ແຂວງໄຊຍະບູລີ ຈະຈັດບຸນຊ້າງ ພ້ອມກັບການເປີດ ປີທ່ອງທ່ຽວລາວ 2024 ໃນກາງເດືອນກຸມພາ

50

 

ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ປະທານຈັດງານບຸນຊ້າງ ປະຈໍາປີ 2024 ໄດ້ຖະແຫຼງຂ່າວຕໍ່ສື່ມວນຊົນ ໃນວັນທີ 13 ທັນວາ 2023 ວ່າ: ແຂວງໄຊຍະບູລີ ຈະຈັດມະຫະກຳບຸນຊ້າງ ໄປພ້ອມກັບການເປີດປີທ່ອງທ່ຽວລາວ 2024.
ການຈັດມະຫະກໍາບຸນຊ້າງໃນປີນີ້ ຈະມີກິດຈະກຳທີ່ຕິດພັນກັບປີທ່ອງທ່ຽວລາວ 2024 ຢູ່ແຂວງໄຊຍະບູລີ ທັງໝົດ 12 ກິດຈະກໍາ ຄື: ກິດຈະກໍາລະດັບຊາດ ແມ່ນກໍານົດເອົາມະຫະກໍາບຸນຊ້າງ ປະຈໍາປີ 2024 ແລະ ເປັນພິທີເປີດປີທ່ອງທ່ຽວລາວ 2024 ຂອງແຂວງ.

ກິດຈະກໍາລະດັບແຂວງ ແມ່ນກໍານົດເອົາເທສະການບຸນກອງເຂົ້າໃຫຍ່ ເມືອງພຽງ ໃນວັນທີ 9 – 12 ມັງກອນ 2024, ເປີດແຫຼ່ງທ່ອງທ່ຽວສູນອະນຸຮັກຊ້າງພູແຄນ ໃນເດືອນກຸມພາ 2024. ກິດຈະກໍາລະດັບເມືອງມີ 10 ກິດຈະກໍາ.
ສຳລັບການຈັດມະຫະກໍາບຸນຊ້າງແຂວງໄຊຍະບູລີ ໃນປີ 2024 ນີ້ ຖືວ່າເປັນຄັ້ງທີ 17 ພວກເຮົາຈະໄດ້ຈັດເປັນງານໃຫຍ່ ເຊິ່ງຈະປະກອບມີກິດຈະກຳຕ່າງໆ ດັ່ງນີ້:


– ວັນທີ 12 ກຸມພາ 2024 ເປີດງານຕະຫຼາດນັດວາງສະແດງສິນຄ້າທັງພາຍໃນ ແລະ ຕ່າງປະເທດ.
– ໃນຕອນຄໍ່າຂອງວັນທີ 12 – 13 ກຸມພາ 2024 ຈະມີການສະແດງສິລະປະວັນນະຄະດີ ມີ 12 ຄະນະ, 36 ລາຍການ ( ຄືນລະ 18 ລາຍການ ) ແລະ ຈັດການສະແດງຄອນເສີດຂອງວົງດົນ ຕີ – ນັກຮ້ອງທີ່ມີຊື່ສຽງທີ່ຈະໄດ້ເຊີນມາຈາກນະຄອນຫຼວງວຽງຈັນ.
– ວັນທີ 14 – 15 ກຸມພາ 2024 ຊ້ອມໃຫຍ່ຂະບວນແຫ່ກ້ອນສະແດງຕ່າງໆໃນພິທີເປີດງານ, ໃນຕອນຄໍ່າຂອງວັນທີ 14 ກຸມພາ 2024 ຈະມີການແຂ່ງຂັນປະກວດນັກຮ້ອງສຽງດີ ແລະ ດົນຕີພື້ນເມືອງ, ໃນຕອນຄໍ່າຂອງວັນທີ 15 ກຸມພາ 2024 ປະກວດນາງສາວງາມທິດາບຸນຊ້າງ.

– ວັນທີ 16 ກຸມພາ 2024 ພິທີຕັກບາດອຸທິດສ່ວນກຸສົນໃຫ້ຊ້າງ ແລະ ກວດກາ ຄວາມພ້ອມຮອບດ້ານ; ໃນຕອນຄໍ່າຈັດການແຂ່ງຂັນຕີກອງຫາງ.
– ວັນທີ 17 ກຸມພາ 2024 ເປີດມະຫະກໍາບຸນຊ້າງ ແລະ ເປີດປີທ່ອງທ່ຽວລາວ 2024 ຢູ່ແຂວງໄຊຍະບູລີ ຢ່າງເປັນທາງການ ແລະ ຊົມການສະແດງໂດດຈ້ອງ.
– ວັນທີ 18 ກຸມພາ 2024 ສືບຕໍ່ກິດຈະກໍາທີ່ຕິດພັນກັບຊ້າງ ແລະ ການອະນຸຮັກຊ້າງ ໂດຍສະເພາະການສະແດງຂອງຊ້າງຄຳຮູ້, ການໃຫ້ອາຫານຊ້າງ, ການບໍລິການຂີ່ຊ້າງ, ການສະແດງສິລະປະວັນນະຄະດີ; ໃນຕອນຄໍ່າ ຊົມການສະແດງກາຍະສິນຈາກກອງກາຍະສິນແຫ່ງຊາດ.


ສໍາລັບກິດຈະກຳປິ່ນອ້ອມ ມີຄື: ກິດຈະກໍາທາງດ້ານກີລາວັນທີ 12 ກຸມພາ 2024 ກິດຈະກໍາຍ່າງເພື່ອການກຸສົນຈາກເດີ່ນກີລາຮົ່ມຂອງແຂວງ ຫາ ເດີ່ນສະໜາມຫຼວງ ຫາ ສະຖານທີ່ຈັດງານຕະຫຼາດນັດ ( ໃນມື້ເປີດງານຕະຫຼາດນັດ ); ວັນທີ 14 ກຸມພາ 2024 ກິດຈະກໍາແຂ່ງຂັນຟຸດຊໍ, ກິດຈະກໍາດ້ານການທ່ອງທ່ຽວ ມີຄື: ກາບໄຫວ້ບູຊາວັດສີບຸນເຮືອງ ( ບ້ານໃຫຍ່ ), ຫໍຫຼັກເມືອງ ແລະ ວັດພູທອກ, ທ່ຽວຊົມສູນອະນຸຮັກຊ້າງລາວ ( ອ່າງນ້ຳຕຽນ ), ສູນອະນຸຮັກ ແລະ ຂະຫຍາຍພັນຊ້າງອາຊີ ( ຢູ່ພູແຄນ ) ແລະ ມູນນິທິອະນຸຮັກສັດ ແລະ ສິ່ງແວດລ້ອມລາວ ( ບ້ານນາຕໍໃຫຍ່ ), ຢ້ຽມຊົມຫໍສະໝຸດຊ້າງ ແລະ ກິດຈະກຳອະນຸຮັກຊ້າງຢູ່ສູນອະນຸຮັກຊ້າງນໍ້າຕຽນ.
ນອກຈາກນີ້, ຍັງມີກິດຈະກໍາແຂ່ງຂັນແຕ້ມຮູບ ແລະ ພັດກ໋ອບ ເພື່ອສ້າງທັກສະ ແລະ ສ້າງຈິດສໍານຶກກ່ຽວກັບຊ້າງໃຫ້ເຍົາວະຊົນ, ຊາວໜຸ່ມ ທີ່ສະໜາມຊ້າງນ້ອຍກ໋ອບ.

ພ້ອມກັນນີ້, ໄດ້ມີຄວາມພ້ອມບໍລິການເຕັ້ນນອນຢູ່ແຄມນໍ້າຮຸ່ງສໍາລັບນັກທ່ອງທ່ຽວ, ຂີ່ເຮືອຊົມວິວນ້ຳຂອງ ( ບ້ານທ່າເດື່ອ ). ຄຽງຄູ່ກັນນັ້ນ, ແຂວງໄຊຍະບູລີ ກໍໄດ້ຈັດຝຶກອົບຮົມດ້ານການບໍລິການຮ້ານອາຫານ, ບ່ອນພັກເຊົາ ແລະ ສະຖານທີ່ບໍລິການຕ່າງໆໃຫ້ມີຄວາມສະອາດປອດໄພ, ໄດ້ຄວບຄຸມລາຄາສິນຄ້າທີ່ສົມເຫດສົມຜົນ ເພື່ອຕອບສະໜອງໃຫ້ແກ່ແຂກ ແລະ ນັກທ່ອງທ່ຽວທີ່ໄດ້ມາທ່ຽວຊົມງານມະຫະກໍາບຸນຊ້າງຂອງພວກເຮົາໃນຄັ້ງນີ້ ໃຫ້ມີຄວາມປະທັບໃຈ.


ໃນໂອກາດທີ່ມີຄວາມໝາຍສໍາຄັນນີ້ ຕາງໜ້າອົງການປົກຄອງແຂວງໄຊຍະບູລີ ແລະ ໃນນາມປະທານຄະນະຮັບຜິດຊອບຈັດມະຫະກຳບຸນຊ້າງ ແລະ ການເປີດປີທ່ອງທ່ຽວລາວ 2024 ຂອງແຂວງໄຊຍະບູລີ, ຂ້າພະເຈົ້າ ຖືໂອກາດນີ້ຂໍເຊີນຊວນບັນດາທ່ານແຂກທີ່ມີກຽດ ທ່ານຍິງ, ທ່ານຊາຍ, ນັກທ່ອງທ່ຽວຈາກພາຍໃນ ແລະ ຕ່າງປະເທດເຂົ້າມາທ່ຽວຊົມງານມະຫະກຳບຸນຊ້າງຢູ່ແຂວງໄຊຍະບູລີຂອງພວກເຮົາ ຕາມກຳນົດເວລາດັ່ງກ່າວ.
[ ຂ່າວ: ມະໄລວັນ ]