ໄຂກອງປະຊຸມ ເຈົ້າໜ້າທີ່ອາວຸໂສທ່ອງທ່ຽວອາຊຽນ

32

 

ກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ ຄັ້ງທີ 59 ໄຂຂຶ້ນໃນວັນທີ 23 ມັງກອນ 2024 ທີ່ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ, ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ; ທັງຫົວໜ້າເຈົ້າໜ້າທີ່ອາວຸໂສທ່ອງທ່ຽວ ສປປ ລາວ, ທ່ານ ດາໂຕະ ໂຣສລານ ຕານ ສຣິ ອັບດູນ ຣາມານ ຫົວຫນ້າຫ້ອງການກະຊວງທ່ອງທ່ຽວ, ສິລະປະ ແລະ ວັດທະນະທຳ ປະເທດມາເລເຊຍ; ມີບັນດາຫົວໜ້າເຈົ້າໜ້າທີ່ອາວຸໂສທ່ອງທ່ຽວ ພ້ອມດ້ວຍຄະນະ ທີ່ມາກຈາກບັນດາປະເທດ ສະມາຊິກ ອາຊຽນ ແລະ ຄະນະຜູ້ ຈາກປະເທດ ຕີມໍເລສເຕ ໃນນາມຜູ້ສັງເກດການ ເຂົ້າຮ່ວມ.


ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ ກ່າວເປີດກອງປະຊຸມ ວ່າ: ຂ້າພະເຈົ້າ ຮູ້ສຶກເປັນກຽດ ແລະ ຍິນດີເປັນຢ່າງຍິ່ງ ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ໄດ້ຮັບກຽດເປັນປະທານກອງປະຊຸມ ເຈົ້າໜ້າທີ່ອາວຸໂສທ່ອງທ່ຽວອາຊຽນ ຄັ້ງທີ 59 ໃນມື້ນີ້ ໃນໂອກາດ ທີ່ສປປ ລາວ ເປັນເຈົ້າພາບຈັດກອງປະະຊຸມ ແລະ ງານມະຫະກຳທ່ອງທ່ຽວ ອາຊຽນ 2024, ພາຍໃຕ້ຫົວຂໍ້ “ການທ່ອງທ່ຽວທີ່ມີຄຸນນະພາບ ແລະ ມີຄວາມຮັບຜິດຊອບ ເພື່ອຄວາມຍືນຍົງຂອງອາຊຽນ ຫຼື Quality and Responsible Tourism – Sustaining ASEAN Future”.

ທ່ານຍັງເນັ້ນຕື່ມວ່າ: ອາຊຽນ ໄດ້ຕີລາຄາສູງຕໍ່ການປະຕິບັດບັນດາໂຄງການ ແລະ ກິດຈະກຳຕ່າງໆ ຂອງແຜນຍຸດທະສາດການທ່ອງທ່ຽວອາຊຽນ 2016-2025 ທີ່ໄດ້ປະກອບສ່ວນສຳຄັນເຂົ້າໃນການພັດທະນາ ຂະແໜງການທ່ອງທ່ຽວອາຊຽນໃຫ້ກວ້າງຂວາງຂຶ້ນ ໂດຍສະເພາະແມ່ນໄລຍະທີ່ມີການເປີດປະເທດຄືນໃໝ່ ພາຍຫຼັງ ການແຜ່ລະບາດຂອງພະຍາດໂຄວິດ-19.
ກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນ ຄັ້ງທີ 59 ຈະໄດ້ປຶກສາຫາລື ແລະ ລາຍງານຄວາມຄືບໜ້າ ກ່ຽວກັບການຈັດຕັ້ງປະຕິບັດແຜນຍຸດທະສາດການທ່ອງທ່ຽວອາຊຽນ 2016-2025; ບັນດາຂໍ້ຕົກລົງຕ່າງໆກ່ຽວກັບການທ່ອງທ່ຽວຂອງກອງປະຊຸມສຸດຍອດອາຊຽນຄັ້ງທີ 42 ແລະ 43; ກອງປະຊຸມຍັງຈະໄດ້ຮັບຟັງການລາຍງານຜົນຂອງກອງປະຊຸມຄະນະກຳມະການທ່ອງທ່ຽວອາຊຽນ ແລະ ບັນຫາອື່ນໆທີ່ກ່ຽວຂ້ອງກັບບັນດາຄູ່ຮ່ວມມືເຈລະຈາສາກົນ.


ນອກນີ້, ກອງປະຊຸມກະກຽມ ແລະ ເອກະພາບກັນຕໍ່ກັບວາລະ ແລະ ຖະແຫຼງການຮ່ວມຂອງ ກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 27 ແລະ ກອງປະຊຸມປິ່ມອ້ອມ ກັບບັນດາຄູ່ຮ່ວມເຈລະຈາ.