ກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ+3 ຄັ້ງທີ 44th ເນັ້ນຂະຫຍາຍດ້ານຕະຫຼາດ

27

ໃນວັນທີ 24 ມັງກອນ 2024 ໄດ້ມີກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ+3 ຄັ້ງທີ 44thຂຶ້ນ, ທີ່ໂຮງແຮມແລນມາກ, ໂດຍການເປັນປະທານຂອງທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ເປັນປະທານຮ່ວມຂອງທ່ານ ດາໂຕະ ໂຣສລານ ທານ ສຣິ ອັບດູນ ຣາມານ, ຫົວຫນ້າຫ້ອງການ ( Secretary General of the Ministry of Tourism, Arts and Culture) ,ປະເທດ ມາເລເຊຍ, ພ້ອມມີທ່ານ ຈາງວຸກ ຈັງ (Changwook jung) ຫົວໜ້າຜູ້ບໍລິຫານອົງການທ່ອງທ່ຽວ ສ ເກົາຫຼີ, ທ່ານ ນາງ ຫຼີ້ຢີ່ຜິງ ຫົວໜ້າສູນວັດທະນະທຳຈີນ ປະຈຳ ສປປ ລາວ, ທ່ານ ຊຸໂຍຊິ ມູລາກະມິ (Tsuyoshi MURAKAMI) ຕາງໜ້າກະຊວງທີ່ດິນ, ພື້ນຖານໂຄງລ່າງ, ການຂົນສົ່ງ ແລະ ທ່ອງທ່ຽວ ປະເທດຍີ່ປຸ່ນ ພ້ອມດ້ວຍກອງເລຂາ ແລະ ພາກສ່ວນກ່ຽວຂ້ອງເຂົ້າຮ່ວມ.

No description available.
ກອງປະຊຸມ ເຈົ້າໜ້າທີ່ອາວຸໂສທ່ອງທ່ຽວອາຊຽນ+3 ຄັ້ງທີ 44th (44th Meeting of ASEAN Plus Three NOTs) ແມ່ນປະກອບມີຕາງໜ້າຈາກ 10 ປະເທດອາຊຽນເປັນຕົ້ນ: ລາວ, ໄທ, ມຽນມາ, ກຳປູເຈຍ, ຟີລິບປິນ, ຫວຽດນາມ, ມາເລເຊຍ, ບຣູໄນ, ສິງກະໂປ, ອິນໂດເນເຊຍ ແລະ ສ່ວນອີກ 3 ປະເທດທີ່ເປັນຄູ່ຮ່ວມແມ່ນມີ: ສປ ຈີນ, ຍີ່ປຸ່ນ ແລະ ສ.ເກົາຫຼີ.
ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ປະທານກອງປະຊຸມ ໃຫ້ສຳພາດວ່າ: ກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ+3 ຄັ້ງທີ 44th (44th Meeting of ASEAN Plus Three NOTs) ກອງປະຊຸມມື້ນີ້ຈຸດປະສົງເພື່ອທົບທວນຄືນການຈັດຕັ້ງປະຕິບັດບັນດາແຜນງານ 2023-2024 ເຊິ່ງເຫັນວ່າບັນດາກິດຈະກຳທັງໝົດແມ່ນມີຄວາມຄືບໜ້າ ໂດຍສະເພາະອາຊຽນຈະເສີມຂະຫຍາຍການຕະຫຼາດທ່ອງທ່ຽວໃນ 3 ປະເທດເຊັ່ນ: ຈີນ, ສ.ເກົາຫຼີ, ຍີ່ປຸ່ນ ເປັນຕະຫຼາດສຳຄັນຂອງອາຊຽນ, ພາຍຫຼັງເປີດປະເທດຂອງບັນດາປະເທດອາຊຽນເປັນວ່ານັກທ່ອງທ່ຽວບັນດາປະເທດອາຊຽນໄດ້ເຂົ້າໄປທ່ຽວ 3 ປະເທດດັ່ງກ່າວຫຼາຍຂຶ້ນ ຂະນະດຽວກັນ ນັກທ່ອງທ່ຽວຈາກ 3 ປະເທດນີ້ກໍໄດ້ມາທ່ຽວບັນດາປະເທດອາຊຽນເປັນຈຳນວນຫຼາຍ, ເຮັດໃຫ້ກອງປະຊຸມເຮົາໄດ້ຮັບຜົນສຳເລັດເປັນຢ່າງດີ.

No description available.

ນອກນີ້ກອງປະຊຸມຍັງໄດ້ປັບປຸງບັນດາກິດຈະກຳຕ່າງໆ ໃນປີ 2024 ທັງໃນອາຊຽນ ແລະ ອີກ 3 ປະເທດນີ້ ໃຫ້ນັກທ່ອງທ່ຽວພາຍໃນ 13 ປະເທດນີ້ ມາທ່ຽວປະເທດເຊິ່ງກັນ ແລະ ກັນຫຼາຍຂຶ້ນ, ປີ 2024 ນີ້ເປັນປີສຳຄັນສຳລັບ ສປປ ລາວ ທັງເປັນປະທານຈັດກອງປະຊຸມສຸດຍອດອາຊຽນ, ເຊິ່ງລັດຖະບານກໍປະກາດເປັນປີທ່ອງທ່ຽວ ພ້ອມນີ້ຍັງໄດ້ເປັນເຈົ້າພາບຈັດກອງປະຊຸມທ່ອງທ່ຽວອາຊຽນ ຖືວ່າເປັນເຫດການສຳຄັນໃນການໂຄສະນາທ່ອງທ່ຽວຂອງ ສປປ ລາວ ໃຫ້ເປັນທີ່ຮູ້ຈັກກັນຫຼາຍຂຶ້ນ, ກະຊວງ ຖວທ ກໍໄດ້ຮ່ວມກັບທ້ອງຖິ່ນດຳເນີນກິດຈະກຳພາຍໃນ ແນ່ໃສ່ໃຫ້ການທ່ອງທ່ຽວໃຫ້ມີຄວາມຫຼາກຫຼາຍ ໂດຍແບ່ງເປັນ 14 ກິດຈະກຳລະດັບຊາດ, 65 ລາຍການລະດັບທ້ອງຖິ່ນ ພ້ອມສົມທົບກັບບໍລິສັດທ່ອງທ່ຽວຈັດການຂາຍຮ່ວມກັບບໍລິສັດພາບນອກ ແລະ ສົມທົບກັບບັນດາສື່ພາຍໃນ ແລະ ຕ່າງປະທດ ຈັດທິບທ່ອງທ່ຽວ ເພື່ອໃຫ້ມີການໂຄສະນາແຫຼ່ງທ່ອງທ່ຽວໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ຮັບຮູ້ກ່ຽວກັບການທ່ອງທ່ຽວ ສປປ ລາວ ຫຼາຍຂຶ້ນ.

No description available.