ລັດຖະບານ ມອບໃບຢັ້ງຢືນປະເພດດີເດັ່ນໃຫ້ ບໍ່ຄໍາ-ທອງ ເຊໂປນ

63

ຂປລ ລາຍງານວ່າ: ລັດຖະບານລາວ ໄດ້ມອບໃບຢັ້ງຢືນປະເພດດີເດັ່ນ ປະເພດ A ໃຫ້ແກ່ບໍລິສັດ ລ້ານຊ້າງມີເນໂຣນສ໌ ຈຳກັດ(ລຊມລ) ເພື່ອຍ້ອງຍໍສັນລະເສີນ ຕໍ່ການຈັດຕັ້ງປະຕິບັດແຜນ ການຄຸ້ມຄອງ ແລະ ຕິດ ຕາມກວດ ກາສິ່ງແວດລ້ອມ(EMMP) ໂດຍສະເພາະຕໍ່ກັບການເອົາໃຈໃສ່ປະຕິບັດພັນທະ ດ້ານສິ່ງແວດ ລ້ອມ ຂອງໂຄງການລົງທຶນ ປະຈໍາປີ 2023 ສໍາລັບໂຄງການຂຸດຄົ້ນ ແລະ ປຸງແຕ່ງແຮ່ຄໍາ-ທອງ ເຊໂປນ ເມືອງວິລະບູລີ ແຂວງສະຫວັນນະເຂດ.

ພິທີມອບ-ຮັບໃບຢັ້ງຢືນດັ່ງກ່າວ ໄດ້ຈັດຂຶ້ນທີ່ຫ້ອງປະຊຸມໃຫຍ່ຂອງ ກະຊວງຊັບພະຍາກອນທຳມະ ຊາດ ແລະ ສິ່ງແວດລ້ອມ(ກຊສ) ໃນວັນທີ 17 ມັງກອນ 2024, .ໃຫ້ກຽດມອບໂດຍ ທ່ານ ປອ. ໄຊນະ ຄອນ ອິນທະວົງ ຮອງລັດຖະມົນຕີກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ຮັບໂດຍ ທ່ານຈັນທອນ ເນົາວະລາດ ຮອງຜູ້ອໍານວຍການ ລຊມລ. ການສະໝັກເຂົ້າຮ່ວມໃນການຮັບເອົາເງື່ອນໄຂດັ່ງກ່າວ ມີປະມານ 300 ບໍລິສັດ, ມີ 74 ບໍລິສັດ ມີເງື່ອນໄຂຄົບຖ້ວນ ແລະ ຖືກຄັດເລືອກເຂົ້າຮ່ວມຮັບໃບ ຢັ້ງ ຢືນດັ່ງກ່າວ. ໃນນີ້, ມີ 25 ບໍລິສັດ/ໂຄງການ ໄດ້ຮັບປະເພດ C, 35 ບໍລິສັດ/ໂຄງການ ໄດ້ຮັບປະ ເພດ B ແລະ ມີ 14 ບໍລິສັດ/ໂຄງການ ທີ່ສາມາດຍາດໄດ້ໃບຢັ້ງຢືນປະເພດ A, ລວມທັງ ບໍລິສັດ ລຊ ມລ ເປັນໜຶ່ງໃນບໍລິສັດ ທີ່ສາມາດຈັດຕັ້ງປະຕິບັດໂຄງການທີ່ດີເດັ່ນ ຄັ້ງນີ້. ໃບຢັ້ງຢືນອັນຊົງກຽດນີ້ແມ່ນເປັນພະຍານທີ່ຢັ້ງຢືນເຖິງ ຄວາມມຸ່ງໝັ້ນຂອງ ລຊມລ ໃນການປະຕິບັດ ແລະ ການຮັກສາມາດຕະຖານດ້ານການຄຸ້ມຄອງສິ່ງແວດລ້ອມທີ່ດີເລີດ ພາຍໃຕ້ການດໍາເນີນງານຂອງຕົນ ເຊິ່ງເປັນສັນຍາລັກແຫ່ງການອຸທິດຕົນຂອງບໍລິສັດ ໃນການພັດທະນາແບບຍືນຍົງ ແລະ ການເບິ່ງແຍງສິ່ງແວດລ້ອມ ຢ່າງມີຄວາມຮັບ ຜິດຊອບ.

ບໍລິສັດ ລຊມລ ມີຄວາມພາກພູມໃຈທີ່ໄດ້ຮັບໃບຍ້ອງຍໍນີ້ ຈາກລັດຖະບານລາວ ເຊິ່ງເປັນການຮັບຮູ້ເຖິງຄວາມມານະພະຍາຍາມຢ່າງຕໍ່ເນື່ອງ ໃນການດຳເນີນທຸລະກິດຂຸດຄົ້ນບໍ່ແຮ່ ທີ່ດີເລີດຕະຫລອດມາ ແລະ ປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ແບບຍືນຍົງ. ບໍລິສັດ ລຊມລ ຍາມໃດກໍມີຄວາມມຸ່ງໝັ້ນທີ່ຈະຮັກສາມາດຕະຖານ ດ້ານສິ່ງແວດລ້ອມ ຕາມມາດຕະຖານຂອງສາກົນ ແລະ ໃນທຸກກິດຈະກຳ ຈະສືບຕໍ່ຄຸ້ມຄອງສິ່ງແວດລ້ອມຢ່າງເປັນມິດ ແລະ ຖືເປັນບຸລິມະສິດສຳຄັນທີ່ສຸດ.
ທີ່ມາ: ຂປລ