ເລີ່ມພັດທະນານິຄົມ ວຽງຈັນ – ໂນນທອງ ໄລຍະ 2

25

 

ນິຄົມອຸດສາຫະກຳ ແລະ ການຄ້າ ວຽງຈັນ – ໂນນທອງ ຫຼື ວີຕາ ປາກ ໄດ້ດໍາເນີນໂຄງການພັດທະນາໄລຍະທີ 1 ມາແຕ່ປີ 2009 ສາມາດດຶງດູດການລົງທຶນໄດ້ຫຼາຍສິບບໍລິສັດ, ສ້າງວຽກເຮັດງານທໍາໄດ້ຫຼາຍພັນຕໍາແໜ່ງ; ເຂົ້າສູ່ປີ 2024 ກໍຈະເລີ່ມພັດທະນານິຍົມໄລຍະ 2 ໃນເນື້ອທີ່ 100 ກວ່າເຮັກຕາ ແຕ່ບັນຫາແຮງງານຄືຄວາມທ້າທາຍສຳຄັນ.

ເມື່ອທ້າຍປີ 2023 ໃນພິທີຂຶ້ນຫ້ອງການໃໝ່ ແລະ ເປີດໂຄງການພັດທະນານິຄົມໄລຍະ 2 ທ່ານ ເຊີນ ຊີ ເສີນ ຜູ້ພັດທະນາ, ຜູ້ອຳນວຍການ ບໍລິສັດ ລາວວີຕາ ພັດທະນາ ຈຳກັດ ກ່າວວ່າ: ໂຄງການພັດທະນາ ໄລຍະທີ 1 ໃນເນື້ອທີ່ 110 ເຮັກຕາ ໄດ້ເລີ່ມດຳເນີນການມາແຕ່ປີ 2009. ປັດຈຸບັນໄດ້ສຳເລັດການພັດທະນາພື້ນຖານໂຄງລ່າງ ແລະ ສິ່ງອຳນວຍຄວາມສະດວກສຳລັບການລົງທຶນພາກອຸດສາຫະກຳ ແລະ ການບໍລິການທີ່ກ່ຽວຂ້ອງ. ປັດຈຸບັນມີຫຼາຍກວ່າ 70 ບໍລິສັດຂອງຕ່າງປະເທດ ໄດ້ເຂົ້າມາຈົດທະບຽນ ແລະ ດຳເນີນທຸລະກິດຢູ່ໃນເຂດນິຄົມ; ໃນນັ້ນ, ຫຼາຍກວ່າ 30 ບໍລິສັດ ໄດ້ດຳເນີນການຜະລິດ ແລະ ສົ່ງອອກ, ສ້າງວຽກເຮັດງານທຳໃຫ້ແກ່ແຮງງານລາວຫຼາຍກວ່າ 7.000 ຕຳແໜ່ງງານ.


ຄຽງຄູ່ກັນນັ້ນ, ນິຄົມພວກເຮົາຍັງໄດ້ມີໂຮງຮຽນວິຊາຊີບ ເພື່ອສົ່ງເສີມ ແລະ ພັດທະນາສີມືແຮງງານ, ພັດທະນາ ຄວາມຮູ້ດ້ານວິຊາການ ແລະ ເຕັກນິກ, ມີໂຮງຮຽນລ້ຽງເດັກ, ອະນຸບານ ແລະ ປະຖົມ ເພື່ອອຳນວຍຄວາມສະດວກໃຫ້ພະນັກງານກຳມະກອນຜູ້ທີ່ເປັນພໍ່ແມ່ ຫຼື ຜູ້ປົກຄອງ ໄດ້ມີຄວາມອຸ່ນອ່ຽນທຸ່ນທ່ຽງປະຕິບັດໜ້າທີ່ຢູ່ໃນໂຮງຈັກ – ໂຮງງານຢ່າງຕັ້ງໜ້າ.

ເຖິງຢ່າງໃດກໍຕາມ, ນິຄົມພວກເຮົາກໍຍັງພົບບັນຫາຈຳນວນໜຶ່ງ ເຊັ່ນ: ແຮງງານໃນໂຮງຈັກ – ໂຮງງານ ຍັງບໍ່ພຽງພໍກັບຄວາມຕ້ອງການ ເຊິ່ງເປັນຂໍ້ຈຳກັດ ແລະ ຄວາມສ່ຽງໃນການຂະຫຍາຍ ແລະ ດຶງດູດເອົາການລົງທຶນຂະໜາດໃຫຍ່ເຂົ້າມາລົງທຶນຢູ່ໃນນິຄົມຂອງພວກເຮົາ. ດັ່ງນັ້ນ, ຈຶ່ງຂໍສະເໜີໃຫ້ການນຳ ກໍຄືລັດຖະບານຊ່ວຍພິຈາລະນານະໂຍບາຍ ແລະ ມາດຕະການທີ່ເໝາະສົມ ເພື່ອເປັນການສົ່ງເສີມແຮງງານລາວໃຫ້ສາມາດເຮັດວຽກຄົງທີ່ ທັງເປັນການຕອບສະໜອງແຮງງານຢູ່ພາຍໃນປະເທດຢ່າງພຽງພໍ.
ທ່ານກ່າວຕື່ມວ່າ: ແຜນພັດທະນາໃນຕໍ່ໜ້າ ເລີ່ມແຕ່ເດືອນມັງກອນ 2024 ເປັນຕົ້ນໄປ ບໍລິສັດພວກເຮົາຈະໄດ້ເລີ່ມລົງມືບຸກເບີກ ແລະ ພັດທະນານິຄົມ ໄລຍະ 2 ຢ່າງເປັນທາງການ ໂດຍມີເນື້ອທີ່ 142 ເຮັກຕາ ເຊິ່ງເປັນດິນຕໍ່ແຜ່ນກັບເນື້ອທີ່ຂອງນິຄົມ ໄລຍະທີ 1 ເພື່ອເປັນການສືບຕໍ່ປະຕິບັດຄາດໝາຍການພັດທະນາທີ່ກຳນົດໄວ້ໃນສັນຍາຮ່ວມມືກັບລັດຖະບານ.


ໂອກາດດຽວກັນ, ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ມີຄໍາເຫັນວ່າ: ໃນນາມທີ່ກະຊວງອຸດສາຫະກຳ ແລະ ການຄ້າ ເປັນຄູ່ຮ່ວມພັດທະນານິຄົມແຫ່ງນີ້ ຂ້າພະເຈົ້າຂໍສະແດງ ຄວາມຍ້ອງຍໍຊົມເຊີຍ ທ່ານ ເຊີນ ຊີ ເສີນ ຜູ້ພັດທະນາ ທີ່ໄດ້ມີຄວາມຕັດສິນໃຈສູງ ແລະ ເອົາໃຈໃສ່ໃນການພັດທະນານິຄົມອຸດສາຫະກຳ ແລະ ການຄ້າວຽງຈັນ – ໂນນທອງ ສຳເລັດຕາມແຜນທີ່ວາງໄວ້ເປັນກ້າວໆ; ຜົນສໍາເລັດອັນພົ້ນເດັ່ນທີ່ທາງກະຊວງຂອງພວກເຮົາຕີລາຄາໄດ້ ມີດ້ານຕ່າງໆດັ່ງນີ້:
1). ສາມາດດຶງດູດເອົາການລົງທຶນມາຈາກຫຼາກຫຼາຍປະເທດ ແລະ ເຂດແຄວ້ນ ມາເຕົ້າໂຮມຢູ່ໃນເຂດດຽວກັນ ເຊິ່ງມີທຶນຈົດທະບຽນບັນລຸເຖິງ 82,5 ໂດລາສະຫະລັດ.

2). ສາມາດຜະລິດ ແລະ ສົ່ງອອກສິນຄ້າ ໄດ້ທັງໝົດ 572 ລ້ານໂດລາສະຫະລັດ ເຊິ່ງສິນຄ້າສົ່ງອອກປະກອບມີ: ເຄື່ອງນຸ່ງຫົ່ມ, ຊິ້ນສ່ວນອຸປະກອນເອເລັກໂຕຣນິກ, ສາຍໄຟສຳລັບປັບອຸນຫະພູມແອເຢັນ, ເຄື່ອງຫຼິ້ນເດັກນ້ອຍ, ທູບຈອດ, ເຄື່ອງມືອຸປະກອນການຜະລິດເຕັກນິກ, ໝາກລໍ້ແກ່ເຄື່ອງ, ເຄື່ອງມືອຸປະກອນການແພດ ແລະ ແຜ່ນແພ.
3). ນິຄົມໄດ້ປະຕິບັດການມອບພັນທະອາກອນໄປແລ້ວ 27,85 ຕື້ກີບ ແລະ ແບ່ງປັນເງິນປັນຜົນ 30% ໃຫ້ລັດຖະບານ ມາຮອດປີ 2022 ໄດ້ 1,2 ລ້ານກວ່າໂດລາສະຫະລັດ.
4). ໄດ້ເຮັດໃຫ້ບ້ານອ້ອມຂ້າງ ມີການກ້າວຂຶ້ນເປັນຊຸມຊົນເປັນຕົວເມືອງນ້ອຍ ເຊິ່ງພວກເຮົາຈະເຫັນຮ້ານອາຫານ, ເຮືອນພັກ, ຕະຫຼາດ ແລະ ຫ້າງຮ້ານຕ່າງໆໄດ້ເກີດຂຶ້ນຢ່າງຫຼວງຫຼາຍຢູ່ໃນບໍລິເວນອ້ອມຂ້າງ, ພ້ອມທັງໄດ້ສະໜອງວຽກເຮັດງານທໍາໃຫ້ແກ່ເຂົາເຈົ້າ.