ເສດຖະກິດ ແຂວງຄຳມ່ວນ ຂະຫຍາຍຕົວ 5,88%

38

 

ໃນປີ 2023 ເສດຖະກິດແຂວງຄຳມ່ວນ ຂະຫຍາຍຕົວໃນລະດັບ 5,88% ເພີ່ມຂຶ້ນ 0,3% ຈາກປີຜ່ານມາ, ລວມຍອດຜະລິດຕະພັນພາຍໃນ ສະເລ່ຍຕໍ່ຫົວຄົນ ເທົ່າກັບ 36,56 ລ້ານກີບຕໍ່ຄົນ.
ກອງປະຊຸມອົງການປົກຄອງແຂວງຄໍາມ່ວນ ປະຈໍາເດືອນທັນວາ 2023 ໄດ້ຈັດຂຶ້ນໃນວັນທີ 29 ທັນວາ ທີ່ຫ້ອງວ່າການແຂວງຄໍາມ່ວນ ໂດຍການເປັນປະທານຂອງ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາທ່ານຮອງເຈົ້າແຂວງ, ຕາງໜ້າສະພາປະຊາຊົນ ແຂວງ, ບັນດາທ່ານເຈົ້າເມືອງ, ຫົວໜ້າ – ຮອງຫົວໜ້າພະແນກການອ້ອມຂ້າງແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.


ທ່ານ ເດດສັກດາ ມະນີຄໍາ ຫົວໜ້າພະແນກແຜນການ ແລະ ການລົງທຶນແຂວງ ໄດ້ຜ່ານຮ່າງບົດສະຫຼຸບກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ປີ 2023 ແລະ ທິດທາງແຜນການປີ 2024 ວ່າ: ໃນປີ 2023 ເສດຖະກິດມະຫາພາກແຂວງ ຄໍາມ່ວນ ຍັງສືບຕໍ່ຂະຫຍາຍຕົວດ້ວຍບາດກ້າວທີ່ດີພໍສົມຄວນ ສະແດງອອກເສດຖະກິດຂະຫຍາຍຕົວໃນລະດັບ 5,88% ( ມະຕິສະພາ 5,90% ) ທຽບໃສ່ປີຜ່ານມາ ເພີ່ມຂຶ້ນ 0,3%, ລວມຍອດຜະລິດຕະພັນພາຍໃນ ( GDP ) ບັນລຸໄດ້ 16.593 ຕື້ກີບ ເທົ່າກັບ 111,43% ຂອງແຜນການ, ທຽບໃສ່ປີຜ່ານມາ ເພີ່ມຂຶ້ນ 18,39% ( ປີ 2022 ແມ່ນ 14.016 ຕື້ກີບ ); ລາຍຮັບສະເລ່ຍຕໍ່ຫົວຄົນ ເທົ່າກັບ 36,56 ລ້ານກີບຕໍ່ຄົນ ເທົ່າກັບ 1.979 ໂດລາ ທຽບໃສ່ປີຜ່ານມາເພີ່ມຂຶ້ນ 122 ໂດລາ.
ການລະດົມທຶນທົ່ວສັງຄົມ ກວມເອົາ 19,66% ຂອງ GDP ຫຼື ເທົ່າກັບ 3.261,69 ຕື້ກີບ ທຽບໃສ່ປີຜ່ານ ເພີ່ມຂຶ້ນ 11,47%.


ໂອກາດກ່າວເປີດກອງປະຊຸມ, ທ່ານ ວັນໄຊ ພອງສະຫວັນ ຍັງໄດ້ຮຽກຮ້ອງມາຍັງບັນດາທ່ານທີ່ເຂົ້າຮ່ວມກອງປະຊຸມ ຈົ່ງໄດ້ພ້ອມກັນເຊີດຊູຄວາມຮັບຜິດຊອບຂອງຕົນເອງ, ສຸມສະຕິປັນຍາເຂົ້າໃນການຄົ້ນຄວ້າ – ປະກອບຄຳຄິດເຫັນໃຫ້ເລິກເຊິ່ງພາວະວິໄສ, ກົງໄປກົງມາ ແລະ ສອດຄ່ອງກັບຄວາມເປັນຈິງ ໂດຍສະເພາະບັນດາຜົນສຳເລັດທີ່ໄດ້ຍົກຂຶ້ນໃນບົດສະຫຼຸບນັ້ນ ບັນດາທິດທາງແຜນການ ແລະ ຕົວເລກຄາດໝາຍຕ່າງໆທີ່ພວກເຮົາໄດ້ກຳນົດໄວ້ ເພື່ອເຮັດແນວໃດໃຫ້ແຂວງຄໍາມ່ວນ ມີການພັດທະນາຢ່າງເຂັ້ມແຂງ, ໜັກແໜ້ນ ແລະ ກາຍເປັນແຂວງທີ່ມີລາຍໄດ້ກຸ້ມຕົນເອງທາງດ້ານງົບປະມານຢ່າງໜັກແໜ້ນ ແລະ ຍືນຍົງ.