ໂຮມຊຸມນຸມ ສະຫຼອງວັນສ້າງຕັ້ງ ກອງທັບປະຊາຊົນລາວ ຄົບຮອບ 75 ປີ

11

 

ພິທີໂຮມຊຸມນຸມ ສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20/1/1949-20/1/2024) ມີຂຶ້ນໃນວັນ 19 ມັງກອນ 2024 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ.
ໂດຍການເຂົ້າຮ່ວມຂອງ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປ ລາວ, ມີບັນດາ ການນໍາ, ອະດີດການນໍາ ພັກ-ລັດ, ພະນັກງານ-ນັກຮົບ ໃນທົ່ວກອງທັບ ແລະ ພາກສ່ວນຕ່າງໆເຂົ້າຮ່ວມ.
ໃນພິທີໄດ້ຮັບຊົມວິດີໂອມູນເຊື້ອ ຂອງກອງທັບປະຊາຊົນລາວ, ການສະແດງສິລະປະ, ຮ້ອງເພງ ແລະ ລະຄອນສັ້ນ ທີ່ສະແດງເຖິງການກໍາເນີດເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ ຕະຫຼອດໄລຍະ 75 ປີ.

ໃນໂອກາດທີ່ມີຄວາມໝາຍສໍາຄັນ ທ່ານທອງລຸນ ສີສຸລິດ ໄດ້ກ່າວສູນທອນພົດ ວ່າ: ວັນທີ 20 ມັງກອນ 1949 ແມ່ນມື້ທີ່ມີຄວາມໝາຍສໍາຄັນຍິ່ງວັນໜຶ່ງ ໃນປະຫວັດສາດຂອງຊາດ ກໍຄືຂອງການປະຕິວັດລາວ, ເປັນມື້ປະກາດ ໃຫ້ປະຊາຊົນລາວບັນດາເຜົ່າ ແລະ ປະຊາຊາດ ໃນໂລກ ໄດ້ຮັບຮູ້ວ່າ ກໍາລັງປະກອບອາວຸດ ຂອງຂະບວນຮັກຊາດລາວ ຂອງການປະຕິວັດລາວ ໄດ້ຮັບ ການສ້າງຕັ້ງຂຶ້ນຢ່າງເປັນທາງການ ທີ່ຖໍ້າແມ້ ເຂດພຽງສາ ຕາແສງລາວຮຸ່ງ ເມືອງຊຽງຄໍ້ ແຂວງ ຫົວພັນ ໂດຍມີຊື່ວ່າ: ກອງຮ້ອຍ “ກອງລາດຊະວົງ” ແລະ ຕໍ່ມາ ປະທານ ໄກສອນ ພົມວິຫານ ກໍໄດ້ປະກາດສ້າງຕັ້ງກອງທັບລາວອິດສະຫຼະຂຶ້ນພ້ອມໆກັນ, ເຊິ່ງເປັນຕົ້ນກໍາເນີດ ຂອງກອງທັບປົດປ່ອຍ ປະຊາຊົນລາວ ກໍ່ຄືກອງທັບປະຊາຊົນລາວໃນປັດຈຸບັນ.

ການກໍາເນີດ ກໍາລັງປະກອບອາວຸດເຮົາ ກ່ອນນີ້ 75 ປີນັ້ນ ແມ່ນເຫດການສໍາຄັນປະຫວັດສາດ ຂອງຊາດລາວຍຸກໃຫມ່, ທັງເປັນບາດລ້ຽວທີ່ມີ ຄວາມໝາຍສໍາຄັນ ສໍາລັບການເຕີບໃຫຍ່ເຂັ້ມແຂງ ແລະ ຕັດສິນໄຊຊະນະ ຂອງຂະບວນການປະຕິວັດຢູ່ປະເທດເຮົາ ພາຍໃຕ້ການຊີ້ນໍາ-ນໍາພາ ຮອບດ້ານ, ເດັດຂາດ , ໂດຍກົງ ຂອງພັກ.
ການກໍ່ຕັ້ງກອງທັບ ໃນວັນທີ 20 ມັງກອນ 1949 ນັ້ນ ເປັນໝັດໄຟນ້ອຍໆໜຶ່ງທີ່ເປັນຈຸດເລີ່ມຂອງທວນໄຟ ທີ່ມີລັດສະໝີເປັ່ງປະກາຍອອກ ແລະ ກາຍເປັນທວນໄຟ ທີ່ບໍ່ສະເພາະແຕ່ບໍ່ມີເວລາດັບມອດເທົ່ານັ້ນ ແຕ່ໄດ້ແຜ່ກະຈາຍເປັນວົງກວ້າງໃຫຍ່ໄພສານ ຈົນສາມາດດັບມອດຄວາມໂຫດຮ້າຍປ່າເຖື່ອນທີ່ມີຢູ່ໃນປະເທດຊາດ ໄດ້ຢ່າງສິ້ນເຊີງ.


ຖ້າທົບທວນຄືນ ເສັ້ນທາງກ້າວເດີນຂອງກອງທັບ ອາດເວົ້າໄດ້ວ່າ: ໃນເບື້ອງຕົ້ນຂອງການສ້າງຕັ້ງກອງທັບ ໄດ້ເລີ່ມຈາກສອງຝາມືເປົ່າ, ກຳລັງພົນໜ້ອຍຢູ່ແລ້ວ, ການປະກອບອາວຸດຍຸດໂທປະກອນກໍເກືອບບໍ່ມີ, ຖ້າມີກໍມີແບບປະຖົມປະຖານ ແລະ ຂາດເຂີນທີ່ສຸດ, ການຕໍ່ສູ້ຈຶ່ງໄດ້ເລີ່ມຈາກການໃຊ້ຮູບການເຄື່ອນໄຫວແບບກອງໂຄສະນາປະກອບອາວຸດ ດ້ວຍຍຸດທະການລັດຕີ, ຫລອນຕີ ຍາດເອົາອາວຸດຂອງສັດຕູ ຈົນມີນິຍາຍເລື່ອງສັ້ນ ທີ່ສ່ອງແສງເຖິງເຫດການຄວາມເປັນຈິງ ເຫດການໜຶ່ງໃນຫຼາຍເຫດການ ຂອງວິທີທາງຕໍ່ສູ້ຂອງນັກຮົບໃນເວລານັ້ນ ເຊິ່ງຂຽນໂດຍ ສະຫາຍ ຄໍາມາ ພົມກອງ ທີ່ມີຊື່ວ່າ: “ໃຊ້ເຂົ້າຕົ້ມ ຈີ້ເອົາປືນ”.

ເຖິງວ່າຈຸດເລີ່ມຈະອ່ອນນ້ອຍປານໃດກໍຕາມ, ແຕ່ວ່າການປະຕິບັດພາລະກິດຂອງກອງທັບຊໍ້າພັດໄດ້ຮັບການສະໜັບສະໜູນ, ອຸ້ມຊູຊ່ວຍເຫລືອ ແລະ ເຂົ້າຮ່ວມ ນັບມື້ນັບກວ້າງຂວາງຈາກມະຫາຊົນ ຈຶ່ງເຮັດໃຫ້ກຳລັງປະກອບອາວຸດ ເຕີບໃຫຍ່ເຂັ້ມແຂງຂຶ້ນຢ່າງໄວວາ ແລະ ເປັນແມ່ແຮງປຸກລະດົມຊຸກຍູ້ຂະບວນການຕໍ່ສູ້ຂອງປະຊາຊົນ ໃຫ້ເຕີບໃຫຍ່ຂະຫຍາຍຕົວເປັນກ້າວໆມາ. ກອງທັບ ຈຶ່ງສາມາດເປັນກອງກຳລັງຫລັກແຫລ່ງແກ່ນ ສານຂອງກຳລັງການເມືອງປະຕິວັດ; ເປັນກອງກຳລັງທີ່ມີອຸດົມການ, ມີມານະຈິດປະຕິວັດອັນເດັດດ່ຽວ ແລະ ມີເປົ້າ ໝາຍສູ້ຮົບທີ່ສູງສົ່ງຈະແຈ້ງ, ຍາມໃດກໍຕິດແທດກັບຮາກຖານປະຊາຊົນ, ຍຶດໝັ້ນ ແລະ ເສີມຂະຫຍາຍທາດແທ້ປະ ຊາຊົນ, ທັງເຮັດໜ້າທີ່ຕີສັດຕູ, ທັງສ້າງຄວາມສະໜິດຕິດພັນກັບປະຊາຊົນ, ໂຄສະນາປຸກລະດົມຂົນຂວາຍປະຊາຊົນ ກໍ່ສ້າງຮາກຖານການປະຕິວັດ, ເປີດກວ້າງຖານທີ່ໝັ້ນຂອງການປະຕິວັດ ນັບມື້ນັບກວ້າງຂວາງອອກ.


ກອງທັບເຮົາ ມີມູນເຊື້ອໃນການເພີ່ມພູນຜະລິດຜົນ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ. ຈາກນັ້ນ, ຈຶ່ງໄດ້ຮັບການປັບປຸງ ແລະ ພັດທະນາ ໃຫ້ເຕີບໃຫຍ່, ເຂັ້ມແຂງຂຶ້ນ ທັງທາງດ້ານຈຳນວນ ແລະ ຄຸນນະພາບ, ກາຍເປັນກອງທັບທີ່ມີຫລາຍກົມກອງ ເຫລົ່າຮົບ ທີ່ມີຄວາມສາມາດ ແລະ ມີຄວາມຊໍານິຊຳນານ ດ້ານສິລະປະຍຸດ-ຍຸດທະວິທີ ແລະ ການນໍາໃຊ້ອາວຸດນາໆຊະນິດ ທີ່ທັນສະໄໝຂຶ້ນ, ຈຶ່ງເປັນກຳລັງແຮງສູ້ຮົບ ທີ່ຍິ່ງຕີກໍ່ຍິ່ງໄດ້ໄຊຊະນະ, ຍິ່ງຕີກໍ່ຍິງເຕີບໃຫຍ່, ຍິ່ງຕີກໍ່ຍິ່ງເຂັ້ມແຂງ-ອົງອາດກ້າແກ່ນຂຶ້ນຢ່າງບໍ່ຢຸດຢັ້ງ.
ຜ່ານຂະບວນວິວັດອັນຍາວນານ ແລະ ການທົດສອບອັນຂ້ຽວຂາດ, ຈາກພຶດຕິກໍາຕົວຈິງ ແຫ່ງການເຄື່ອນໄຫວກໍ່ສ້າງ, ປັບປຸງກໍາລັງ ໃນຕະຫຼອດໄລຍະ 75 ປີ ຜ່ານມານີ້, ກອງທັບປະຊາຊົນລາວ ໄດ້ ຮັບການຊຸບຫຼໍ່ໃຫ້ມີຄວາມກ້າແກ່ນ ແລະ ເຕີບ ໃຫຍ່ຂະຫຍາຍຕົວຢ່າງບໍ່ຢຸດຢັ້ງ.

ພາຍໃຕ້ການນໍາພາ ເດັດຂາດ, ໂດຍກົງ ແລະ ຮອບດ້ານ ຂອງພັກເຮົາ ຕໍ່ກໍາລັງປະກອບອາວຸດປະຊາຊົນ, ກໍາລັງແຮງຂອງ ຊາດວິລະຊົນໜຶ່ງທີ່ກ້າແກ່ນ, ບໍ່ເຄີຍຍອມຈໍານົນ, ພວກເຮົາ ເຊື່ອໝັ້ນຢ່າງໜັກແໜ້ນວ່າ ພັກ ແລະ ລັດ ເຮົາ ຈະເຮັດທຸກສິ່ງຢ່າງ ເພື່ອນໍາພາປະເທດຊາດຜ່ານຜ່າ ແລະ ແກ້ໄຂຄວາມຫຍຸ້ງຍາກ, ຄວາມທ້າທາຍ ດ້ານຕ່າງໆ ເພື່ອຜ່ານພົ້ນໄປໃຫ້ໄດ້,ເລັ່ງໃສ່ແກ້ໄຂຄວາມທຸກຍາກຫຼ້າຫຼັງ ດ້ອຍພັດທະນາ ເພື່ອກ້າວຂຶ້ນ ຕາມຈຸດໝາຍປະຊາຊົນ ຮັ່ງມີຜາສຸກ, ປະເທດຊາດ ມັ່ງຄັ່ງເຂັ້ມແຂງ, ປະຊາຊົນມີຄວາມສາມັກຄີເປັນປຶກແຜ່ນ, ປະຊາທິປະໄຕ, ຍຸຕິທໍາ ແລະ ສີວິໄລ.