ກຽມພ້ອມຈັດງານວາງສະແດງສິນຄ້າ ກະສິກໍາ – ຫັດຖະກໍາ ແລະ ອຸດສາຫະກໍາ ເມືອງນາຊາຍທອງ

11

ເມືອງນາຊາຍທອງ ກຽມພ້ອມຈັດງານວາງສະແດງສິນຄ້າ ປະຈໍາປີ 2024 ເຊິ່ງເປັນຄັ້ງທີ 27 ຂຶ້ນລະຫວ່າງວັນທີ 13 – 19 ກຸມພາ 2024; ຄາດຈະມີຫຼາຍຮ້ອຍຫົວໜ່ວຍຜູ້ປະກອບການເຂົ້າຮ່ວມ ພ້ອມເຊີນຊວນພໍ່ແມ່ປະຊາຊົນ ໄປຫຼິ້ນ ໄປມ່ວນ ໄປຊອກ ໄປຊື້ ຢູ່ເມືອງລາວໃຊ້ເງິນກີບລາວ ສົ່ງເສີມສິນຄ້າລາວ.

ພິທີຖະແຫຼງຂ່າວ ຈັດຂຶ້ນເມື່ອວັນທີ 5 ກຸມພາ 2024 ທີ່ຫ້ອງວ່າການເມືອງນາຊາຍທອງ ໂດຍມີ ທ່ານ ພູວອນ ພົງລາດແກ້ວ ຮອງເຈົ້າເມືອງນາຊາຍທອງ, ທ່ານ ຄໍາໝັ້ນ ສິນສະໄໝ ຫົວໜ້າຫ້ອງການ ຖວທ ເມືອງ ແລະ ທ່ານ ບຸນຫົງ ທໍາມະວົງ ຜູ້ອໍານວຍການ ບໍລິສັດ EFL ໃນນາມຜູ້ສໍາປະທານການຈັດງານ ໄດ້ຖະແຫຼງຕໍ່ສື່ມວນຊົນ.


ທ່ານ ພູວອນ ພົງລາດແກ້ວ ໄດ້ກ່າວວ່າ: ເມືອງນາຊາຍທອງ ກໍເປັນເມືອງໜຶ່ງທີ່ນອນໃນຈໍານວນ 9 ຕົວເມືອງຂອງນະຄອນຫຼວງວຽງຈັນ; ມີເນື້ອທີ່ຜະລິດກະສິກໍາກວ້າງຂວາງສົມຄວນ. ພິເສດ ມີອ່າງນໍ້າຫຸມ ແລະ ອ່າງນໍ້າຊວງ ທີ່ເປັນອ່າງເກັບ ແລະ ກັກນໍ້າທີ່ສາມາດຕອບສະໜອງໃຫ້ແກ່ເນື້ອທີ່ການຜະລິດພາຍໃນເມືອງນາຊາຍທອງ ບວກໃສ່ພໍ່ແມ່ປະຊາຊົນມີຄວາມດຸໝັ່ນຂະຫຍັນພຽນໃນການປູກຝັງ – ລ້ຽງສັດ.

ສໍາລັບການຈັດງານຕະຫຼາດນັດ ກໍເປັນຂະບວນການໜຶ່ງຂອງຄະນະພັກ – ອົງການປົກຄອງເມືອງນາຊາຍທອງ ເຊິ່ງໄດ້ຈັດຕັ້ງປະຕິບັດເລີ່ມແຕ່ປີ 1996 ເປັນຕົ້ນມາ ເຊິ່ງປີນີ້ເປັນຄັ້ງທີ 27 ໂດຍມີຈຸດປະສົງເພື່ອເປັນການກະຕຸກຊຸກຍູ້ຂະບວນການຈັດຕັ້ງປະຕິບັດ ເນື້ອໃນຈິດໃຈມະຕິກອງປະຊຸມໃຫຍ່ ຄັ້ງທີ 7 ຂອງຄະນະພັກເມືອງ ຕິດພັນກັບແຜນພັດທະນາເສດຖະກິດ – ສັງຄົມຂອງເມືອງວາງອອກ ໄລຍະ 2020 – 2025; ຄຽງຄູ່ກັບການສ້າງຂະບວນການຄໍານັບຮັບຕ້ອນວັນສໍາຄັນຂອງ ຊາດ – ຂອງພັກ ໂດຍສະເພາະໃນເງື່ອນໄຂປັດຈຸບັນນີ້ ສຸມໃສ່ຫ້າງຫາກະກຽມການດໍາເນີນກອງປະຊຸມໃຫຍ່ ຄັ້ງທີ 3 ຂອງພັກ; ຕິດພັນກັບການຊຸກຍູ້ສົ່ງເສີມການຜະລິດກະສິກໍາ – ຫັດຖະກໍາ ແລະ ອຸດສາຫະກໍາຢູ່່ພາຍໃນເມືອງໃຫ້ມີ ຄວາມເຕີບໃຫຍ່ເຂັ້ມແຂງຕໍ່ເນື່ອງ ເຊິ່ງເມືອງນາຊາຍທອງ ກໍເປັນເມືອງໜຶ່ງທີ່ມີກາລະໂອກາດ ມີທ່າແຮງ ແລະ ເງື່ອນໄຂໃນການຜະລິດກະສິກໍາ ປູກຝັງ – ລ້ຽງສັດ ເພື່ອທົດແທນການນໍາເຂົ້າຕາມນະໂຍບາຍສົ່ງເສີມຂອງລັດຖະບານ.

ພ້ອມດຽວກັນນັ້ນ, ກໍເພື່ອເປີດກວ້າງການຄ້າການບໍລິການ ແລະ ການທ່ອງທ່ຽວຂອງເມືອງ ໃຫ້ຂະຫຍາຍຕົວຢ່າງມີປະສິດທິພາບ ໄປພ້ອມໆກັບການສົ່ງເສີມສິນຄ້າໂອດ໊ອບ, ສົ່ງເສີມການພັດທະນາວິສາຫະກິດຂະໜາດນ້ອຍ ແລະ ຂະໜາດກາງ; ເຕົ້າໂຮມ ຄວາມສາມັກຄີ, ໂຄສະນາດ້ານການຕະຫຼາດ ແລະ ສ້າງເວທີແລກປ່ຽນບົດຮຽນຂອງຊາວກະສິກອນ, ຊາວຊ່າງຫັດຖະກໍາ, ຄອບຄົວຕົວແບບ, ຄອບຄົວທີ່ມີການຜະລິດຕ່າງໆ.

ໃນໂອກາດດຽວກັນ, ທ່ານ ບຸນຫົງ ທໍາມະວົງ ກໍໄດ້ເຜີຍວ່າ: ຜູ້ຈັດງານມີຄວາມພ້ອມ 100% ທີ່ຈະຮັບໃຊ້ພໍ່ແມ່ພີ່ນ້ອງ ກໍຄືຜູ້ປະກອບການຢູ່ເມືອງນາຊາຍທອງ ຫຼື ມາຈາກຕ່າງເມືອງ – ຕ່າງແຂວງ ທີ່ຈະນໍາເອົາສິນຄ້າຂອງຕົນເອງໄປວາງສະແດງ ຄາດວ່າຈະມີຫຼາຍຮ້ອຍຫົວໜ່ວຍກິດຈະການເຂົ້າຮ່ວມ ເຊິ່ງໄລຍະດັ່ງກ່າວໄດ້ກວມເອົາວັນທີ 14 ກຸມພາ ກໍຈະຈັດໃຫ້ມີເວທີຄອນເສີດໄປພ້ອມ. ຂໍເຊີນຊວນພໍ່ແມ່ປະຊາຊົນ ໄປຫຼິ້ນ ໄປມ່ວນ ໄປຊອກ ໄປຊື້ ຢູ່ເມືອງລາວໃຊ້ເງິນກີບລາວ ສົ່ງເສີມສິນຄ້າລາວ ເຮັດແນວໃດ ໃຫ້ສິນຄ້າເຮົາໄດ້ຮັບການພັດທະນາ ແລະ ຂາຍຫຼາຍຂຶ້ນ ກ້າວໄປສູ່ການສົ່ງອອກໃນອະນາຄົດ.

ງານວາງສະແດງສິນຄ້າ ກະສິກໍາ – ຫັດຖະກໍາ ແລະ ອຸດສາຫະກໍາ ນາຊາຍທອງ ຄັ້ງທີ 27 ຈະຈັດຂຶ້ນເປັນເວລາ 7 ວັນ ທີ່ບ້ານແຈ້ງສະຫວ່າງ ເມືອງນາຊາຍທອງ ນະຄອນຫຼວງວຽງຈັນ ສາມາດໄປພົວພັນເຂົ້າຮ່ວມງານວາງສະແດງຢູ່ສະຖານທີ່ດັ່ງກ່າວໄດ້ເລີຍ.