ລົງທຶນ 100 ລ້ານໂດລາ ພັດທະນາຈຸດຄ່ຽນຖ່າຍສິນຄ້າ ສະຖານີໂພນໂຮງ

76

 

ບໍລິສັດ ລາວວີພີໂລຈິສຕິກ ເຊັນເຕີ ໄດ້ລົງທຶນ 100 ລ້ານໂດລາ ພັດທະນາຈຸດຄ່ຽນຖ່າຍສິນຄ້າ ສະຖານີລົດໄຟໂພນໂຮງ ໂດຍໄດ້ລົງມືບຸກເບີກພື້ນທີ່ ແລະ ກໍ່ສ້າງນັບແຕ່ເດືອນພະຈິກ 2022 ເປັນຕົ້ນມາ.

ທ່ານ ພິມພອນ ສຸດທິວົງ ຮອງປະທານ ບໍລິສັດ ລາວວີພີໂລຈິສຕິກ ເຊັນເຕີ ຈຳກັດຜູ້ດຽວ ລາຍງານໃນໂອກາດທີ່ ທ່ານ ທອງລຸນ ສີສຸລິດ ປະທານປະເທດເຄື່ອນໄຫວຢ້ຽມຢາມ ໂຄງການພັດທະນາຈຸດຄ່ຽນຖ່າຍສິນຄ້າ ສະຖານີໂພນໂຮງ ແຂວງວຽງຈັນ ວ່າ: ໂຄງການພັດທະນາຈຸດຄ່ຽນຖ່າຍສິນຄ້າ ສະຖານີໂພນໂຮງ ຕັ້ງຢູ່ບ້ານນ້ຳລິນເມືອງໂພນໂຮງ ແຂວງ ວຽງຈັນ ຄາດວ່າມູນຄ່າການລົງທຶນ ປະມານ 100 ລ້ານໂດລາສະຫະລັດ ເຊິ່ງເປັນການລົງທຶນຂອງນັກລົງທຶນພາຍໃນ, ມີເນື້ອທີ່ພັດທະນາທັງໝົດ 150 ເຮັກຕາ. ໃນນີ້, ເນື້ອທີ່ຈຳນວນໜຶ່ງແມ່ນເຊົ່າທີ່ດິນຂອງລັດ, ເປັນເສັ້ນທາງເຊື່ອມຕໍ່ລະຫວ່າງ ສະຖານີທາງດ່ວນໂພນໂຮງ ເສັ້ນທາງເລກທີ 13 ເໜືອ ແລະ ສະຖານີຂົນສົ່ງໂດຍສານລົດໄຟ ລາວ – ຈີນ ສະຖານີໂພນໂຮງ ແຂວງວຽງຈັນ.

ໂຄງການດັ່ງກ່າວ ແມ່ນເພື່ອສົ່ງເສີມການຜະລິດເປັນສິນຄ້າສົ່ງອອກ, ເຊື່ອມຕໍ່ການຄ້າລະຫວ່າງພາຍໃນກັບສາກົນໃຫ້ສະດວກຂຶ້ນ ດ້ວຍການປັບປຸງລະບົບການໃຫ້ບໍລິການທີ່ມີຄວາມສະດວກ, ກະທັດຮັດ, ຫຼຸດຜ່ອນເວລາຂົນສົ່ງ ແລະ ຄ່າໃຊ້ຈ່າຍຕ່າງໆຂອງຫົວໜ່ວຍທຸລະກິດພາຍໃນ; ສ້າງລະບົບສາງພາງ ແລະ ຈຸດຄ່ຽນຖ່າຍສິນຄ້າທີ່ມີຄວາມທັນສະໄໝ ອໍານວຍຄວາມສະດວກໃຫ້ການນໍາເຂົ້າ ແລະ ສົ່ງອອກເປັນລະບົບຄົບຊຸດ, ສະດວກໃນການຄຸ້ມຄອງ, ການເກັບລາຍຮັບເຂົ້າງົບປະມານ ປະກອບສ່ວນສ້າງພື້ນຖານເສດຖະກິດໃຫ້ເມືອງໂພນໂຮງ ເປັນເຂດພັດທະນາໃໝ່ ໂດຍການພັດທະນາກິດຈະການປິ່ນອ້ອມພາຍໃນໂຄງການ ເປັນຕົ້ນ ເຂດການຄ້າ – ການບໍລິການ, ເຂດທີ່ຢູ່ອາໄສ, ເຂດການສຶກສາ, ເຂດອຸດສາຫະກໍາ, ເຂດສາງສິນຄ້າ ແລະ ສໍານັກງານບໍລິສັດຂົນສົ່ງ, ເຂດສາງນໍ້າມັນ ແລະ ແກ໊ສ, ເຂດສະຖານີຄ່ຽນຖ່າຍສິນຄ້າ.

ທ່ານ ພິມພອນ ສຸດທິວົງ ຍັງໃຫ້ຮູ້ອີກວ່າ: ໂຄງການພັດທະນາຈຸດຄ່ຽນຖ່າຍສິນຄ້າ ສະຖານີໂພນໂຮງ ພາຍຫຼັງໄດ້ຮັບອະນຸຍາດຈາກພາກສ່ວນກ່ຽວຂ້ອງ ກໍໄດ້ລົງມືບຸກເບີກພື້ນທີ່ ແລະ ກໍ່ສ້າງນັບແຕ່ເດືອນພະຈິກ 2022 ເປັນຕົ້ນມາ; ໃນນີ້ ໄດ້ສໍາເລັດການກໍ່ສ້າງອາຄານຫ້ອງການຂອງໂຄງການ ສ້າງເດີ່ນເກັບມ້ຽນສິນຄ້າ, ກໍ່ສ້າງອາຄານໃຫ້ບໍລິການແຈ້ງພາສີ ( ປັດຈຸບັນກໍາລັງຕົກແຕ່ງພາຍໃນ ), ກະກຽມພື້ນທີ່ສ້າງອາຄານສົ່ງເສີມການລົງທຶນ, ກໍ່ສ້າງເສັ້ນທາງພາຍໃນໂຄງການ, ດໍາເນີນຂັ້ນຕອນການຫັນປະເພດທີ່ດິນຈາກດິນກະສິກໍາ ມາເປັນດິນປຸກສ້າງໃຫ້ສອດຄ່ອງກັບລະບຽບກົດໝາຍຂອງ ສປປ ລາວ.