ຫາລືຊຸກຍູ້ສົ່ງເສີມ ການຜະລິດພືດຜັກເປັນສິນຄ້າ

29

 

ຂະແໜງປູກຝັງ ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ຮ່ວມກັບ ຕະຫຼາດລາວ ຂາຍຍົກ – ຂາຍຍ່ອຍ ຈຳກັດ ໄດ້ຈັດກອງປະຊຸມຄົ້ນຄວ້າປຶກສາຫາລືການຊຸກຍູ້ສົ່ງເສີມການຜະລິດພືດຜັກເປັນສິນຄ້າ ເພື່ອຫຼຸດຜ່ອນການນຳເຂົ້າຢູ່ນະຄອນຫຼວງ ວຽງຈັນ ຂຶ້ນໃນວັນທີ 14 ທັນວາ 2023.

ເປັນປະທານຂອງ ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກຳ ແລະ ປ່າໄມ້, ມີທ່ານ ພູຂົງ ບັນນາວົງ ຮອງເຈົ້າຄອງນະຄອນຫຼວງວຽງຈັນ, ທ່ານ ວາດສະໜາ ສີຈະເລີນ ຮອງຫົວໜ້າພະແນກກະສິກຳ ແລະ ປ່າໄມ້ ນວ, ທ່ານ ບຸນທ່ຽງ ລັດຕະນະວົງ ປະທານສະມາຄົມຜະລິດ ແລະ ປຸງແຕ່ງກະສິກຳລາວ; ມີຫ້ອງການກະສິກຳບັນດາເມືອງ ແລະ ແຂກຖືກເຊີນຈາກພາກສ່ວນກ່ຽວຂ້ອງເຂົ້າຮ່ວມ.

ທ່ານ ວາດສະໜາ ສີຈະເລີນ ຮອງຫົວໜ້າພະແນກ ກະສິກຳ ແລະ ປ່າໄມ້ ນວ ກ່າວວ່າ: ອີງໃສ່ຄາດໝາຍດ້ານການປູກຝັງ ຂອງນະຄອນຫຼວງວຽງຈັນ ໃນປີ 2023 ແມ່ນຈະຜະລິດເຂົ້າໃຫ້ໄດ້ 306.084 ໂຕນ, ພືດຜັກ 117.627 ໂຕນ, ໄມ້ໃຫ້ໝາກ 75.682 ໂຕນ, ມັນຕົ້ນ 99.295 ໂຕນ, ສາລີອາຫານສັດ 5.424 ໂຕນ, ຜັກອິນຊີ 4.292 ໂຕນ.

ປັດຈຸບັນຢູ່ນະຄອນຫຼວງວຽງຈັນ ມີກຸ່ມຜະລິດຜັກກະສິກຳສະອາດ ຄື:
1). ກຸ່ມປູກຜັກກະສິກຳອິນຊີ ( OA ) ຈຳນວນ 11 ກຸ່ມ ມີສະມາຊິກທັງໝົດ 305 ຄອບຄົວ ເນື້ອທີ່ 257 ເຮັກຕາ ແລະ ຜົນຜະລິດໄດ້ 1.515 ໂຕນ.
2). ຜັກກະສິກຳທີ່ດີ ( GAT ) ມີ 34 ກຸ່ມ ຈຳນວນ 774 ຄອບຄົວ ມີເນື້ອທີ່ 331 ເຮັກຕາ ຜົນຜະລິດໄດ້ 3.492 ໂຕນ.
3). ພາກລັດປູກຜັກອິນຊີ ມີ 2 ກຸ່ມ ຈຳນວນ 2 ຄອບຄົວ ມີເນື້ອທີ່ 9 ເຮັກຕາ ຜົນຜະລິດໄດ້ 79 ໂຕນ.
4). ກຸ່ມຜູ້ປະກອບການປູກຜັກອິນຊີ ( OA ) ມີຈຳນວນ 4 ຄອບຄົວ ມີເນື້ອທີ່ 4 ເຮັກຕາ ຜົນຜະລິດໄດ້ 354 ໂຕນ.

ທ່ານ ກິແກ້ວ ສິງນາວົງ ຮອງລັດຖະມົນຕີກະຊວງກະສິກຳ ແລະ ປ່າໄມ້ ກ່າວບາງຕອນວ່າ: ປະເທດເຮົາກຳລັງປະເຊີນໜ້າຄວາມຫຍຸ້ງຍາກທາງດ້ານເສດຖະກິດ – ການເງິນ, ໄພເງິນເຟີ້, ການປ່ຽນແປງຂອງສະພາບດິນຟ້າອາກາດ ອັນເຮັດໃຫ້ການຜະລິດກະສິກໍາຂອງລາວເຮົາ ມີຕົ້ນທຶນການຜະລິດສູງຂຶ້ນ; ການຜະລິດຍັງເປັນການຜະລິດແບບກະແຈກກະຈາຍ, ຜະລິດບໍ່ໄປຕາມຄວາມຕ້ອງການຕະຫຼາດ ແລະ ການຈໍລະຈອນແຈກຢາຍສິນຄ້າດັ່ງກ່າວ ມີຫຼາຍຂັ້ນຫຼາຍຂອດ ສົ່ງຜົນໃຫ້ລາຄາສິນຄ້າກະສິກຳໃນທ້ອງຕະຫຼາດມີການເໜັງຕີງຫຼາຍ ແລະ ມີລາຄາແພງໃນບາງໄລຍະ ພ້ອມກັນນັ້ນຜູ້ຜະລິດ, ກຸ່ມ, ສະຫະກອນ ຍັງພົບ ຄວາມຫຍຸ້ງຍາກໃນການເຂົ້າເຖິງແຫຼ່ງທຶນ, ຕະຫຼາດທີ່ໝັ້ນຄົງ.


ສະນັ້ນ, ກະຊວງກະສິກຳ ແລະ ປ່າໄມ້ ກໍຄືລັດຖະບານ ຈຶ່ງໄດ້ໃຫ້ ຄວາມສຳຄັນຕໍ່ກັບການສົ່ງເສີມການຜະລິດ ຕິດພັນກັບຕະຫຼາດ ແລະ ໄດ້ເອົາວຽກດັ່ງກ່າວເຂົ້າໃນການຈັດຕັ້ງປະຕິບັດວາລະແຫ່ງຊາດ ໂດຍສະເພາະແມ່ນການຊຸກຍູ້ສົ່ງເສີມການຜະລິດພາຍໃນໃຫ້ເຂັ້ມແຂງ ເພື່ອທົດແທນການນໍາເຂົ້າ ໂດຍສຸມໃສ່ການຜະລິດສິນຄ້າກະສິກໍາທີ່ພວກເຮົາສາມາດຜະລິດໄດ້ໃຫ້ເຂັ້ມແຂງສາມາດແຂ່ງຂັນ ແລະ ຫຼຸດຜ່ອນການນຳເຂົ້າ ແນໃສ່ຢຸດການນຳເຂົ້າເທື່ອລະກ້າວ.

ຕໍ່ກັບສະພາບການດັ່ງກ່າວ ກະຊວງກະສິກຳ ແລະ ປ່າໄມ້ ກໍຄືພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ໄດ້ຮ່ວມກັບຕະຫຼາດລາວ ຈັດກອງປະຊຸມປຶກສາຫາລື ກ່ຽວກັບການຊຸກຍູ້ສົ່ງເສີມການຜະລິດພືດຜັກເປັນສິນຄ້າ ເພື່ອທົດແທນການນໍາເຂົ້າຂຶ້ນ ເຊິ່ງເປັນກອງປະຊຸມທີ່ສອດຄ່ອງກັບທິດຂອງພັກ – ລັດ ແລະ ສະພາບບັນຫາໃນປັດຈຸບັນ ທັງສາມາດຕອບສະໜອງຕໍ່ຄວາມຮຽກຮ້ອງຕ້ອງການໃນໄລຍະໃໝ່ໄດ້.

ກອງປະຊຸມໃນມື້ນີ້ ແມ່ນເພື່ອພ້ອມກັນປຶກສາຫາລື ແລະ ແລກປ່ຽນຄວາມຄິດເຫັນກ່ຽວກັບການຊຸກຍູ້ສົ່ງເສີມການຜະລິດພືດຜັກເປັນສິນຄ້າ ເພື່ອທົດແທນການນຳເຂົ້າ; ຊອກຫາຊ່ອງທາງຊຸກຍູ້ສົ່ງເສີມ, ວິທີການ, ມາດຕະການຮ່ວມກັນ ໂດຍສະເພາະພາກລັດ, ຜູ້ປະກອບການ, ກຸ່ມການຜະລິດ, ຜູ້ຜະລິດ.