ຄະນະອຳນາດການປົກຄອງ ບ້ານລາດຄວາຍ ເມືອງໄຊທານີ, ນະຄອນຫລວງວຽງຈັນ ໂດຍສະເພາະເຜົ່າກຶມມຸ ໄດ້ຈັດງານບຸນເກຣິ (ບຸນປົດປີເກົ່າຕ້ອນຮັບປີໃຫມ່) ໃນວັນທີ 20 ມັງກອນ 2024 ພາຍຫລັງສຳເລັດການເກັບກູ້ຜົນຜະລິດເຂົ້າ, ເຜືອກມັນ ແລະ ອື່ນໆ ໂດຍມີການເຮັດພາເຂົ້າ ຖວາຍແກ່ບັນພະບູລຸດຂອງໃຜລາວ ເພື່ອຂໍພອນໃຫ້ລູກຫລານຢູ່ເຢັນເປັນສຸກ, ພ້ອມກັນສ້າງສາພັດທະນາ ໃຫ້ຄອບຄົວຈະເລີນຮັ່ງມີ. ພ້ອມນັ້ນ ຍັງເປັນການປະຕິບັດຮີດຄອງປະເພນີ ອັນດີງາມທີ່ມີມາແຕ່ດຶກດຳບັນ, ເປັນການສ້າງຄວາມສາມັກຄີ ລະຫວ່າງເຜົ່າ ກໍຄືປະຊາຊົນບ້ານລລາດຄວາຍ ໃຫ້ແໜ້ນແຟ້ນ ຂຶ້ນເລື້ອຍ
ງານບຸນປະເພນີ ຄັງນີ້ ໂດຍມີຄະນະພັກ, ຄະນະນຳ ຈາກແນວລາວສ້າງຊາດ ນະຄອນຫລວງວຽງຈັນ, ຄະນະພັກ ຄະນະນຳ ອົງການປົກຄອງເມືອງໄຊທານີ, ພ້ອມດ້ວຍເຖົ້າແກ່ແນວໂຮມ, ແຂກຖືກເຊີນ ແລະ ປະຊາຊົນບັນດາເຜົ່າ ເຂົ້າຮ່ວມຢ່າງຫລວງຫລາຍ.
ໃນໂອກາດດັ່ງກ່າວ, ຕົວແທນເຜົ່າກຶມມຸ ບ້ານລາດຄວາຍ ໄດ້ຍົກໃຫ້ເຫັນປະຫວັດຄວາມເປັນມາ ຂອງບຸນເກຣິ ເຊິ່ງມີຄວາມໝາຍ ສຳເລັດການເກັບກູ້ຜົນຜະລິດຕ່າງໆ ໃນລະດູຝົນ (ລົກ, ໂຄ່ນ, ໄງ້) ເຜືອກມັນຂຶ້ນເລົ້າຂຶ້ນເຍຍນັ້ນເອງ. ແນວໃດກໍຕາມ ແຕ່ດຶກດຳບັນ ກ່ອນຈະມີເຂົ້າມາປຸງແຕ່ງອາຫານ, ບັນພະບູລຸດຂອງເຜົ່າກຶມມຸ ໄດ້ເອົາເຜືອກມັນ ຊະນິດຕ່າງໆ ມາປຸງແຕ່ງເປັນອາຫານຫລັກ ແລະ ສັດສາວ່າສິງ, ລວມທັງເຄື່ອງປ່າຂອງດົງ ເປັນອາຫານສຳຮອງປະຈຳວັນ ຈົນຜ່ານມາຫລາຍສັດຕະວັດ ຈຶ່ງນຳເອົາເຂົ້າມາປຸງເປັນອາຫານ ເຫັນວ່າມີລົດຊາດແຊບກວ່າ ເຜືອກມັນ ຈຶ່ງນຳເອົາເຂົ້າປືອກມາປູກ ແລະ ປຸງແຕ່ງເປັນອາຫານຫລັກ ແຕ່ກໍປະສະຈາກບໍ່ໄດ້ ການປູກເຜືອກມັນ ເປັນອາຫານສຳຮອງ ໃນຍາມເກີດໄພພິບັດທາງທຳມະຊາດ. ຍ້ອນແນວນັ້ນ ຈຶ່ງຂາດເຜືອກມັນບໍ່ໄດ້, ທັງເປັນການສະແດງຄວາມຮູ້ບຸນຄຸນຂອງບັນພະບູລຸດ ທີ່ຊຸບລ້ຽງ ເຜົ່າກຶມມຸ ມາແຕ່ດຶກດຳບັນ ແລະ ເປັນການຮັກສາຮີດຄອງອັນເກົ່າແກ່ ຂອງເຜົ່າກຶມມຸ ໄວ້ໃຫ້ຍືນຍົງຕະຫລອດໄປ.
ໃນງານບຸນ ຄັ້ງນີ້ ຍັງມີການແຫ່ເຜືອກມັນ, ເຫລົ້າໄຫ ໄກ່ໂຕ, ຜູກແຂນບາສີ ເພື່ອໃຫ້ຜູ້ເຂົ້າຮ່ວມມີຄວາມສຸກ ຄວາມຈະເລີນ, ມີພາລະນາໄມສົມບູນ, ມີສຸຂະພາບແຂງແຮງ ແລະ ລ້ຳລວຍເງິນທອງ, ສິ່ງສຳຄັນໃຫ້ມີກຳລັງວັງຊາ ສຸມໃສ່ປູກພືດລະດູການຕໍ່ໄປ ໃຫ້ໄດ້ຮັບໝາກຜົນດີກວ່າເກົ່າ.
ທີ່ມາ: ຂປລ
