ນະຄອນຫຼວງ ຈະສູ້ຊົນພັດທະນາ ເສດຖະກິດ ໃຫ້ເຕີບໂຕ 5,5% ຂຶ້ນໄປ

28

 

ປີ 2023 ທີ່ຜ່ານພົ້ນໄປ ເສດຖະກິດນະຄອນຫຼວງວຽງຈັນ ຈະຂະຫຍາຍຕົວໄດ້ໃນລະດັບ 5,3%. ຂະນະທີ່ປີ 2024 ນີ້ ນະຄອນຫຼວງວຽງຈັນ ຈະສູ້ຊົນພັດທະນາເສດຖະກິດ ໃຫ້ຂະຫຍາຍຕົວໃນລະດັບ 5,5% ຂຶ້ນໄປ, ຄາດຄະເນມູນຄ່າເພີ່ມ ລວມຍອດຜະລິດຕະພັນພາຍໃນ ປະມານ 85.799 ຕື້ກີບ ສະເລ່ຍຕໍ່ຫົວຄົນ 81,7 ລ້ານກີບ.


ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນ ໄດ້ລາຍງານທິດທາງແຜນການ ແຜນພັດທະນາເສດຖະກິດ – ສັງຄົມ ປະຈຳປີ 2024 ຂອງນະຄອນຫຼວງວຽງຈັນ ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ໃນວັນທີ 5 ທັນວາ 2023 ວ່າ: ປີ 2024 ສະພາບການຂອງໂລກ ແລະ ພາກພື້ນ ຍັງຈະສືບຕໍ່ຜັນແປທີ່ຄາດເດົາໄດ້ຍາກ, ບວກກັບສະພາບເສດຖະກິດ – ການເງິນຂອງປະເທດເຮົາ ຍັງສືບຕໍ່ພົບຄວາມຫຍຸ້ງຍາກພໍສົມຄວນ.
ໂດຍອີງໃສ່ສະພາບ, ທ່າແຮງ ແລະ ຄໍາສັ່ງ ວ່າດ້ວຍການສ້າງແຜນພັດທະນາເສດຖະກິດ – ສັງຄົມແຫ່ງຊາດ ແລະ ແຜນງົບປະມານແຫ່ງລັດ ປະຈໍາປີ 2024 ສະບັບເລກທີ 09/ນຍ ລົງວັນທີ 28 ມິຖຸນາ 2023 ຈຶ່ງໄດ້ກໍານົດ 7 ທິດທາງ ຄື:

1). ຮັບປະກັນໃຫ້ນະຄອນຫຼວງວຽງຈັນ ມີສະຖຽນລະພາບທາງດ້ານການເມືອງ; ທົ່ວສັງຄົມ ມີຄວາມສະຫງົບປອດໄພໂດຍພື້ນຖານ.
2). ເພີ່ມທະວີການແກ້ໄຂບັນຫາເສດຖະກິດ – ການເງິນ ທີ່ວາລະແຫ່ງຊາດ ໄດ້ກໍານົດອອກ; ຊຸກຍູ້ການພັດທະນາເສດຖະກິດໃຫ້ຂະຫຍາຍຕົວຢ່າງຕໍ່ເນື່ອງ, ພັດທະນາໄປຕາມ 5 ທ່າແຮງທີ່ກອງປະຊຸມໃຫຍ່ ຄັ້ງທີ VII ກໍານົດໄວ້.
3). ສືບຕໍ່ພັດທະນາຊັບພະຍາກອນມະນຸດໃຫ້ມີຄຸນນະພາບທີ່ດີຂຶ້ນ; ສ້າງແຮງງານທີ່ມີຄຸນນະພາບ ສະໜອງໃຫ້ບັນດາກິດຈະການພາຍໃນ; ສ້າງກິດຈະກໍາ ແລະ ເປີດແຫຼ່ງທ່ອງທ່ຽວໃໝ່ ເພື່ອດຶງດູດນັກທ່ອງທ່ຽວ.
4). ປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດຢ່າງສົມເຫດສົມຜົນ ແລະ ມີປະສິດທິຜົນສູງ; ຄຸ້ມຄອງການນໍາໃຊ້ດິນ, ປ່າໄມ້, ແມ່ນໍ້າ ຢ່າງເຂັ້ມງວດ;


5). ປັບປຸງການຄຸ້ມຄອງບໍລິຫານລັດ ແລະ ຫັນເປັນທັນສະໄໝ, ຄຸ້ມຄອງສັງຄົມຕາມລະບຽບກົດໝາຍ.
6). ເພີ່ມທະວີການຮ່ວມມືກັບບັນດາປະເທດເພື່ອນມິດ ແລະ ຄູ່ຮ່ວມພັດທະນາ.
7). ກະກຽມເງື່ອນໄຂ, ພື້ນຖານດ້ານຕ່າງໆ ເພື່ອຮອງຮັບໃຫ້ແກ່ການເປັນເຈົ້າພາບຈັດກອງປະຊຸມສຸດຍອດອາຊຽນ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນປີ 2024, ການເປີດປີທ່ອງທ່ຽວລາວ ໃນປີ 2024 ແລະ ຈັດກອງປະຊຸມບັນດາເຈົ້າຄອງນະຄອນຫຼວງອາຊຽນ ທີ່ນະຄອນຫຼວງວຽງຈັນ ເປັນເຈົ້າພາບ.
ສຳລັບດ້ານການເຕີບໂຕເສດຖະກິດ ໃນປີ 2024 ຂອງນະຄອນຫຼວງວຽງຈັນ ແມ່ນຈະສູ້ຊົນໃຫ້ເສດຖະກິດ ຂະຫຍາຍຕົວໃນລະດັບ 5,5% ຂຶ້ນໄປ, ຄາດຄະເນມູນຄ່າເພີ່ມ ລວມຍອດຜະລິດຕະພັນພາຍໃນ ປະມານ 85.799 ຕື້ກີບ ສະເລ່ຍຕໍ່ຫົວຄົນ 81,7 ລ້ານກີບ.

ເພື່ອເຮັດໃຫ້ເສດຖະກິດເຕີບໂຕເພີ່ມຂຶ້ນ 5,5% ຂຶ້ນໄປ ໃນປີ 2024 ຄາດຄະເນ ຄວາມຕ້ອງການທຶນເພື່ອການພັດທະນາ ປະມານ 23,49% ຂອງ GDP ເທົ່າກັບ 20.150 ຕື້ກີບ;
ສູ້ຊົນເກັບລາຍຮັບທັງໝົດ 7.144,41 ຕື້ກີບ; ໃນນັ້ນ ລາຍຮັບພູດສູນກາງ 5.443,36 ຕື້ກີບ ແລະ ລາຍຮັບທ້ອງຖິ່ນ 1.701,06 ຕື້ກີບ. ສ່ວນດ້ານລາຍຈ່າຍ ຄາດຄະເນເພດານລາຍຈ່າຍງົບປະມານ ທັງໝົດ 570,98 ຕື້ກີບ ( ຍັງບໍ່ລວມແຜນລາຍຈ່າຍການລົງທຶນຂອງລັດ ).


ທ່ານກ່າວຕື່ມວ່າ: ການພັດທະນາ ເສດຖະກິດ-ສັງຄົມປີ2023 ຄາດຄະເນວ່າ ເສດຖະກິດ ຂອງນະຄອນຫຼວງວຽງຈັນ ຈະຂະຫຍາຍຕົວໃນລະດັບ 5,3% ( ມະຕິສະພາ ໃຫ້ບັນລຸ 5,5% ), ລວມຍອດຜະລິດຕະພັນພາຍໃນ ( GDP ) ຄາດວ່າຈະບັນລຸ 72.156,09 ຕື້ກີບ ເທົ່າກັບ 104,4% ຂອງແຜນການປີ ( ມະຕິສະພາ ໃຫ້ບັນລຸ 69.090 ຕື້ກີບ ), GDP ສະເລ່ຍຕໍ່ຫົວຄົນ 70,81 ລ້ານກີບ ( ມະຕິສະພາ ໃຫ້ໄດ້ 67,8 ລ້ານກີບ).