ໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມ ເທສະບານເມືອງໄຊ ຄືບໜ້າ 40%

31

 

ໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມ ເທສະບານເມືອງໄຊ ແຂວງອຸດົມໄຊ ໄລຍະທີ 2 ມີລວງຍາວ 8.500 ແມັດ ມາຮອດປັດຈຸບັນການຈັດຕັ້ງປະຕິບັດແມ່ນມີຄວາມຄືບໜ້າກວ່າ 40% ເຊິ່ງຄາດວ່າກາງປີ 2024 ຈະສຳເລັດ.


ເມື່ອອາທິດຜ່ານມາ ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ ພ້ອມດ້ວຍຄະນະຮັບຜິດຊອບໂຄງການ ໄດ້ລົງຕິດຕາມ ຊຸກຍູ້ ການຈັດຕັ້ງປະຕິບັດໂຄງການຄຸ້ມຄອງ ຄວາມສ່ຽງໄພພິບັດນໍ້າຖ້ວມ ສັນຍາທີ 2 ຢູ່ເທສະບານ ເມືອງໄຊ ແຂວງອຸດົມໄຊ.
ທ່ານ ຄຳແສງ ອາລີ ຫົວໜ້າພະແນກໂຍທາທິການ ແລະ ຂົນສົ່ງ ລາຍງານວ່າ: ໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມເທສະບານເມືອງໄຊ ແຂວງອຸດົມໄຊ ໄລຍະທີ 2 ແມ່ນເລີ່ມແຕ່ ຂົວນໍ້າມາວ ບ້ານນາສ້າວ ຫາ ຂົວນໍ້າກໍ 2 ບ້ານເຈງ ເຊື່ອມໃສ່ກັບ ໄລຍະທີ 1 ເຂດສະໜາມກີລາແຂວງ ມີລວງຍາວ 8.500 ແມັດ ເຊິ່ງຮັບເໝົາກໍ່ສ້າງໂດຍ ບໍລິສັດ ກວ້າງຕຸ້ງ ເລກ 3 ຈາກ ສປ ຈີນ ລວມມູນຄ່າ 8,8 ລ້ານໂດລາສະຫະລັດ ໂດຍຈະໃຊ້ເວລາກໍ່ສ້າງ 24 ເດືອນ.

ໜ້າວຽກປະກອບມີ: ການກໍ່ສ້າງປ້ອງກັນຕາຝັ່ງເຈື່ອນຕາມແຄມນ້ຳກໍ, ສ້າງສວນສາທາລະນະ 1 ຈຸດ ຢູ່ເຂດບ້ານນາຫວານນ້ອຍ, ກໍ່ສ້າງປະຕູລະບາຍນ້ຳ ຈຳນວນ 21 ຈຸດ, ກໍ່ສ້າງເສັ້ນທາງລຽບແຄມນ້ຳ ແລະ ອື່ນໆ ທີ່ຕິດພັນກັບໂຄງການ. ມາຮອດປັດຈຸບັນການຈັດຕັ້ງປະຕິບັດແມ່ນມີຄວາມຄືບໜ້າກວ່າ 40%.
ສຳລັບວຽກທີ່ຈະສຸມໃສ່ໃນຕໍ່ໜ້າ ແມ່ນການວາງຫີນສະຫຼົບ ພັກທີ 2, ການກໍ່ສ້າງເສັ້ນທາງ ແລະ ວຽກເຟີນີເຈີຈຳນວນໜຶ່ງ ໃສ່ສວນສາທາລະນະ ຄາດວ່າກາງປີ 2024 ຈະໃຫ້ສຳເລັດ.


ທ່ານ ສົມຈິດ ປັນຍາສັກ ຮອງເຈົ້າແຂວງອຸດົມໄຊ ຜູ້ຊີ້ນຳໂຄງການ ໄດ້ຮຽກຮ້ອງມາຍັງປະຊາຊົນ ຈົ່ງພ້ອມກັນຮ່ວມມືແກ່ໂຄງການ ພ້ອມທັງເບິ່ງແຍງລູກຫຼານຂອງຕົນເອງ ບໍ່ໃຫ້ລົງຫຼິ້ນນ້ຳເຂດກໍ່ສ້າງຂອງໂຄງການ ເພື່ອປ້ອງກັນອຸບັດເຫດ ກໍຄືເພື່ອຄວາມປອດໄພໃນໄລຍະການຈັດຕັ້ງປະຕິບັດໂຄງການ.
[ ຂ່າວ: ໄມພອນ ]