ປີ 2023 ສ່ວຍສາອາກອນ ເກັບລາຍຮັບໄດ້ເກີນແຜນ

25

 

ປີ 2023 ສ່ວຍສາອາກອນ ສາມາດເກັບລາຍຮັບໄດ້ທັງໝົດ 25.238 ຕື້ກີບ ເທົ່າກັບ 110% ຂອງແຜນການປີ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 22%.

ກອງປະຊຸມ ສະຫຼຸບການຈັດຕັ້ງປະຕິບັດວຽກງານສ່ວຍສາອາກອນທົ່ວປະເທດ ປະຈໍາປີ 2023 ແລະ ທິດທາງແຜນປີ 2024 ຈັດຂຶ້ນໃນວັນທີ 14 – 15 ທັນວາ 2023 ຢູ່ກະຊວງການເງິນໂດຍການເປັນປະທານຂອງ ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ; ມີບັນດາຫົວໜ້າສ່ວຍສາອາກອນປະຈຳ ແຂວງ, ນະຄອນຫຼວງ, ປະຈຳເມືອງເຂົ້າຮ່ວມ ເພື່ອລາຍງານການຈັດຕັ້ງປະຕິບັດການຈັດເກັບລາຍຮັບອາກອນຢູ່ສູນກາງ ແລະ ທ້ອງຖິ່ນໃນຂອບເຂດທົ່ວປະເທດ ແລະ ປຶກສາຫາລືແຜນການຈັດເກັບລາຍຮັບອາກອນໃນປີ 2024 ເພື່ອຮັບປະກັນໃຫ້ການເກັບລາຍຮັບຈາກອາກອນ ສາມາດປະຕິບັດໄດ້ຕາມເປົ້າໝາຍວາງໄວ້.


ທ່ານ ບຸນປະເສີດ ກຸນລະບຸດ ໄດ້ໃຫ້ຮູ້ວ່າ: ໃນໄລຍະ 1 ປີທີ່ຜ່ານມາ ເປັນປີທີ່ຂຸ້ນຂ້ຽວການຈັດຕັ້ງປະຕິບັດວຽກງານ ແລະ ມີຫຼາຍເຫດການ, ສະພາບເສດຖະກິດມີຜົນກະທົບຕໍ່ການຈັດຕັ້ງປະຕິບັດການເກັບລາຍຮັບ ແລະ ເປັນປີສຸດທ້າຍຂອງການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ, ພ້ອມທັງສຸມໃສ່ບັນດາມະຕິຄຳສັ່ງຂອງຂັ້ນເທິງ, ແຜນພັດທະນາຂະແໜງສ່ວຍສາອາກອນ ແຕ່ປີ 2021 – 2025 ແລະ ແຜນພັດທະນາເສດຖະກິດ – ສັງຄົມແຫ່ງລັດ 5 ປີ.

ໃນປີ 2023 ນີ້, ສາມາດເກັບລາຍຮັບໄດ້ທັງໝົດ 25.238 ຕື້ກີບ ເທົ່າກັບ 110% ຂອງແຜນການປີ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 22% ເປັນເງິນ 4.521 ຕື້ກີບ. ໃນນັ້ນ, ລາຍຮັບສ່ວຍສາອາກອນ ສາມາດເກັບໄດ້ 16.958 ຕື້ກີບ ເທົ່າກັບ 98% ຂອງແຜນການປີ ທຽບໄລຍະດຽວກັນຂອງປີຜ່ານມາ ເພີ່ມຂຶ້ນ 21% ເປັນເງິນ 2.921 ຕື້ກີບ, ລາຍຮັບຊັບສິນເກັບໄດ້ 6.973 ຕື້ກີບ ເທົ່າກັບ 162% ຂອງແຜນການປີ ທຽບໄລຍະດຽວກັນຂອງປີຜ່ານມາ ເພີ່ມຂຶ້ນ 44% ເປັນເງິນ 2.143 ຕື້ກີບ ແລະ ກົມປະຕິຮູບລັດວິສາຫະກິດ ແລະ ການປະກັນໄພ ເກັບໄດ້ 1.306 ຕື້ກີບ ເທົ່າກັບ 112% ຂອງແຜນການປີ ທຽບໃສ່ໄລຍະດຽວກັນຂອງປີຜ່ານມາ ຫຼຸດລົງ 29,4% ເປັນເງິນ 543 ຕື້ກີບ.


ແນວໃດກໍຕາມ, ການເກັບລາຍຮັບປະຈໍາປີ 2023 ສາມາດຍາດໄດ້ຜົນສໍາເລັດດັ່ງກ່າວ ຍ້ອນຄະນະພັກ – ຄະນະນໍາກະຊວງການເງິນ ເອົາໃຈໃສ່ນຳພາ – ຊີ້ນຳຂະແໜງສ່ວຍສາອາກອນ ໂດຍສະເພາະແມ່ນພະນັກງານສ່ວຍສາອາກອນທົ່ວສູນກາງ, ແຂວງ ແລະ ບັນດາເມືອງໃນຂອບເຂດທົ່ວປະເທດ ຮ່ວມກັບ ບັນດາຂະແໜງການທີ່ກ່ຽວຂ້ອງພວກເຮົາ ໄດ້ພ້ອມກັນເປັນກຳລັງແຮງໃນການຈັດຕັ້ງປະຕິບັດວຽກງານ ແລະ ສຸມໃສ່ຈັດຕັ້ງປະຕິບັດບັນດາມະຕິຄຳສັ່ງຕ່າງໆຢ່າງເຂັ້ມງວດ.

ພ້ອມນີ້, ກອງປະຊຸມຍັງໄດ້ຮັບຟັງລາຍງານຈາກບັນດາທ້ອງຖິ່ນ, ໄດ້ປຶກສາຫາລືຫຼາຍບັນຫາກ່ຽວກັບການຂະຫຍາຍລາຍຮັບ ແລະ ການລົງສໍາຫຼວດຫົວໜ່ວຍທຸລະກິດທີ່ເກີດໃໝ່ ຫຼື ຢຸດເຊົາກິດຈະການ, ການເອົາຫົວໜ່ວຍເຂົ້າໃນລະບົບ TaxRIS ໃຫ້ໄດ້ 100%; ການຍື່ນບົດລາຍງານການເງິນປະຈຳປີ ແລະ ການສົມທົບກັບຂະແໜງການຄ້າ ກວດກາ ບັນດາຫົວໜ່ວຍທຸລະກິດທີ່ຍັງບໍ່ທັນໄດ້ຢັ້ງຢືນໃນລະບົບ ERC; ການຄຸ້ມຄອງ, ຕິດຕາມ ການແຈ້ງມອບອາກອນຂອງຫົວໜ່ວຍວິສາຫະກິດໃຫ້ຖືກຕ້ອງຄົບຖ້ວນ ແລະ ການຄຸ້ມຄອງການຈັດເກັບອາກອນທີ່ດິນ, ຄ່າທໍານຽມທາງ ແລະ ຄ່າບໍລິການ ແລະ ອື່ນໆ.
[ ທີ່ມາ: ກະຊວງການເງິນ ]