ສະຫະລັດ – ຣັດເຊຍ ຂະຫຍາຍເວລາຮ່ວມມື ສົ່ງນັກບິນອະວະກາດຂຶ້ນສູ່ສະຖານີ ISS

14

ສຳນັກຂ່າວ AFP ລາຍງານວ່າ ອົງການອາວະກາດຣັດເຊຍ (ROSCOSMOS) ແລະ ອົງການບໍລິຫານການບິນ ແລະ ອາວະກາດແຫ່ງຊາດສະຫະລັດອາເມຣິກາ (NASA) ໄດ້ອອກຖະແຫຼງການຮ່ວມ ກ່ຽວກັບການຂະຫຍາຍເວລາການຮ່ວມມື ເພື່ອສົ່ງນັກບິນອາວະກາດຂຶ້ນສູ່ສະຖານີອາວະກາດນານາຊາດ (ISS) ອອກໄປຈົນຮອດປີ 2025 ເປັນຢ່າງໜ້ອຍ.

ທັງນີ້ ການຂະຫຍາຍຂອບການຮ່ວມມືດັ່ງກ່າວ ມີຈຸດປະສົງເພື່ອ “ຮັກສາຄວາມເຊື່ອໝັ້ນໃນພາບລວມໃຫ້ແກ່ກົນໄກທັງໝົດຂອງ ISS” ໂດຍສະເພາະຄວາມຈຳເປັນຕ້ອງມີນັກບິນອາວະກາດຂອງສະຫະລັດ ແລະ ຣັດເຊຍ ປະຈຳການຢູ່ສະຖານີອາວະກາດນານາຊາດຢ່າງໜ້ອຍປະເທດລະ 1 ຄົນ.

ໂຄງການສະຖານີອາວະກາດ ໄດ້ດຳເນີນການມາແຕ່ປີ 1998 ໂດຍມີ ສະຫະລັດ, ຣັດເຊຍ, ການາດາ, ຍີ່ປຸ່ນ ແລະ ສະຫະພາບເອີຣົບ ເຂົ້າຮ່ວມ ໂດຍເປັນການຮ່ວມມືທີ່ສະຫະລັດ ແລະ ຣັດເຊຍສາມາດຈັດການຮ່ວມກັນໄດ້ຢ່າງໂລ່ງລ່ຽນ ດ້ວຍຄວາມເປັນມືອາຊີບຂອງນັກບິນອາວະກາດຂອງສອງປະເທດ.

ແນວໃດກໍຕາມ ຂະນະນີ້ ສະມາຊິກສ່ວນໃຫຍ່ຂອງ ISS ສະແດງທ່າທີຈະປະຕິບັດງານຮ່ວມກັນຮອດປີ 2024 ແຕ່ ISS ຢືນຢັນວ່າ ຕ້ອງດຳເນີນການຈົນຮອດທ້າຍປີ 2030, ຫຼັງຈາກນັ້ນອີກ 1 ເດືອນ ຄື: ເດືອນມັງກອນ 2031 ຈະມີການຄວບຄຸມໃຫ້ ISS ເດີນທາງກັບສູ່ໂລກ ແລະ ຄາດວ່າ ຈະໃຫ້ຕົກລົງສູ່ Pole of inaccessibility ຫລື ທີ່ມັກເອີ້ນກັນວ່າ “ຈຸດມີໂນ” (Point of Nemo).