ເອກະຊົນສຳປະທານທີ່ດິນ 8 ເຮັກຕາເພື່ອສ້າງຕັ້ງໂຮງງານຢູ່ສາລະວັນ

105

ແຂວງສາລະວັນໄດ້ມີພິທີເຊັນສັນຍາເຊົ່າ-ສຳປະທານເນື້ອທີ່ດິນລັດ ຢູ່ເຂດບ້ານຕົ້ງຊວຍ ເມືອງສາລະວັນ ແຂວງສາລະວັນ ເພື່ອສ້າງຕັ້ງໂຮງງານປຸງແຕ່ງໄມ້ສຳເລັດຮູບ ລະຫວ່າງອົງການປົກຄອງແຂວງ ກັບບໍລິສັດ ເຊັນເຈລີ້ ກະສິກຳ ຈໍາກັດ ຊຶ່ງມີພະແນກແຜນການ ແລະ ການລົງທຶນແຂວງ, ພະແນກກະສິກຳ ແລະ ປ່າໄມ້ແຂວງ, ພະແນກຊັບພະຍາກອນ ແລະ ສິ່ງແວດລ້ອມແຂວງ ແລະ ພະແນກການເງິນແຂວງ ໄດ້ຈັດຂຶ້ນໃນວັນທີ 25 ທັນວາ ຜ່ານມາ ທີ່ຫ້ອງປະຊຸມພະແນກແຜນການ-ການລົງທຶນແຂວງສາລະວັນ ໂດຍເປັນກຽດເຂົ້າຮ່ວມຂອງທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນໍາວຽກງານການເມືອງແນວຄິດ ວຽກພັກ-ພະນັກງານ, ຫົວໜ້າ-ຮອງພະແນກການຕ່າງໆທີ່ກ່ຽວຂ້ອງ, ທ່ານ ນາງ ຟ້າມ ຫງັກ ມາຍ ປະທານ ບໍລິສັດ ເຊັນເຈລີ້ ກະສິກຳ ຈໍາກັດ, ມີຄະນະກຳມະການຄຸ້ມຄອງການລົງທຶນຂັ້ນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

May be an image of 10 people, dais and text
ການສຳປະທານໃນຄັ້ງນີ້ ເພື່ອສ້າງຕັ້ງໂຮງງານປຸງແຕ່ງໄມ້ສຳເລັດຮູບ ໂດຍໃຊ້ເຄື່ອງຈັກ 35 ເຄື່ອງ, 200 ແຮງມ້າ ຢູ່ເຂດບ້ານຕົ້ງຊວຍ ເມືອງສາລະວັນ ແຂວງສາລະວັນ ຊຶ່ງການລົງທຶນທັງໝົດ 20 ຕື້ກີບ ໂດຍແມ່ນທຶນຂອງບໍລິສັດເອກະຊົນພາຍໃນ 100%
ການສຳປະທານມີເນື້ອທີ່ຈຳນວນ 8 ເຮັກຕາ ກໍານົດໄລຍະຂອງສັນຍາສຳປະທານແມ່ນ 30 ປີ ນັບແຕ່ມື້ໄດ້ຮັບຂໍ້ຕົກລົງການອະນຸມັດຈາກທ່ານເຈົ້າແຂວງ ສະບັບເລກທີ 757/ຈຂ,ສວ, ລົງວັນທີ 5 ຕຸລາ 2023 ກໍ່ຄືເລີ່ມແຕ່ 2023-2053 ແລະ ສາມາດຕໍ່ອະຍຸໄດ້ຕາມການຕົກລົງເຫັນດີຈາກຂະແໜງການທີ່ກ່ຽວຂ້ອງ.

ສຳລັບແຜນການດໍາເນີນໂຄງການ ແບ່ງອອກເປັນ 2 ໄລຍະຄື: ໄລຍະທີ 1 ແມ່ນໄລຍະກະກຽມໂຄງການເຊັ່ນ: ບຸກເບີກເນື້ອທີ່ດິນ, ກໍ່ສ້າງພື້ນຖານໂຄງລ່າງ, ຕິດຕັ້ງເຄື່ອງຈັກການຜະລິດ ແລະ ທົດລອງການຜະລິດ ໄລຍະນີ້ແມ່ນໃຊ້ເວລາ 1 ປີ (2023-2024). ໄລຍະທີ 2 ແມ່ນໄລຍະດຳເນີນໂຄງການ (2025-2053) ແລະ ສິ້ນສຸດໂຄງການແມ່ນປີ 2053.

May be an image of 11 people, dais and text
ຕອນທ້າຍກໍໄດ້ມີການເຊັນສັນຍາລະຫວ່າງອົງການປົກຄອງແຂວງໂດຍການລົງນາມເຊັນມີ ທ່ານ ຄຳພອນ ມະນີວັນແສງສຸກ ຮອງຫົວໜ້າພະແນກແຜນການ ແລະ ການລົງທຶນແຂວງ, ທ່ານ ນາງ ຫວັດສະດີ ສີປະເສີດ ຮອງຫົວໜ້າພະແນກການເງິນແຂວງ, ທ່ານ ວັງປະເສີດ ບຸນເອື້ອວົງສາ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ທ່ານ ສັກດາ ແກ້ວດວງສີ ຫົວໜ້າພະແນກຊັບພະຍາກອນ ແລະສິ່ງແວດລ້ອມແຂວງ ກັບ ທ່ານ ນາງ ຟ້າມ ຫງັກ ມາຍ ປະທານ ບໍລິສັດ ເຊັນເຈລີ້ ກະສິກຳ ຈໍາກັດ, ໂດຍຊ້ອງໜ້າ ທ່ານ ນາງ ບຸນທະວີ ດວງລາສີ ຮອງເລຂາພັກແຂວງ ຜູ້ຊີ້ນໍາວຽກງານການເມືອງແນວຄິດ ວຽກພັກ-ພະນັກງານ ແລະ ຄະນະກໍາມະການຄຸ້ມຄອງການລົງທຶນຂັ້ນແຂວງ ພ້ອມດ້ວຍພາກສ່ວນທີ່ກ່ຽວ ຂ້ອງເຂົ້າຮ່ວມເປັນສັກຂີພິຍານ.

(ຂ່າວ-ພາບ: ສາລະວັນ)