ຍົກລະດັບເຕັກນິກການຜະລິດກະເປົາ

20

ສູນສົ່ງເສີມຫັດຖະກໍາເຮືອນຫູກມິຖຸນາ ແຂວງຫຼວງ ນໍ້າທາ ໄດ້ຈັດຊຸດຝຶກອົບຮົມໂຄງການຍົກລະດັບເຕັກນິກການຜະລິດກະເປົາ ໃນວັນທີ 5 ມັງກອນ 2024 ໂດຍການເຂົ້າຮ່ວມຂອງ ທ່ານ ຄໍາແກ້ວ ຈັນທະວົງ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງ; ມີທ່ານ ນາງ ແອ໋ງ ພົມມະຈັນ ເຈົ້າຂອງເຮືອນຫູກມິຖຸນາ ແຂວງຫຼວງນໍ້າທາ, ທ່ານ ນາງ ອານຸສອນ ແກ້ວບຸນມາ ເຈົ້າຂອງຮ້ານອານຸສອນ ຫັດຖະກໍາ ນະຄອນຫຼວງວຽງຈັນ ມີພາກສ່ວນທີ່ກ່ຽວຂ້ອງຈາກພະແນກອຸດສາຫະກໍາ ແລະ ການຄ້າແຂວງ, ເມືອງ, ຕະຫຼອດຮອດຄູຝຶກ ແລະ ສໍາມະນາກອນກຸ່ມຜະລິດເຄື່ອງຫັດຖະກໍາທີ່ມາຈາກ 5 ເມືອງຂອງແຂວງຫຼວງ ນໍ້າທາ ເຂົ້າຮ່ວມ.

อาจเป็นรูปภาพของ 8 คน และ ข้อความ

ຊຸດອົບຮົມຄັ້ງນີ້ ມີຂຶ້ນເພື່ອເປັນການສົ່ງເສີມການຜະລິດເຄື່ອງຫັດຖະກໍາໃຫ້ມີຫຼາກຫຼາຍສີສັນ ແລະ ອີງໃສ່ຄວາມຮຽກຮ້ອງຕ້ອງການຂອງຜູ້ຊົມໃຊ້ຜະລິດຕະພັນກະເປົາຫວາຍຕົວຈິງ ບໍ່ວ່າຈະເປັນລູກຄ້າທັງພາຍໃນ ແລະ ຕ່າງປະເທດທີ່ມີຄວາມນິຍົມຮັກມັກໃນງານສີມືການເຮັດກະເປົາຫວາຍແບບປະສົມປະສານ ລະຫວ່າງ ຫວາຍ ແລະ ຜ້າຝ້າຍລາວ ເຊິ່ງສາມາດຜະລິດອອກມາໄດ້ຫຼາກຫຼາຍສີສັນ ແລະ ສາມາດຕອບໂຈດໃຫ້ແກ່ເປົ້າໝາຍການຕະຫຼາດ, ທັງເຫັນໄດ້ງານສີມືຫັດຖະກໍາຂອງຄົນລາວກໍຄືຂອງຊາດລາວ ສາມາດນໍາມາປະດິດປະຍຸກໃຫ້ເປັນກະເປົາຫວາຍປະສົມຜ້າຝ້າຍລາວໄດ້.

อาจเป็นรูปภาพของ 3 คน และ ข้อความ

ຊຸດຝຶກອົບຮົມຄັ້ງນີ້ ໄດ້ມີສໍາມະນາກອນເຂົ້າຮ່ວມທັງໝົດ 22 ຄົນ ໄດ້ຮຽນຮູ້ກ່ຽວກັບພາກທິດສະດີ, ວິທີ ແລະ ຂັ້ນຕອນການເຮັດກະເປົາຜືແບບມີຫູຫິ້ວ ແລະ ກະເປົາແບບຈັບ, ການປະຕິບັດຕົວຈິງ ກ່ຽວກັບການອອກແບບ, ຕັດແບບກະເປົາ, ການຕັດຊິ້ນສ່ວນປະກອບ, ກະກຽມອຸປະກອນທັງໝົດ, ການນໍາໃຊ້ຈັກ, ການຫຍິບກະເປົາສານດ້ວຍຜື, ຂັ້ນຕອນການທາກາວ ພ້ອມທັງໄດ້ທົບທວນຄືນແຕ່ລະຂັ້ນຕອນໃນການຜະລິດກະເປົາແບບມີຫູຫິ້ວ ແລະ ແບບຈັບ ທີ່ເຮັດດ້ວຍຜືໃຫ້ສໍາມະນາກອນຕື່ມອີກ.

อาจเป็นรูปภาพของ 4 คน, เตารีดผ้า และ ข้อความ

ຊຸດຝຶກອົບຮົມຈັດໂດຍ ສູນສົ່ງເສີມຫັດຖະກໍາເຮືອນຫູກມິຖຸນາ ແຂວງຫຼວງນໍ້າທາ ແລະ ໄດ້ຮັບການສະໜັບສະໜູນຈາກກອງທຶນສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ກະຊວງອຸດສາຫະກໍາ ແລະ ການຄ້າ ເຊິ່ງຈະໄດ້ດໍາເນີນໄປເປັນເວລາ 5 ວັນ ຈຶ່ງສໍາເລັດ.

ຂ່າວ: ສົມພອນ ຂຸນດາວົງ