ກະກຽມຄວາມພ້ອມ ກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 27

18

ວັນທີ 4 ມັງກອນ 2024, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ( ຖວທ ) ຈັດກອງປະຊຸມ ເພື່ອລາຍງານຄວາມຄືບໜ້າການເປັນເຈົ້າພາບຈັດກອງປະຊຸມລັດຖະມົນຕີທ່ອງທ່ຽວອາຊຽນ ຄັ້ງທີ 27, ກອງປະຊຸມກ່ຽວຂ້ອງ ແລະ ງານວາງສະແດງທ່ອງທ່ຽວອາຊຽນ ເຊິ່ງຈະຈັດຂຶ້ນໃນລະຫວ່າງວັນທີ 22 – 27 ມັງກອນ 2024 ທີ່ຈະມາເຖິງນີ້.

อาจเป็นรูปภาพของ 9 คน และ ข้อความ

ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ ກະຊວງ ຖວທ ໄດ້ໃຫ້ຮູ້ວ່າ: ປັດຈຸບັນ ການກະກຽມຄວາມພ້ອມເປັນເຈົ້າພາບຈັດກອງປະຊຸມລັດຖະມົນຕີທ່ອງທ່ຽວອາຊຽນ ມີຄວາມຄືບໜ້າໃນຫຼາຍດ້ານ ເປັນຕົ້ນດ້ານເນື້ອໃນໄດ້ສຳເລັດຮ່າງບົດສູນທອນພົດຂອງທ່ານນາຍົກລັດຖະມົນຕີ ໃນພິທີເປີດໃນວັນທີ 24 ມັງກອນ 2024, ສຳເລັດຮ່າງບົດກ່າວເປີດຂອງທ່ານລັດຖະມົນຕີ ກະຊວງ ຖວທ ໃນງານລ້ຽງອາຫານທ່ຽງ ໃນວັນທີ 25 – 26 ມັງກອນ 2024 ແລະ ສຳເລັດຮ່າງບົດຄຳເຫັນກ່າວເປີດຂອງທ່ານຮອງລັດຖະມົນຕີ ກະຊວງ ຖວທ ໃນມື້ສຳມະນາການທ່ອງທ່ຽວອາຊຽນ ວັນທີ 25 ມັງກອນ 2024.

ກອງປະຊຸມລັດຖະມົນຕີທ່ອງທ່ຽວອາຊຽນ ແລະ ກອງປະຊຸມປິ່ນອ້ອມຕ່າງໆ ຈະຈັດຂຶ້ນໃນລະຫວ່າງວັນທີ 22 – 27 ມັງກອນ 2024 ໂດຍໄດ້ກຳນົດເອົາໂຮງແຮມແລນມາກ ເປັນສະຖານທີ່ຈັດກອງປະຊຸມທາງການ.

ສ່ວນວຽກງານວາງສະແດງການທ່ອງທ່ຽວຢູ່ສູນການຄ້າລາວ – ໄອເຕັກ ມີຮ້ານວາງສະແດງທີ່ໄດ້ລົງທະບຽນ 89 ຮ້ານ. ໃນນັ້ນ ກະຊວງ ຖວທ 12 ຮ້ານ, ບໍລິສັດທ່ອງທ່ຽວ 7 ຮ້ານ, ຣີສອດ 3 ຮ້ານ. ບໍລິສັດທ່ອງທ່ຽວ ໄດ້ລົງທະບຽນຮັບບັດ Full Delegate ຈໍານວນ 20 ຫົວໜ່ວຍ ໃຊ້ຈ່າຍໂດຍຕົນເອງ.

ໃນຕອນທ້າຍ ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຕີລາຄາສູງ ແລະ ສະແດງຄວາມຊົມເຊີຍຕໍ່ຜົນສຳເລັດໃນການກະກຽມຄວາມພ້ອມດ້ານຕ່າງໆຂອງແຕ່ລະອະນຸກຳມະການ ທີ່ໄດ້ສຸມທຸກຄວາມພະຍາຍາມເຂົ້າໃນການຫ້າງຫາກະກຽມ ຄວາມພ້ອມດ້ານຕ່າງໆ ເຊິ່ງເຫັນໄດ້ວ່າມີຜົນສຳເລັດໃນຫຼາຍດ້ານເປັນກ້າວໆ. ພ້ອມນີ້, ທ່ານຍັງໄດ້ເນັ້ນໃຫ້ແຕ່ລະອະນຸກຳມະການ ສືບຕໍ່ຈັດຕັ້ງປະຕິບັດໜ້າວຽກທີ່ຍັງຄົງຄ້າງຈຳນວນໜຶ່ງໃຫ້ສຳເລັດຕາມກຳນົດເວລາ ເພື່ອເຮັດໃຫ້ການດຳເນີນກອງປະຊຸມດັ່ງກ່າວ ດຳເນີນໄປດ້ວຍຜົນສຳເລັດອັນຈົບງາມ.

ທີ່ມາ: ຂປລ