບ ປະຕິບັດໄດ້ 956 ຕື້ກວ່າກີບ, ດ່ານພາສີທາງລົດໄຟ ແຜນການປີ 218 ຕື້ກວ່າກີບ ປະຕິບັດໄດ້ 287 ຕື້ ກວ່າກີບ ລື່ນແຜນ 69 ຕື້ກວ່າກີບ.

ສ່ວນດ່ານພາສີທ້ອງຖິ່ນປາງໄຮ ແຜນປີ 7 ຕື້ 700 ລ້ານກີບ ປະຕິບັດໄດ້ 5 ຕື້ 948 ລ້ານກວ່າກີບ, ດ່ານພາສີທ້ອງຖິ່ນຊຽງກົກ ແຜນການປີ 7 ຕື້ 500 ລ້ານກີບ ປະຕິບັດໄດ້ 3 ຕື້ 357 ລ້ານກີບ ຫຼຸດແຜນປີ 4 ຕື້ກວ່າກີບ.
ພ້ອມນັ້ນ, ວຽກງານວິຊາສະເພາະກໍໄດ້ເອົາໃຈໃສ່ຊີ້ນຳ ນໍາພາ ແລະ ລົງເລິກໃກ້ຊິດ, ການຈັດຕັ້ງປະຕິບັດແຕ່ລະດ້ານ, ຜ່ານການຈັດຕັ້ງປະຕິບັດ ເຫັນວ່າສາມາດສັງລວມໄດ້ບາງຈຸດທີ່ພົ້ນເດັ່ນ ເປັນຕົ້ນແມ່ນການປັບປຸງກົນໄກ, ແບບແຜນ, ວິທີການເຮັດວຽກຢູ່ບັນດາຂະແໜງ ແລະ ບັນດາດ່ານ ເພື່ອໃຫ້ການບໍລິການມີຄວາມສະດວກວ່ອງໄວຂຶ້ນ ແລະ ໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ ເພື່ອແນໃສ່ການຈັດເກັບລາຍຮັບໃຫ້ໄດ້ຕາມແຜນການ ຫຼື ລື່ນແຜນການ.


ສໍາລັບທິດທາງແຜນການປີ 2024 ການເກັບລາຍຮັບໃຫ້ໄດ້ 1.428 ຕື້ກີບ, ໃນນັ້ນຂະແໜງກວດກາ ແລະ ກວດສອບຄືນການແຈ້ງພາສີໃຫ້ໄດ້ 25 ຕື້ກວ່າກີບ, ດ່ານພາສີສາກົນບໍ່ເຕັນ ໃຫ້ໄດ້ 1.063 ຕື້ກວ່າກີບ, ດ່ານພາສີທາງລົດໄຟບໍ່ເຕັນ ໃຫ້ໄດ້ 320 ຕື້ກວ່າກີບ, ດ່ານພາສີທ້ອງຖິ່ນປາງໄຮ ໃຫ້ໄດ້ 10,3 ຕື້ກວ່າກີບ, ດ່ານພາສີທ້ອງຖິ່ນຊຽງກົກ ໃຫ້ໄດ້ 9 ຕື້ກວ່າກີບ ແລະ ວຽກງານອື່ນໆທີ່ຕິດພັນກັບວຽກງານວິຊາສະເພາະທີ່ກ່ຽວຂ້ອງໃຫ້ໄດ້ຕາມລະດັບຄາດໝາຍ.