ໂຄງການເຂື່ອນ ໄຟຟ້ານໍ້າຊຳ 3 ເລີ່ມກັກເກັບນ້ຳ

16

 

ພິທີຕັນເຂື່ອນເພື່ອກັກເກັບນ້ຳ ໂຄງການກໍ່ສ້າງເຂື່ອນໄຟຟ້ານໍ້າຊຳ 3 ໄດ້ຈັດຂຶ້ນໃນຕອນເຊົ້າວັນທີ 15 ທັນວາ 2023 ທີ່ເມືອງຊໍາໃຕ້ ແຂວງຫົວພັນ ໂດຍມີ ທ່ານ ຄຳແພງ ໄຊສົມແພງ ເຈົ້າແຂວງຫົວພັນ, ທ່ານ ທອງຫວັງ ຄູນທອນຮຸ່ງມີໄຊ ເຈົ້າເມືອງຊຳໃຕ້, ທ່ານ ສົມລັດ ເມກອາກາດ ອຳນວຍການ ກຸ່ມບໍລິສັດ ພົງຊັບທະວີ ຈໍາກັດຜູ້ດຽວ, ມີຜູ້ຕາງໜ້າຈາກກະຊວງທີ່ກ່ຽວຂ້ອງ, ພະແນກການຂັ້ນແຂວງ, ປະທານສະພາບໍລິຫານ ກຸ່ມບໍລິສັດ ເອັດຊີໄອ ແລະ ຜູ້ພັດທະນາໂຄງການເຂົ້າຮ່ວມ.

ໂຄງການກໍ່ສ້າງເຂື່ອນໄຟຟ້ານ້ຳຊຳ 3 ແມ່ນໜຶ່ງໃນໂຄງການໄຟຟ້າທີ່ນອນໃນແຜນພັດທະນາດ້ານແຫຼ່ງພະລັງງານຂອງລັດຖະບານ ແຫ່ງ ສປປ ລາວ ເຊິ່ງມີກຳລັງຕິດຕັ້ງ 156 ເມກາວັດ( MW ) ສາມາດຜະລິດພະລັງງານໄຟຟ້າ ສະເລ່ຍ 700 ກິໂລວັດໂມງຕໍ່ປີ, ໂຄງການນີ້ໄດ້ເລີ່ມກໍ່ສ້າງມາແຕ່ປີ 2019 ເຖິງປັດຈຸບັນແມ່ນໃກ້ຈະສໍາເລັດແລ້ວ ມີມູນຄ່າໂຄງການ 357 ລ້ານໂດລາສະຫະລັດ ໂດຍແມ່ນ ບໍລິສັດ SCI ຈາກປະເທດ ສສ ຫວຽດນາມ ເປັນຜູ້ຮັບເໝົາກໍ່ສ້າງ.


ທ່ານ ສົມລັດ ເມກອາກາດ ອຳນວຍການ ກຸ່ມບໍລິດສັດ ພົງຊັບທະວີ ຈຳກັດຜູ້ດຽວ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງເຂື່ອນໄຟຟ້ານໍ້າຊຳ 3 ເມືອງຊຳໃຕ້ ແຂວງຫົວພັນ ແມ່ນໂຄງການກໍ່ສ້າງເຂື່ອນໄຟຟ້ານໍ້າຕົກຂະໜາດໃຫຍ່ທີ່ສຸດຂອງ ແຂວງຫົວພັນ ຄວາມສູງຂອງເຂື່ອນ 120,5 ແມັດ, ມີປະຕູປິດ – ເປີດ 3 ປ່ອງ, ອຸມົງມີ ຄວາມກວ້າງ 6,5 ແມັດ, ສູງ 7,5 ແມັດ ແລະ ມີຄວາມຍາວ 9 ກວ່າກິໂລແມັດ. ສຳລັບຂໍ້ສະດວກ ແລະ ບັນຫາທີ່ທ້າທາຍຫຼາຍຢ່າງໃນການກໍ່ສ້າງໂຄງການແຫ່ງນີ້ຊັກຊ້າ, ຍ້ອນວ່າໃນໄລຍະຜ່ານມາໄດ້ມີການແຜ່ລະບາດຂອງພະຍາດ ໂຄວິດ – 19 ເຮັດໃຫ້ການນຳເຂົ້າວັດສະດຸພົບຄວາມຫຍຸ້ງຍາກ, ແຕ່ເຖິງຢ່າງໃດກໍຕາມທາງບໍລິສັດຜູ້ຮັບເໝົາກໍໄດ້ເອົາໃຈໃສ່ຢ່າງສູງ ເພື່ອເຮັດໃຫ້ໂຄງການມີຜົນສຳເລັດ ແລະ ສາມາດເປີດພິທີກັກເກັບນ້ຳຂຶ້ນໃນວັນທີ 15 ທັນວາ 2023 ແລະ ຄາດວ່າຈະໃຫ້ສຳເລັດສົມບູນ ໃນ 4 ເຖິງ 5 ເດືອນຂ້າງໜ້າ.

[ ຮູບ – ຂ່າວ: ສົມສຸກ
ໄຊຍະວົງ ]