ໄປເບິ່ງ ເສັ້ນທາງເຂົ້າຖານທີ່ໝັ້ນຂອງການປະຕິວັດພາກໃຕ້ລາວ ຫຼັງເປີດໃຊ້ທາງການ

41

ແຂວງ ອັດຕະປື ໄດ້ຈັດພິທີເປີດການນໍາໃຊ້ເສັ້ນທາງເຂົ້າຖານທີ່ໝັ້ນຂອງການປະຕິວັດພາກໃຕ້ລາວ ຂຶ້ນຢ່າງເປັນທາງການ ວັນທີ 5 ກຸມພາ 2024 ທີ່ບ້ານ ອຸດົມໄຊ ເມືອງ ສະໜາມໄຊ, ໂດຍເປັນກຽດເຂົ້າຮ່ວມຂອງ ພົນໂທ ວັນທອງ ກອງມະນີ ກຳມະການສູນກາງພັກ ເລຂາພັກແຂວງ ເຈົ້າແຂວງ ອັດຕະປື, ມີບັນດາການນໍາຂອງແຂວງ, ເມືອງ, ອຳນາດການປົກຄອງບ້ານ ແລະ ປະຊາຊົນເຂົ້າຮ່ວມ.

ພິທີດັ່ງກ່າວ ທ່ານ ລັດຕະນະພອນ ເທບສຸວັນ ຫົວໜ້າພະແນກໂຍທາທິການ ແລະ ຂົນສົ່ງແຂວງ ອັດຕະປື ໄດ້ລາຍງານການຈັດຕັ້ງປະຕິບັດການໂຄງການກໍ່ສ້າງເສັ້ນທາງເຂົ້າຖານທີ່ໝັ້ນຂອງການປະຕິວັດພາກໃຕ້ລາວ, ເຊິ່ງໂຄງກໍ່ສ້າງທາງເສັ້ນນີ້ໄດ້ເລີມຈັດຕັ້ງປະຕິບັດມາແຕ່ວັນທີ 19 ທັນວາ ປີ 2023 ມາຮອດປະຈຸບັນໄດ້ສຳເລັດຮ້ອຍສ່ວນຮ້ອຍ, ໂດຍແມ່ນພະແນກໂຍທາທິການ ແລະ ຂົນສົ່ງແຂວງ ຮ່ວມກັບ ບໍລິສັດ ມະຫາໄຊກໍ່ສ້າງສ້ອມແປງຂົວ-ທາງ ແລະ ຊົນລະປະທານ ຈຳກັດ ເປັນຜູ້ຮັບເໝົາການກໍ່ສ້າງ ໃນມູນຄ່າ 4 ຕື້ກວ່າກີບ, ເປັນທາງປູຢາງສອງຊັ້ນ, ກວ້າງ 6 ແມັດ, ຍາວ 2.400 ແມັດ, ພ້ອມນີ້ຍັງມີໂຄງການກໍ່ສ້າງຂັ້ນໄດທາງຂື້ນເຂດທີ່ໝັ້ນຂອງ ປະທານ ຄຳໄຕ ສີພັນດອນ, ເຮືອນເຮັດວຽກ, ເຮືອນນອນ, ເຮືອນຄົວ ແລະ ຮູບຈຳລອງຖານທີ່ໝັ້ນຂອງການປະຕິວັດພາກໃຕ້, ມີມູນຄ່າ 1 ຕື້ 700 ລ້ານກວ່າກີບ.

ທ່ານ ບຸນເສີດ ເສດທິລາດ ຮອງເຈົ້າແຂວງ ອັດຕະປື ໄດ້ມີຄຳເຫັນ ແລະ ກ່າວເປີດພິທີວ່າ: ພິທີມອບ-ຮັບ ເສັ້ນທາງດັ່ງກ່າວນີ້ ເພື່ອເປັນການລະນຶກເຖິງຄຸນງາມຄວາມດີຂອງຜູ້ນຳທີມີຕໍ່ປະເທດຊາດ ໃນໄລຍະຕໍ່ສູ້ປົດປ່ອຍປະເທດຊາດ, ໃຫ້ໄດ້ຮັບເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດລາວເຮົາ, ສະເພາະແຂວງອັດຕະປືໄດ້ມີຫລາຍກິດຈະກໍາ ເປັນຕົ້ນ ປາຖະກະຖາເລົ່າຄືນມູນເຊື້ອ ແລະກິດຈະກໍາກໍ່ສ້າງຕ່າງໆ

ໂອກາດນີ້ ການນໍາຂອງແຂວງ ແລະ ແຂກທຸກພາກສ່ວນ ໄດ້ຮ່ວມກັນຕັດແຖບຜ້າ, ປ່ອຍປູມເປົ້າ ແລະ ລັ່ນຄ້ອງ 9 ບາດ ເພື່ອເປັນການບົ່ງບອກເຖິງການເປີດນໍາໃຊ້ເສັ້ນທາງເຂົ້າຖານທີ່ໝັ້ນຂອງການປະຕິວັດພາກໃຕ້ລາວ ທີ່ບ້ານ ອຸດົມໄຊ ເມືອງ ສະໜາມໄຊ ຢ່າງເປັນທາງ. ທັງນີ້ ກໍ່ເພື່ອເປັນສະເຫຼີມສະຫຼອງວັນເກິດຂອງປະທານ ຄຳໄຕ ສີພັນດອນ ຄົບຮອບ 100 ປີ ແລະ ທັງເປັນການກະກຽມເປີດປີທ່ອງທ່ຽວລາວ 2024 ທີ່ແຂວງ ອັດຕະປື ອີກດ້ວຍ.
ຂ່າວ: ທິດປະສົງ