ເຈົ້າແຂວງຊຽງຂວາງ ຢ້ຽມຢາມຊຸກຍູ້ໂຮງງານແປ້ງ ເສັ້ນລ້ອນມັນສາຄູນ້ຳສຽມ

6

 

ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ພ້ອມດ້ວຍຄະນະ ໄດ້ຢ້ຽມຢາມ ແລະ ຊຸກຍູ້ຊີ້ນຳວຽກງານຢູ່ໂຮງງານແປ້ງ ເສັ້ນລ້ອນມັນສາຄູນ້ຳສຽມ ຂອງກຸ່ມບໍລິສັດຮ່ວມມືເສດຖະກິດ ໂກເອໂກ ຢູ່ບ້ານນ້ຳສຽມ ເມືອງຜາໄຊ ໃນວັນທີ 20 ທັນວາ 2023.

ຕ້ອນຮັບ ແລະ ກ່າວລາຍງານໂດຍ ທ່ານ ໂຮ່ ສີ ແມັງ ປະທານ ບໍລິສັດ ແຮ່ຫຼອມໂລຫະ ຈຳກັດຜູ້ດຽວ ວຽງຈັນ ຂອງບໍລິສັດຮ່ວມມືເສດຖະກິດໂກເອໂກ ເຊິ່ງທ່ານໄດ້ລາຍງານການຈັດຕັ້ງປະຕິບັດວຽກງານຂອງໂຮງງານມີປະຊາຊົນປູກມັນສາຄູປ້ອນໂຮງງານ 500 ກວ່າຄອບຄົວ 1 ເຮັກຕາ ສາມາດປູກໄດ້ 50 – 60 ໂຕນ ບໍລິສັດຮັບຊື້ຢູ່ສວນແມ່ນກິໂລລະ 1.200 ກີບ, ຮັບຊື້ຢູ່ໂຮງງານກິໂລລະ 1.400 ກີບ ປີໜຶ່ງສາມາດປ້ອນວັດຖຸດິບເຂົ້າໂຮງງານໄດ້ 3.500 ໂຕນ.


1 ໂຕນມັນສາຄູ ສາມາດຜະລິດແປ້ງໄດ້ 100 ກິໂລ, ສາມາດແກ້ໄຂຊີວິດການເປັນຢູ່ຂອງປະຊາຊົນດີຂຶ້ນ ມີລາຍຮັບເພີ່ມຂຶ້ນ ກຸ່ມບໍລິສັດໄດ້ຊ່ວຍສ້າງເສັ້ນທາງປູແຮ່ 11 ກິໂລແມັດ ມູນຄ່າ 7 ຕື້ກີບ ໃຫ້ບ້ານນ້ຳສຽມ, ສ້າງເຮືອນໃຫ້ຄອບຄົວທຸກຍາກ 1 ຫຼັງ. ນອກນີ້, ແຕ່ລະປີໄດ້ມີແພດໝໍມາຈາກ ສສ ຫວຽດນາມ ມາກວດສຸຂະພາບ ແລະ ປິ່ນປົວພະຍາດໃຫ້ປະຊາຊົນບ້ານນ້ຳສຽມ ແລະ ບ້ານໃກ້ຄຽງໂດຍບໍ່ເສຍຄ່າ.

ໂອກາດນີ້, ທ່ານເຈົ້າແຂວງ ຊຽງຂວາງ ໄດ້ມີຄຳຄິດເຫັນໂອ້ລົມ ຊີ້ນຳໃຫ້ຊຸກຍູ້ສົ່ງເສີມການປູກ – ການລ້ຽງໃນຂົງເຂດນີ້ໃຫ້ມີການປ່ຽນແປງໃໝ່, ຂໍໃຫ້ບໍລິສັດສະໜອງແນວພັນໃຫ້ປະຊາຊົນ ແລະ ຮັບເກັບຊື້, ເມືອງ ແລະ ບໍລິສັດຮ່ວມກັນ ຊ່ວຍຄົ້ນຄວ້າແກ້ໄຂຄວາມທຸກຍາກຂອງປະຊາຊົນ, ບໍລິສັດເຮັດສັນຍາກັບຄອບຄົວ ບ້ານ ເມືອງ ໃນການສະໜອງມັນສາຄູເຂົ້າໂຮງງານ ເພື່ອໃຫ້ບໍລິສັດບໍ່ຂາດແຄນວັດຖຸດິບປ້ອນໂຮງງານ ກ້າວໄປສູ່ສ້າງຄອບຄົວຕົວແບບໃຫ້ກັບບ້ານ ເມືອງ, ສະເໜີໃຫ້ບໍລິສັດມີສ່ວນຮ່ວມໃນການກໍ່ສ້າງພື້ນຖານໂຄງລ່າງ ( ເສັ້ນທາງຫ້ອງການ ) ເຊິ່ງບໍລິສັດມີມູນເຊື້ອມາແລ້ວ.
[ ຂ່າວ: ບຸນມີ ແສງທຸມມີ ]