ສະຫວັນນະເຂດ ມີເສັ້ນທາງທຽວໄດ້ 2 ລະດູ ກວມ 90% ຂອງຈຳນວນບ້ານທົ່ວແຂວງ

6

 

ທ່ານ ຄຳຜອງ ສົມວິຈິດ ຫົວ ໜ້າພະແນກໂຍທາທິການ ແລະ ຂົນສົ່ງ ແຂວງສະຫວັນນະເຂດ ລາຍງານການປະຕິບັດວຽກງານໃນປີ 2023 ໃນໂອກາດທີ່ ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ( ຍທຂ ) ເຄື່ອນໄຫວພົບປະໂອ້ລົມຄະນະພັກ – ຄະນະພະແນກ ແລະ ພະນັກງານຫຼັກແຫຼ່ງຂອງພະແນກ ຍທຂ ແຂວງສະຫວັນນະເຂດ ໃນຕອນບ່າຍວັນທີ 20 ທັນວາ 2023 ວ່າ: ປັດຈຸບັນໄດ້ປັບປຸງ ແລະ ກໍ່ສ້າງເສັ້ນທາງແຕ່ເທສະບານແຂວງຫາເມືອງ, ເມືອງຫາບ້ານ ແລະ ບ້ານຫາບ້ານ ທຽວໄດ້ສອງລະດູ ກວມເອົາ 90% ຂອງຈຳນວນບ້ານໃນທົ່ວແຂວງ.

ຈັດຕັ້ງປະຕິບັດໂຄງການຟື້ນຟູ ແລະ ສ້ອມແປງເສັ້ນທາງ ຈຳນວນ 46 ໂຄງການ ລວມມູນຄ່າ 342 ຕື້ກວ່າກີບ, ໃນນີ້ມີປັບປຸງເສັ້ນທາງປູຢາງແຕ່ແຍກທາງເລກທີ 9 ຫາ ເທສະບານເມືອງວິລະບູລີ 1 ໂຄງການ ຍາວ 41 ກິໂລແມັດ ປະຕິບັດໄດ້ 80%; ໂຄງການປັບປຸງເສັ້ນທາງວົງຈອນການທ່ອງທ່ຽວ ແລະ ເທສະບານເມືອງ 12 ໂຄງການ, ຟື້ນຟູ ແລະ ສ້ອມແປງເສັ້ນທາງ ໂດຍນຳໃຊ້ກອງທຶນທາງ ປີ 2022 ມີ 13 ໂຄງການ; ໂຄງການພັດທະນາເມືອງນອງ 4 ໂຄງການ, ຟື້ນຟູ ແລະ ສ້ອມແປງຈາກໄພພິບັດ ປີ 2022 ຕາມແຜນປະຈຳປີ 2023 ມີ 8 ໂຄງການ; ໂຄງການມູນຄ່າ 20 ຕື້ກີບລົງມາ ປະຈຳປີ 2023 ຈຳນວນ 8 ໂຄງການ ມອບໃຫ້ຫ້ອງການ ຍທຂ ເມືອງ ເປັນຜູ້ຈັດຕັ້ງປະຕິບັດ.


ໃນປີ 2023 ປະຊາຊົນໃນ 12 ເມືອງ ແລະ ນະຄອນ ປະກອບສ່ວນທຶນຮອນ ເພື່ອກໍ່ສ້າງທາງເບຕົງ, ທາງດິນແດງ ແລະ ສ້ອມແປງຂົວ ໄດ້ 127 ເສັ້ນ, ຍາວ 273 ກິໂລແມັດ ລວມມູນຄ່າ 22 ຕື້ກວ່າກີບ; ປັບປຸງແຜນຜັງນະຄອນໄກສອນ ພົມວິຫານ ແລະ ເມືອງອຸທຸມພອນ ໄດ້ 70%, ຕິດຕັ້ງປ້າຍຈະລາຈອນ, ຕິດຕັ້ງໄຟເຍືອງທາງໃນຈຸດທີ່ມີຄວາມສ່ຽງ ແລະ ສ້ອມແປງລະບົບໄຟອຳນາດໃນເທສະບານນະຄອນໄກສອນ ພົມວິຫານ; ສຳເລັດໂຄງການພັດທະນາແຄມຂອງນະຄອນໄກສອນ ພົມວິຫານ ໃນແຕ່ລະໄລຍະ, ໂຄງການຕ້ານເຈື່ອນແຄມຂອງບ້ານບົວໄຂ ເມືອງໄຊບູລີ ປະຕິບັດໄດ້ 49%.
ສຳເລັດໂຄງການສຶກສາ – ສຳຫຼວດອອກແບບປ້ອງກັນຕາຝັ່ງເຈື່ອນດອນຖ້ຳເງິນ ເມືອງໄຊພູທອງ ຍາວ 9 ກິໂລແມັດ ມູນຄ່າ 1,46 ຕື້ກີບ.

ສ່ວນໃນປີ 2024 ແມ່ນຈະໄດ້ສຸມໃສ່ຈັດຕັ້ງປະຕິບັດແຜນຜັນຂະຫຍາຍວຽກງານຈຸດສຸມທ້າຍສະໄໝຂອງແຂວງໃນຂົງເຂດໂຍທາທິການ ແລະ ຂົນສົ່ງ ເຊິ່ງປະກອບມີ 7 ວຽກຈຸດສຸມສຳຄັນ.
ຈາກນັ້ນ, ທ່ານ ງາມປະສົງ ເມືອງມະນີ ກໍໄດ້ສະແດງ ຄວາມຍ້ອງຍໍຊົມເຊີຍຕໍ່ຜົນສຳເລັດໃນການນຳພາ – ຊີ້ນຳຂອງຄະນະນຳພະແນກ ແລະ ຄວາມເອົາໃຈໃສ່ໃນການປະຕິບັດວຽກງານຂອງພະນັກງານວິຊາການ ເພື່ອປະກອບສ່ວນພັດທະນາແຂວງສະຫວັນນະເຂດ ໃຫ້ມີໃບໜ້າໃໝ່. ແຕ່ຄຽງຄູ່ກັບຜົນສຳເລັດທີ່ຍາດມາໄດ້ນັ້ນ ພວກເຮົາກໍຕ້ອງໄດ້ເອົາໃຈໃສ່ຕື່ມຕໍ່ວຽກງານທີ່ຄົງຄ້າງ, ເຊື່ອມຊຶມຕໍ່ແນວທາງນະໂຍບາຍຂອງພັກ – ລັດຖະບານວາງອອກໃນແຕ່ລະໄລຍະ ແລະ ພ້ອມກັນສຸມໃສ່ຈັດຕັ້ງປະຕິບັດໜ້າທີ່ວິຊາສະເພາະຂອງຕົນຢ່າງຕັ້ງໜ້າ, ທັງນີ້ກໍເພື່ອພັດທະນາເສັ້ນທາງໃຫ້ເຂົ້າເຖິງປະຊາຊົນ ເຮັດໃຫ້ການຄົມມະນາຄົມຂົນສົ່ງ, ການໄປ – ມາຄ້າຂາຍມີຄວາມສະດວກສະບາຍຂຶ້ນກວ່າເກົ່າ ເຊິ່ງເປັນເງື່ອນໄຂສຳຄັນໃນການແກ້ໄຂຄວາມທຸກຍາກຂອງປະຊາຊົນບັນດາເຜົ່າພວກເຮົາ.