ແຂວງຫົວພັນ ປະກາດແຕ່ງຕັ້ງ, ຍົກຍ້າຍ, ສັບຊ້ອນພະນັກງານຂັ້ນນຳພາ – ຄຸ້ມຄອງ

15

 

ພິທີປະກາດ, ແຕ່ງຕັ້ງ, ຍົກຍ້າຍ, ສັບຊ້ອນພະນັກງານຂັ້ນນຳພາ – ຄຸ້ມຄອງ ແລະ ປະກາດພະນັກງານຂັ້ນນຳພາ – ຄຸ້ມຄອງ ເຂົ້າຮັບເບ້ຍບຳນານ ຂອງແຂວງຫົວພັນ ໄດ້ຈັດຂຶ້ນວັນທີ 13 ທັນວາ 2023 ທີ່ຫ້ອງປະຊຸມຫ້ອງວ່າການແຂວງ ໂດຍມີ ທ່ານ ຄຳແພງ ໄຊສົມແພງ ເຈົ້າແຂວງຫົວພັນ; ບັນດາທ່ານການນຳຂັ້ນແຂວງ, ຂັ້ນເມືອງ, ພະແນກການອ້ອມຂ້າງແຂວງ, ພະນັກງານວິຊາການຈາກບັນດາພະແນກການອ້ອມຂ້າງແຂວງ ເຂົ້າຮ່ວມ.

ທ່ານ ນາງ ລ້ອງຄຳ ພອນມີໄຊ ຫົວໜ້າຄະນະຈັດຕັ້ງແຂວງ ໄດ້ຜ່ານລາຍຊື່ການແຕ່ງຕັ້ງ ແລະ ຍົກຍ້າຍບ່ອນປະຈຳການໃໝ່ ຂອງບັນດາທ່ານກຳມະການພັກແຂວງ ເຊິ່ງໄດ້ຍົກຍ້າຍ ແລະ ແຕ່ງຕັ້ງ ທ່ານ ທອງສຸກ ສົມພາວັນ ເຈົ້າເມືອງແອດ ມາເປັນຫົວໜ້າພະແນກອຸດສາຫະກຳ ແລະ ການຄ້າແຂວງ, ຍົກຍ້າຍ ແລະ ແຕ່ງຕັ້ງ ທ່ານ ບຸນວິໄຊ ກົງປາລີ ເຈົ້າເມືອງຮ້ຽມ ມາເປັນຫົວໜ້າຫ້ອງວ່າການແຂວງ, ຍົກຍ້າຍ ແລະ ແຕ່ງຕັ້ງ ທ່ານ ອ່ອນພັນ ທອງທິດາ ເຈົ້າເມືອງຫົວເມືອງ ມາເປັນເຈົ້າເມືອງຊຳເໜືອ.


ຍົກຍ້າຍ ແລະ ແຕ່ງຕັ້ງ ທ່ານ ດາວເພັດ ພົມສຸວັນ ເຈົ້າເມືອງກວັນ ມາເປັນຫົວໜ້າອົງການໄອຍະການແຂວງ, ຍົກຍ້າຍແຕ່ງຕັ້ງ ທ່ານ ອານຸເດດ ສີຄຳໄຊ ຫົວໜ້າຫ້ອງວ່າການແຂວງ ເປັນຫົວໜ້າພະແນກຍຸຕິທຳແຂວງ, ຍົກຍ້າຍ ທ່ານ ອານົງລັກ ແສງສຸລິຍາ ເຈົ້າເມືອງຊຳເໜືອ ມາເປັນຮອງປະທານແນວລາວສ້າງຊາດແຂວງ, ຍົກຍ້າຍ ແລະ ແຕ່ງຕັ້ງ ທ່ານ ສົມພອນ ອີນຄະວິໄລ ຫົວໜ້າພະແນກຍຸຕິທຳແຂວງ ເປັນຮອງປະທານແນວລາວສ້າງຊາດແຂວງ.

ຍົກຍ້າຍ ແລະ ແຕ່ງຕັ້ງ ທ່ານ ໄມເລີຍ ພິມມະສອນ ຮອງຫົວໜ້າພະແນກແຜນການ ແລະ ການລົງທຶນແຂວງ ເປັນເຈົ້າເມືອງຫົວເມືອງ, ຍົກຍ້າຍ ແລະ ແຕ່ງຕັ້ງ ທ່ານ ສຸກສົມພັນ ແກ້ວມີໄຊ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງ ເປັນເຈົ້າເມືອງກວັນ, ຍົກຍ້າຍ ທ່ານ ກິ່ງເພັດ ບົວລະພັນ ຫົວໜ້າອົງການໄອຍະການປະຊາຊົນແຂວງ ໄປຮັບໜ້າທີ່ໃໝ່ຢູ່ອົງການໄອຍາການປະຊາຊົນສູງສຸດ, ຍົກຍ້າຍ ແລະ ແຕ່ງຕັ້ງ ທ່ານ ບົວລຽນ ພອນຄຳມາ ຮອງຫົວໜ້າພະແນກຍຸຕິທຳແຂວງ ເປັນຮອງຫົວໜ້າອົງການກາແດງແຂວງ ຫົວພັນ ແລະ ແຕ່ງຕັ້ງ ທ່ານ ນາງ ພຸດສະດາ ພິມສຸບັດ ຫົວ ໜ້າຂະແໜງບໍລິຫານຫ້ອງວ່າການແຂວງ ຂຶ້ນເປັນ ຮອງຫ້ອງວ່າການປົກຄອງແຂວງ.


ຜ່ານລາຍຊື່ພະນັກງານຂັ້ນນຳພາ – ຄຸ້ມຄອງອອກຮັບເບ້ຍບຳນານ ຈຳນວນ 2 ທ່ານ ຄື: ທ່ານ ພອນຈັນ ຂະທຸມພົມ ອະດີດເຈົ້າເມືອງຊຳໃຕ້ ແລະ ທ່ານ ວັນແສງ ຄຳມັງໄຊ ອະດີດຫົວໜ້າພະແນກອຸດສາຫະກຳ ແລະ ການຄ້າ ແຂວງຫົວ ພັນ.

ໂອກາດນີ້, ທ່ານ ຄຳແພງ ໄຊສົມແພງ ເຈົ້າແຂວງຫົວພັນ ໄດ້ສະແດງຄວາມຊົມເຊີຍຕໍ່ບັນດາຜົນງານຕ່າງໆທີ່ບັນດາທ່ານໄດ້ຈັດຕັ້ງປະຕິບັດ ແລະ ນຳພາ – ຊີ້ນຳ ເຊິ່ງມີຜົນງານອັນໂດດເດັ່ນຫຼາຍດ້ານ ແລະ ມີຜົນສຳເລັດໃນໄລຍະຜ່ານມາ ເຮັດໃຫ້ສະພາບພາຍໃນພະແນກກໍຄືພາຍໃນເມືອງ ໄດ້ມີການຂະຫຍາຍຕົວ ແລະ ພັດທະນາດີຂຶ້ນ. ພ້ອມທັງຮຽກຮ້ອງໃຫ້ບັນດາສະຫາຍທີ່ຖືກຍົກຍ້າຍແຕ່ງຕັ້ງໃນຄັ້ງນີ້ ຈົ່ງພ້ອມກັນສຸມສະຕິປັນຍາ ຄວາມຮູ້, ຄວາມສາມາດ ແລະ ປະສົບການເຂົ້າໃນການຈັດຕັ້ງປະຕິບັດໜ້າທີ່ດ້ວຍຄວາມບໍລິສຸດ, ເຕົ້າໂຮມຄວາມສາມັກຄີກັບໝູ່ຄະນະໃຫ້ມີຄວາມເປັນເອກະພາບກັນ ຜ່ານຜ່າຂໍ້ຫຍຸ້ງຍາກ ແລະ ສິ່ງທົດສອບຕ່າງໆ ເພື່ອດຶງດູດເອົາການຊ່ວຍເຫຼືອ ແລະ ສະໜັບສະໜູນຈາກພາຍນອກມາພັດທະນາແຂວງຫົວ ພັນ ໃຫ້ມີຄວາມກ້າວໜ້າຍິ່ງໆຂຶ້ນ.