ຊົມເຊີຍ ແຫຼ່ງທ່ອງທ່ຽວຕາດເຍືອງ ໄດ້ຮັບລາງວັນການທ່ອງທ່ຽວແບບຍືນຍົງອາຊຽນ (ASEAN Sustainable Tourism Awards)

52

ນື່ອງໃນໂອກາດງານມະຫາກໍາການທ່ອງທ່ຽວອາຊຽນ ປະຈຳປີ 2024 ທີ່ຈັດຂຶ້ນໃນລະຫວ່າງວັນທີ 22-27 ມັງກອນ 2022 ຢູ່ທີ່ນະຄອນຫຼວງວຽງຈັນ, ສປປ ລາວ. ພິເສດໃນງານຄັ້ງນີ້ ໄດ້ມີການຈັດງານມອບ-ຮັບລາງວັນມາດຕະຖານການທ່ອງທ່ຽວອາຊຽນ ຂຶ້ນໃນວັນທີ 26 ມັງກອນ 2024 ລວມມີ 4 ປະເພດ. ໂດຍການເຂົ້າຮ່ວມຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາຜູ້ແທນລັດຖະມົນຕີທ່ອງທ່ຽວອາຊຽນ, ຜູ້ປະກອບການທັງໂຮງແຮມ, ຮ້ານອາຫານ ແລະ ແຫຼ່ງທ່ອງທ່ຽວເຂົ້າຮ່ວມ.
ໃນນີ້, ສປປ ລາວ ໄດ້ຮັບທັງ 4 ປະເພດລາງວັນມາດຕະຖານ ລວມມີ 20 ລາງວັນຄື: ມາດຕະຖານໂຮງ ແຮມຂຽວອາຊຽນ 5 ລາງວັນ, ມາດຕະຖານເມືອງທ່ອງທ່ຽວສະອາດອາຊຽນ 2 ລາງວັນ, ມາດຕະຖານສະຖານທີ່ຈັດງານອາຊຽນ, ປະເພດຫ້ອງປະຊຸມ 5 ລາງວັນ, ປະເພດສະຖານທີ່ຈັດງານວາງສະແດງ 1 ລາງວັນ, ປະເພດ ສະຖານທີ່ຈັດງານເທດສະການ 5 ລາງວັນ ແລະ ລາງວັນການທ່ອງທ່ຽວແບບຍືນຍົງອາຊຽນ 2 ລາງວັນ (ຜະລິດຕະ ພັນການທ່ອງທ່ຽວເຂດຕົວເມືອງ 01 ລາງວັນ ແລະ ຜະລິດຕະພັນການທ່ອງທ່ຽວເຂດຊົນນະບົດ 01 ລາງວັນ).

ສະເພາະແຫ່ງທ່ອງທ່ຽວນໍ້າຕົກຕາດເຍືອງ ແມ່ນໄດ້ຮັບລາງວັນການທ່ອງທ່ຽວແບບຍືນຍົງອາຊຽນ (ASEAN Sustainable Tourism Awards) ລາງວັນດັ່ງກ່າວແມ່ນການລິເລີ່ມຂອງ ສປປ ລາວ ໃນໄລຍະ ສປປ ລາວ ເປັນປະທານອາຊຽນໃນປີ 2016. ສໍາລັບປີ 2024 ແມ່ນມອບລາງວັນເປັນຄັ້ງທີ 4 ເຊິ່ງ​ມີຈຸດ​ປະ​ສົງ​ ເພື່ອ​ເປັນການ​ສ້າງ​ແຮງ​ຈູງ​ໃຈ​ໃຫ້​ແກ່​ຈຸດ​ໝາຍ​ປາຍ​ທາງ​ການ​ທ່ອງ​ທ່ຽວ​ອາ​ຊຽນ ແລະ ພາກ​ສ່ວນ​ທີ່​ກ່ຽວ​ຂ້ອງ; ເພື່ອຮ່ວມ​ກັນ​ພັດ​ທະ​ນາຜະລິດຕະພັນການ​ທ່ອງ​ທ່ຽວ ແລະ ເພື່ອ​ຫລຸດ​ຜ່ອນ​ບັນ​ຫາ​ດ້ານ​ສິ່ງ​ແວດ​ລ້ອມ, ວັດ​ທະ​ນະ​ທໍາ-ສັງ​ຄົມ ແລະ ເສດ​ຖະ​ກິດ ທີ່​ເກີດ​ຈາ​ກ​ຂະ​ຫຍາຍ​ຕົວ​ຂອງ​ການ​ທ່ອງ​ທ່ຽວຢ່າງວ່ອງ​ໄວ. ຂະ​ນະ​ດຽວ​ກັນ​ ກໍ່ໃຫ້​ຄໍາແນະນຳ ແລະ ສ້າງແຮງ​ຈູງ​ໃຈ​ທີ່​ເປັນ​ປະ​ໂຫຍດ​ໃຫ້​ແກ່​ພາກ​ລັດ ແລະ ພາກ​ທຸ​ລະ​ກິດ ເພື່ອ​ປັບ​​ປຸງ​ຜະ​ລິດ​ຕະ​ພັນ ແລະ ການ​ບໍ​ລິ​ການ​​ຂອງຕົນ​ໃຫ້​​ໄດ້​ຕາມ​ມາດ​ຕະ​ຖານອາຊຽນ.

ສໍາລັບຫົວຂໍ້ຂອງລາງວັນການທ່ອງທ່ຽວແບບຍືນຍົງອາຊຽນ ປີ 2024 ແມ່ນ “ການສົ່ງເສີມອາຫານເພື່ອການທ່ອງທ່ຽວ” ໂດຍເນັ້ນໃສ່ການໂຄສະນາສົ່ງເສີມລາຍການ ອາຫານຂອງແຕ່ລະປະເທດສະມາຊິກອາຊຽນ ເພື່ອສົ່ງເສີມໃຫ້ກາຍເປັນຜະລິດຕະພັນການທ່ອງທ່ຽວໜຶ່ງ ທີ່ມີສີສັນຫຼາກຫຼາຍ ໂດດເດັ່ນ ໂດຍອີງຕາມເອກະລັກສະເພາະຂອງແຕ່ລະທ້ອງຖິ່ນຂອງແຕ່ລະປະເທດ. ຢູ່ໃນອາຊຽນ ມີຜະລິດຕະພັນການທ່ອງທ່ຽວ ທີ່ໄດ້ຮັບລາງວັນທັງໝົດ 16 ລາງວັນ ລວມມີຜະລິດຕະພັນການທ່ອງທ່ຽວເຂດຕົວເມືອງ ແລະ ຜະລິດຕະພັນການທ່ອງທ່ຽວເຂດຊົນນະບົດ.
ສຳລັບ ສປປ ລາວ ໄດ້ຮັບ 2 ລາງວັນ ຄື: ຮ້ານອາຫານຄົວລາວ (ຜະລິດຕະພັນການທ່ອງທ່ຽວເຂດຕົວເມືອງ) ນະຄອນຫຼວງວຽງຈັນ; ຮ້ານອາຫານຕາດເຍືອງ (ຜະລິດຕະພັນການທ່ອງທ່ຽວເຂດຊົນນະບົດ) ແຂວງຈໍາປາສັກ.
ໂດຍແມ່ນທ່ານ ນາງ ສອນທິດາ ອຸນາພົມ ປະທານບໍລິສັດ ພັດທະນາແຫຼ່ງທ່ອງທ່ຽວນໍ້າຕົກຕາດເຍືອງ ເມືອງປາກຊ່ອງ ແຂວງຈຳປາສັກ ຂຶ້ນຮັບລາງວັນ ຈາກທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທັງເປັນປະທານກອງປະຊຸມລັດຖະມົນຕີທ່ອງທ່ຽວອາຊຽນ.

ເຊິ່ງຜ່ານມາທ່ອງທ່ຽວນໍ້າຕົກຕາດເຍືອງ ເມືອງປາກຊ່ອງ ແຂວງຈຳປາສັກ ໄດ້ຮັບມອບລາງວັນມາດຕະຖານການທ່ອງທ່ຽວອາຊຽນ ປີ 2024 ຜ່ານມາແຫລ່ງທ່ອງທ່ຽວນໍ້າຕົກຕາດເຍືອງ ກໍໄດ້ຮັບລາງວັນສຳຄັນຕ່າງໆ ເປັນຕົ້ນ ໃນປີ 2019 ໄດ້ຮັບລາງວັນຫ້ອງນໍ້າສະອາດ, ສາທາລະນະສະອາດອາຊຽນ, ປີ 2020 ໄດ້ຮັບລາງວັນການທ່ອງທ່ຽວ ປະຊາຊົນມີສ່ວນຮ່ວມ, ປີ 2022 ໄດ້ຮັບລາງວັນການທ່ອງທ່ຽວປະຊາ ຊົນມີສ່ວນຮ່ວມ ແບບຍືນຍົງອາຊຽນ ແລະ ໃນປີ 2024 ໄດ້ຮັບລາງວັນການທ່ອງທ່ຽວ ແບບປະຊາ ຊົນມີສ່ວນຮ່ວມ ແບບຍືນຍົງອາຊຽນ ອີກຄັ້ງ ເຊິ່ງການໄດ້ຮັບລາງວັນດັ່ງກ່າວໃນປີນີ້ ຖືເປັນໂອກາດທີ່ດີໃນການພັດທະນາການທ່ອງທ່ຽວ ຢູ່ໃນ ສປປ ລາວ ໂດຍສະເພາະຢູ່ພາກໃຕ້ ກໍຄື ແຫລ່ງທ່ອງທ່ຽວນໍ້າຕົກຕາດເຍືອງຂອງພວກເຮົາ
ຂ່າວ-ຮູບ: ຄໍານ້ອຍ