ໜ້າວຽກຈຸດສຸມຂອງລັດຖະບານໃນເດືອນກຸມພາ ຍັງແມ່ນການແກ້ໄຂວຽກງານເຄັ່ງຮ້ອນທາງດ້ານເສດຖະກິດ

37

ໃນເດືອນກຸມພາ 2024 ລັດຖະບານ ຍັງຈະສຸມໃສ່ການແກ້ໄຂວຽກງານເຄັ່ງຮ້ອນທາງດ້ານເສດຖະກິດ. ສືບຕໍ່ຕິດຕາມ ແລະ ຄຸ້ມຄອງອັດຕາແລກປ່ຽນຢ່າງໃກ້ຊິດ, ທັງຊຸກຍູ້ການປະຕິບັດນະໂຍບາຍສິນເຊື່ອໃຫ້ຜູ້ປະກອບການ; ຮີບຮ້ອນຄົ້ນຄວ້າການເພີ່ມເງິນອຸດໜູນຄ່າຄອງຊີບໃຫ້ພະນັກງານ – ລັດຖະກອນ, ທະຫານ, ຕຳຫຼວດ ໃຫ້ສຳເລັດໄວ.

ວັນທີ 30 ມັງກອນ 2024 ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຜູ້ປະຕິບັດໜ້າທີ່ໂຄສົກລັດຖະບານ ໄດ້ຖະແຫຼງຂ່າວກ່ຽວກັບຜົນຂອງກອງປະຊຸມສະໄໝສາມັນ ປະຈຳເດືອນມັງກອນ ວ່າ: ກອງປະຊຸມສະໄໝສາມັນຂອງລັດຖະບານ ປະຈຳເດືອນມັງກອນ 2024 ທີ່ໄດ້ໄຂຂຶ້ນໃນຕອນເຊົ້າວັນທີ 29 ແລະ ອັດລົງໃນຕອນເຊົ້າວັນທີ 30 ມັງກອນ 2024 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີ; ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ຜູ້ຕາງໜ້າກະຊວງ ເຂົ້າຮ່ວມແບບເຊິ່ງໜ້າ; ການນໍາຂອງບັນດາແຂວງ ແລະ ນະຄອນຫຼວງວຽງຈັນ ເຂົ້າຮ່ວມຜ່ານລະບົບກອງປະຊຸມທາງໄກ ເພື່ອຮັບຟັງການລາຍງານສະພາບພົ້ນເດັ່ນປະຈຳເດືອນມັງກອນ ແລະ ທິດທາງແຜນການປະຈຳເດືອນກຸມພາ 2024.


ສຳລັບແຜນວຽກຈຸດສຸມໃນເດືອນກຸມພາ, ລັດຖະບານ ຈະໄດ້ສຸມໃສ່ປະຕິບັດວຽກ 11 ຈຸດສຸມ.
▶ ຈຸດສຸມທີ 3 ການແກ້ໄຂວຽກງານເຄັ່ງຮ້ອນທາງດ້ານເສດຖະກິດ:
ແມ່ນສືບຕໍ່ແກ້ໄຂບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ຕາມແຜນເຄື່ອນໄຫວວຽກຈຸດສຸມຂອງຄະນະສະເພາະກິດ, ນິຕິກຳ ແລະ ແຈ້ງການທິດຊີ້ນຳຂອງກອງປະຊຸມຄະນະສະເພາະກິດໃນແຕ່ລະຄັ້ງ, ພ້ອມທັງສຸມໃສ່ປະຕິບັດຕາມທິດຊີ້ນຳ ກ່ຽວກັບມາດຕະການຮັບມືສະພາບການຂາດເຂີນນ້ຳມັນເຊື້ອໄຟ ແລະ ບັນຫາການສະໜອງໄຟຟ້າໃຫ້ບາງໂຄງການ; ສຸມໃສ່ເກັບລາຍຮັບເຂົ້າງົບປະມານລັດ ໃຫ້ໄດ້ຫຼາຍສຸດກຳລັງຄວາມສາມາດ ຕາມກົດໝາຍ, ລັດຖະບັນຍັດກ່ຽວຂ້ອງ ແລະ ຕາມທິດຫັນເປັນທັນສະໄໝ.

▶ຈຸດສຸມທີ 4 ຂົງເຂດພະລັງງານ ແລະ ບໍ່ແຮ່:
ກວດກາຄືນບັນດານິຕິກຳ ແລະ ກົດໝາຍທີ່ກ່ຽວຂ້ອງກັບການເກັບລາຍຮັບຈາກໂຄງການບໍ່ແຮ່, ນິຕິກຳໃດຍັງບໍ່ທັນສອດຄ່ອງ, ເປັນອຸປະສັກບໍ່ສາມາດແຂ່ງຂັນໄດ້ ກໍໃຫ້ຄົ້ນຄວ້າປັບປຸງ; ສົ່ງເສີມການປຸງແຕ່ງເປັນຜະລິດຕະພັນສົ່ງອອກໃຫ້ຫຼາຍຂຶ້ນ ເພື່ອນຳເງິນຕາເຂົ້າມາເພີ່ມຂຶ້ນ; ສືບຕໍ່ສຸມໃສ່ປະເມີນໂຄງການຂຸດຄົ້ນ ແລະ ປຸງແຕ່ງແຮ່ທາດຢູ່ບັນດາແຂວງທີ່ຍັງເຫຼືອໃຫ້ສຳເລັດ; ໃຫ້ອົງການປົກຄອງທ້ອງຖິ່ນ ເປັນເຈົ້າການສະຫຼຸບສັງລວມ ແລະ ສະໜອງຂໍ້ມູນຜົນການຈັດຕັ້ງປະຕິບັດໂຄງການລະອຽດແຕ່ລະດ້ານ ເພື່ອໃຫ້ການປະເມີນມີ ຄວາມຈະແຈ້ງ; ຄົ້ນຄວ້າກຳນົດມາດຖານເງື່ອນໄຂຂອງຜູ້ລົງທຶນ ເປັນຕົ້ນ ດ້ານເຕັກນິກ, ການເງິນ, ການຖືຄອງບັນຊີເງິນຕາ ແລະ ອື່ນໆ ໂດຍຮ່າງເປັນນິຕິກຳສະເພາະ ເພື່ອເປັນບ່ອນອີງໃນການພິຈາລະນາອະນຸຍາດລົງທຶນພັດທະນາບໍ່ແຮ່ໃນຕໍ່ໜ້າ ຢ່າງມີປະສິດທິພາບ ແລະ ປະສິດທິຜົນ.

▶ ຈຸດສຸມທີ 5 ຂົງເຂດທະນາຄານ:
ສືບຕໍ່ຕິດຕາມ ແລະ ຄຸ້ມຄອງອັດຕາແລກປ່ຽນຢ່າງໃກ້ຊິດ, ທັງຊຸກຍູ້ການປະຕິບັດນະໂຍບາຍສິນເຊື່ອໃຫ້ຜູ້ປະກອບການເກັບຊື້ຜະລິດຕະພັນກະສິກຳສົ່ງອອກໄປຕ່າງປະເທດ ເພື່ອນຳເງິນຕາຕ່າງປະເທດໃຫ້ຫຼາຍຂຶ້ນ; ສ້າງ ແລະ ປະເມີນຄືນບັນດາມາດຕະການ, ເຄື່ອງມື, ນະໂຍບາຍເງິນຕາຕ່າງໆ, ຖ້ານິຕິກຳໃດໄດ້ຮັບຜົນດີ ກໍສືບຕໍ່ປະຕິບັດ, ອັນໃດທີ່ບໍ່ສອດຄ່ອງ ກໍໃຫ້ປັບປຸງແກ້ໄຂ; ສືບຕໍ່ເລັ່ງການເກັບກູ້ໜີ້ສິນນຳບັນດາບໍລິສັດຈຳນວນໜຶ່ງ ທີ່ໄດ້ລັດຖະບານຊີ້ນຳຜ່ານມາແລ້ວ.
▶ ຈຸດສຸມທີ 6 ຂົງເຂດອຸດສາຫະກຳ ແລະ ການຄ້າ:
ຕິດຕາມເກັບກຳຂໍ້ມູນສະພາບການເໜັງຕີງລາຄາສິນຄ້າ ໃຫ້ຮູ້ໄດ້ສາເຫດການ ຂຶ້ນ – ລົງ ເພື່ອປະຕິບັດມາດຕະການໃນການຄຸ້ມຄອງລາຄາສິນຄ້າ ໃຫ້ທັນກັບສະພາບການ ເປັນຕົ້ນ ມາດຕະການຄັງແຮເຂົ້າແຊກແຊງລາຄາ ແລະ ຄັງແຮນ້ຳມັນ; ເລັ່ງສ້າງດຳລັດ ວ່າດ້ວຍກອງທຶນນ້ຳມັນເຊື້ອໄຟໃຫ້ສຳເລັດໄວ; ແກ້ໄຂສະພາບການຂາດແຄນນໍ້າມັນເຊື້ອໄຟ ດ້ວຍຫຼາຍວິທີ ແລະ ຫຼາຍມາດຕະການ.


▶ຈຸດສຸມທີ 7 ຂົງເຂດໂຍທາທິການ ແລະ ຂົນສົ່ງ:
ຄົ້ນຄວ້າການຫັນຄວາມຮັບຜິດຊອບໃຫ້ອົງການປົກຄອງທ້ອງຖິ່ນ ເປັນຜູ້ຄຸ້ມຄອງເສັ້ນທາງ ເພື່ອໃຫ້ແຂວງສາມາດບູລະນະຮັກສາ, ສ້ອມແປງ, ຟື້ນຟູທາງຫຼວງຈຸດທີ່ມີການເປ່ເພໃຫ້ມີ ຄວາມວ່ອງໄວ ແລະ ແກ້ໄຂການເດີນທາງໃຫ້ທັນສະພາບການ; ໃຫ້ສືບຕໍ່ອອກຄຳແນະນຳລະອຽດ ເພື່ອຈັດຕັ້ງປະຕິບັດການຊື້ – ຂາຍ ຫຼື ໂອນກຳມະສິດການນຳໃຊ້ພາຫະນະ ໂດຍຜ່ານລະບົບທະນາຄານໃຫ້ເປັນຮູບປະທຳໂດຍໄວ.
▶ຈຸດສຸມທີ 8 ຂົງເຂດກະສິກຳ ແລະ ປ່າໄມ້
ສືບຕໍ່ຊຸກຍູ້ອົງການປົກຄອງທ້ອງຖິ່ນ ສຸມໃສ່ຈັດຕັ້ງຜັນຂະຫຍາຍດຳລັດ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ, ປົກປັກຮັກສາ, ພັດທະນາ ແລະ ນໍາໃຊ້ປ່າໄມ້, ທີ່ດິນປ່າໄມ້, ຕ້ານ ແລະ ສະກັດກັ້ນການບຸກລຸກທໍາລາຍປ່າໄມ້, ທີ່ດິນປ່າໄມ້ ແລະ ໄຟໄໝ້ລາມປ່າ ໂດຍໃຫ້ມີການແຕ່ງຕັ້ງຄະນະຮັບຜິດຊອບໃນແຕ່ລະແຂວງ, ພ້ອມທັງເອົາໃຈໃສ່ຕິດຕາມກວດກາການບຸກລຸກທີ່ດິນປ່າໄມ້, ການເຝົ້າລະວັງ, ສະກັດກັ້ນ ແລະ ປ້ອງກັນການບຸກລຸກທຳລາຍປ່າ ແລະ ໄຟໄໝ້ລາມປ່າ; ສືບຕໍ່ປະເມີນສິນເຊື່ອກາກບອນປ່າໄມ້ໃນທົ່ວປະເທດ ໃຫ້ໄດ້ຕາມແຜນ ເພື່ອເປັນຂໍ້ມູນໃນການເຈລະຈາຮ່ວມມືໃນຫຼາຍຮູບແບບ ເພື່ອພັດທະນາໂຄງການຊື້ -ຂາຍສິນເຊື່ອກາກບອນປ່າໄມ້.

▶ຈຸດສຸມທີ 9 ຂົງເຂດຊັບພະຍາກອນທຳມະຊາດ ແລະ ສິ່ງແວດລ້ອມ:
ສືບຕໍ່ເລັ່ງຂຶ້ນທະບຽນອອກໃບຕາດິນໃຫ້ມີຕົວເລກຄືບໜ້າເພີ່ມຂຶ້ນ ເພື່ອກ້າວໄປເຖິງການບັນລຸຕົວເລກຄາດໝາຍ, ພ້ອມນີ້ກໍຕ້ອງໄດ້ປະສານສົມທົບກົມກ່ຽວຂ້ອງກັບອົງການປົກຄອງທ້ອງຖິ່ນກ່ຽວຂ້ອງ ເພື່ອສືບຕໍ່ຄົ້ນຄວ້າຫາວິທີແກ້ໄຂອຸປະສັກຂໍ້ຫຍຸ້ງຍາກຕ່າງໆໃນການອອກໃບຕາດິນຢູ່ແຕ່ລະທ້ອງຖິ່ນ.
▶ຈຸດສຸມທີ 10 ຂົງເຂດວຽກງານວັດທະນະທຳ – ສັງຄົມ:
ແມ່ນຮີບຮ້ອນຄົ້ນຄວ້າການເພີ່ມເງິນອຸດໜູນຄ່າຄອງຊີບໃຫ້ພະນັກງານ – ລັດຖະກອນ, ທະຫານ, ຕຳຫຼວດ ໃຫ້ສຳເລັດໄວ ຕາມທີ່ໄດ້ຊີ້ນຳໃນກອງປະຊຸມລັດຖະບານເປີດກວ້າງຜ່ານມາ; ສືບຕໍ່ຕິດຕາມ ແລະ ແກ້ໄຂບັນຫາແຮງງານລາວທີ່ອອກໄປເຮັດວຽກຢູ່ຕ່າງປະເທດແບບບໍ່ຖືກກົດໝາຍ ແລະ ເກັບກຳຕົວເລກສະຖິຕິໃຫ້ເປັນປົກກະຕິ; ສືບຕໍ່ຜັນຂະຫຍາຍ ແລະ ຈັດຕັ້ງປະຕິບັດມະຕິ ກ່ຽວກັບນະໂຍບາຍ ແລະ ມາດຕະການແກ້ໄຂບັນຫາການຂາດເຂີນຄູສອນ, ການປະລະການຮຽນ ແລະ ການສົ່ງເສີມເຂົ້າຮຽນວິຊາຊີບໃຫ້ເປັນຮູບປະທຳ ເພາະບັນຫານີ້ແມ່ນບັນຫາຮີບດ່ວນທີ່ຈະຕ້ອງໄດ້ເລັ່ງແກ້ໄຂ.