ຍອດເງິນລົງທຶນຈາກຕ່າງປະເທດ ຫຼັ່ງໄຫຼເຂົ້າຫວຽດນາມ ເພີ່ມຂຶ້ນ

23

ຍອດເງິນລົງທຶນຈາກຕ່າງປະເທດ (FDI) ລົງທະບຽນເຂົ້າ ຫວຽດນາມ ຮອດວັນທີ 20 ມັງກອນ ບັນລຸ 2,36 ຕື້ໂດລາສະຫະລັດ ເພີ່ມຂຶ້ນກວ່າ 40% ເມື່ອທຽບໃສ່ໄລຍະດຽວກັນຂອງປີກາຍ.

อาจเป็นรูปภาพของ ตึกระฟ้า

ຂ່າວvovworld ຂອງຫວຽດນາມ ລາຍງານວ່າ: ຕາມຕົວເລກຂອງກົມໃຫຍ່ສະຖິຕິ ປະກາດໃນວັນທີ 29 ມັງກອນ ຍອດຈຳນວນເງິນລົງທຶນຈາກຕ່າງປະເທດ (FDI) ລົງທະບຽນເຂົ້າຫວຽດນາມ ຮອດວັນທີ 20 ມັງກອນ ບັນລຸ 2,36 ຕື້ໂດລາສະຫະລັດ ເພີ່ມຂຶ້ນກວ່າ 40% ເມື່ອທຽບໃສ່ໄລຍະດຽວກັນຂອງປີກາຍ.

ໃນນັ້ນ, ຄາດວ່າ FDI ປະຕິບັດບັນລຸເກືອບ 1,5 ຕື້ໂດລາສະຫະລັດ ເພີ່ມຂຶ້ນ 9,6% ເມື່ອທຽບໃສ່ໄລຍະດຽວກັນຂອງປີກາຍ.
ກ່ຽວກັບຂົງເຂດການລົງທຶນ, ບັນດານັກລົງທຶນຕ່າງປະເທດໄດ້ລົງທຶນເຂົ້າ 15 ຂະແໜງໃນຍອດຈຳນວນ 21 ຂະແໜງເສດຖະກິດແຫ່ງຊາດ. ໃນນີ້ການດຳເນີນທຸລະກິດອະສັງຫະລິມະຊັບນຳໜ້າ ດ້ວຍຍອດເງິນລົງທຶນບັນລຸກວ່າ 1,27 ຕື້ໂດລາສະຫະລັດ ກວມເກືອບ 54% ຍອດເງິນລົງທຶນຈົດທະບຽນ ແລະ ທົບເກືອບ 2 ເທົ່າເມື່ອທຽບໃສ່ໄລຍະດຽວກັນຂອງປີກາຍ; ຖັດມາແມ່ນອຸດສາຫະກຳປຸງແຕ່ງ, ປະດິດສ້າງ, ວິທະຍາສາດເຕັກໂນໂລຊີ, ການຂາຍຍ່ອຍ…

ໂດຍມີ 39 ປະເທດ ແລະ ເຂດແຄວ້ນໄດ້ລົງທຶນຢູ່ ຫວຽດນາມ ໃນເດືອນ ມັງກອນ; ໃນນັ້ນ, ສິງກະໂປ ນຳໜ້າດ້ວຍຍອດເງິນລົງທຶນກວ່າ 1,4 ຕື້ໂດລາສະຫະລັດ.

ໃນເດືອນມັງກອນ ຍອດເງິນລົງທຶນສົ່ງອອກ ນຳເຂົ້າສິນຄ້າຂອງ ຫວຽດນາມ ບັນລຸເກືອບ 30 ຕື້ໂດລາສະຫະລັດ ເພີ່ມຂຶ້ນ 5,4% ເມື່ອທຽບໃສ່ໄລຍະດຽວກັນຂອງປີກາຍ, ໃນນັ້ນ ການສົ່ງອອກເພີ່ມຂຶ້ນກວ່າ 4%.