ອຸດົມໄຊ ກຽມຈັດງານບຸນປະເພນີບັນດາເຜົ່າ ສົ່ງເສີມປີທ່ອງທ່ຽວລາວ 2024

23

 

ແຂວງອຸດົມໄຊ ກຽມຈັດງານບຸນປະເພນີບັນດາເຜົ່າ ເພື່ອສົ່ງເສີມປີທ່ອງທ່ຽວລາວ 2024 ໂດຍຈະມີກິດຈະກຳຫຼາຍຢ່າງ ເປັນຕົ້ນແມ່ນວາງສະແດງ ແລະ ຈໍາໜ່າຍສິນຄ້າ; ຈັດການປະກວດຜະລິດຕະພັນກະສິກໍາ ເຊັ່ນ: ງົວງາມ ແລະ ພືດຜົນຜະລິດກະສິກໍາຕ່າງໆ; ຮັບຊົມກິດຈະກໍາຕ່າງໆຂອງ 4 ເຜົ່າ ຄື: ເຜົ່າກຶມມຸ, ເຜົ່າມົ້ງ, ເຜົ່າໄຕດໍາ ແລະ ເຜົ່າຫໍ້ ແລະ ກິດຈະກຳອື່ນໆອີກ.

ທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ ຖະແຫຼງກ່ຽວກັບການກະກຽມຈັດງານບຸນປະເພນີບັນດາເຜົ່າ ວ່າ: ໃນລະ ຫວ່າງວັນທີ 16 – 20 ມັງກອນ ປີ 2024 ອົງການປົກຄອງແຂວງອຸດົມໄຊ ຈະໄດ້ຈັດງານບຸນປະເພນີບັນດາເຜົ່າ ຂຶ້ນຢູ່ເດີ່ນສະໜາມກີລາແຂວງເທສະບານເມືອງໄຊ ແຂວງອຸດົມໄຊ, ງານບຸນປະເພນີບັນດາເຜົ່າຄັ້ງນີ້ ປະກອບມີ: ເຜົ່າກຶມມຸ, ເຜົ່າມົ້ງ, ເຜົ່າຫໍ້ ແລະ ເຜົ່າໄຕດໍາ ເຊິ່ງຜ່ານມາເຄີຍຈັດໃນໄລຍະເວລາໃກ້ຄຽງກັນ ຈັດພໍໃຜພໍລາວມາຈັດຮ່ວມກັນເປັນງານໃຫຍ່ເອີ້ນວ່າ: ງານບຸນປະເພນີບັນດາເຜົ່າ.

ຈຸດປະສົງ ແລະ ເປົ້າໝາຍຂອງການຈັດງານໃນຄັ້ງນີ້ ເພື່ອເປັນການສົ່ງເສີມ, ດຶງດູດນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ອງທ່ຽວລາວ, ທ່ອງທ່ຽວດ້ານວັດທະນະທໍາ, ທໍາມະຊາດຢູ່ແຂວງອຸດົມໄຊ ໃນປີ 2024 ໃຫ້ຫຼາຍຂຶ້ນ; ສົ່ງເສີມ, ປົກປັກຮັກສາ, ອະນຸລັກຮັກສາວັດທະນະທໍາຮີດຄອງປະເພນີອັນດີງາມຂອງປະຊາຊົນບັນດາເຜົ່າ ພ້ອມທັງເປັນການເຕົ້າໂຮມຄວາມສາມັກຄີປອງດອງບັນດາເຜົ່າ ພາຍໃນແຂວງໃຫ້ມີຄວາມແໜ້ນແຟ້ນຍິ່ງຂຶ້ນ.

ພາຍໃນງານຈະມີກິດຈະກຳຫຼາຍຢ່າງ ເປັນຕົ້ນງານວາງສະແດງ ແລະ ຈໍາໜ່າຍສິນຄ້າ, ຕະຫຼາດນັດຈາກພາຍໃນ ແລະ ຕ່າງປະເທດ; ຈັດການປະກວດຜະລິດຕະພັນກະສິກໍາ ເຊັ່ນ: ງົວງາມ ແລະ ພືດຜົນຜະລິດກະສິກໍາຕ່າງໆ; ຊົມບັນດາກິດຈະກໍາຕ່າງໆຂອງ 4 ເຜົ່າ ຄື: ເຜົ່າກຶມມຸ, ເຜົ່າມົ້ງ, ເຜົ່າໄຕດໍາ ແລະ ເຜົ່າຫໍ້ ເຊິ່ງສະແດງເຖິງວັດທະນະທໍາ, ວິຖີດໍາລົງຊີວິດ, ຮີດຄອງປະເພນີອັນດີງາມຂອງບັນດາເຜົ່າ; ຊົມການສະແດງງານຄອນເສີດ ນັກຮ້ອງທີ່ມີຊື່ສຽງຈາກພາຍໃນ ແລະ ຕ່າງປະເທດ ຕິດພັນກັບການປະກວດນາງສາວປີທ່ອງທ່ຽວ ແຂວງອຸດົມໄຊ 2024.

ທ່ານເຈົ້າແຂວງອຸດົມໄຊ ກ່າວອີກວ່າ: ແຂວງອຸດົມໄຊ ເປັນແຂວງໜຶ່ງທີ່ຕັ້ງຢູ່ໃຈກາງບັນດາແຂວງ 5 ແຂວງພາກເໜືອຂອງ ສປປ ລາວ, ມີເສັ້ນທາງຄົມມະນາຄົມເຊື່ອມຕໍ່ກັບບັນດາແຂວງພາກເໜືອ ແລະ ເຊື່ອມຕໍ່ອອກໄປສູ່ຕ່າງປະເທດ ເຊັ່ນ: ສສ ຫວຽດນາມ, ຣາຊະອານາຈັກໄທ ແລະ ສປ ຈີນ. ພິເສດແມ່ນມີເສັ້ນທາງລົດໄຟ ລາວ – ຈີນ ຜ່ານ 3 ເມືອງ ແລະ ມີ 3 ສະຖານີ, ມີສາຍການບິນພາຍໃນປະເທດ ເຊິ່ງມີ ຄວາມສະດວກຂຶ້ນຫຼາຍໃນການເດີນທາງເຂົ້າມາ ແຂວງອຸດົມໄຊ.

ແຂວງອຸດົມໄຊ ເປັນແຂວງພູດອຍ ປະກອບມີ 12 ຊົນເຜົ່າ ດໍາລົງຊີວິດຢູ່ຮ່ວມກັນ ເຊິ່ງແຕ່ລະເຜົ່າລ້ວນແຕ່ມີວັດທະນະທໍາຮີດຄອງປະເພນີອັນດີງາມ, ພາສາປາກເວົ້າທີ່ເປັນເອກະລັກສະເພາະຂອງຕົນເອງ. ພ້ອມນີ້, ກໍມີແຫຼ່ງທ່ອງທ່ຽວທາງທໍາມະຊາດ, ປະຫວັດສາດ ແລະ ວັດທະນະທໍາ ທີ່ມີຊື່ສຽງ ເຊັ່ນ: ສະຖານທີ່ທ່ອງທ່ຽວທໍາມະຊາດ ນໍ້າກັດຢໍລະປ່າ, ຖໍ້າຈອມອອງ, ວັດພະເຈົ້າສິງຄໍາ ເມືອງຫຼາ ເຊິ່ງມີນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ອງທ່ຽວນັບມື້ຫຼາຍຂຶ້ນຕາມຄໍາຂວັນທີ່ວ່າ: “ ທ່ຽວແຂວງອຸດົມໄຊ ໄປຊົມທໍາມະຊາດນໍ້າກັດຢໍລະປ່າ, ຊົມວັດທະນະທໍາບັນດາເຜົ່າ, ໄຫວ້ພະເຈົ້າສິງຄໍາ, ດື່ມນໍ້າຊາພັນປີ, ຂີ່ເຮືອຊົມທໍາມະຊາດແມ່ນໍ້າຂອງ ”.
[ ຂໍ້ມູນຈາກ:
ແຂວງອຸດົມໄຊ ]