ໃນວັນທີ 7 ທັນວາ 2023 ໄດ້ມີພິທີປະຊາຊົນ ມອບ – ສົ່ງງົວຄືນ ໃຫ້ແກ່ກຸ່ມບໍລິສັດ ຄໍາໄພຊະນະ ຈໍາກັດຜູ້ດຽວ ໂຄງການ KPG ພັດທະນາກະສິກໍາ ແລະ ປ່າໄມ້ ແຂວງໄຊສົມບູນ ທີ່ໄດ້ນໍາງົວແມ່ພັນ ຈໍານວນ 209 ໂຕ ຊຸກຍູ້ສົ່ງເສີມປະຊາຊົນ ຈໍານວນ 104 ຄອບຄົວ ຢູ່ເຂດຈຸດສຸມບ້ານອອມ ແລະ ບ້ານກໍໄຮ ທີ່ໄດ້ຄົບຮອບຕາມກໍານົດ 4 ປີ.
ພິທີຈັດຂຶ້ນທີ່ຫ້ອງການບ້ານອອມ, ເມືອງອະນຸວົງ, ແຂວງໄຊສົມບູນ ໂດຍການເຂົ້າຮ່ວມເປັນປະ ທານຂອງທ່ານ ຕົ່ງມົວ ຊົວໂກ້ ຮອງເຈົ້າແຂວງ, ມີທ່ານ ບຸນທອນ ປັນແກ້ວ ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງ, ທ່ານ ຄໍາໄພ ສົມຊະນະ ປະທານກຸ່ມບໍລິສັດຄໍາໄພຊະນະ ຈໍາກັດຜູ້ດຽວ, ມີພະແນກການທີ່ກ່ຽວຂ້ອງຂັ້ນແຂວງ ແລະ ເມືອງອະນຸວົງ, ອໍານາດການປົກຄອງ ພ້ອມດ້ວຍ ປະຊາຊົນ ທັງ 2 ບ້ານ ເຂົ້າຮ່ວມ.
ໃນພິທີໄດ້ຮັບຟັງການລາຍງານຜົນສໍາເລັດຂອງໂຄງການຊຸກຍູ້ສົ່ງເສີມການລ້ຽງງົວໃນຮູບແບບ 2+3 ຢູ່ບ້ານອອມ ແລະ ບ້ານກໍໄຮ ໃນໄລຍະ 4 ປີ ທີ່ຜ່ານມາ ນັບແຕ່ວັນທີ 11 ພະຈິກ 2019- 11 ພະຈິກ 2023 ຊຶ່ງບໍລິສັດໄດ້ສະໜອງດ້ານແນວພັນຫຍ້າໃຫ້ເມືອງອະນຸວົງ 2.500 ກິໂລ ໃນນີ້ ບ້ານອອມ ແລະ ບ້ານກໍໄຮ ໄດ້ຮັບ 1.980 ກິໂລ ໃນເນື້ອທີ່ 128 ເຮັກຕາ, ໃນປີ 2019 ປັດຈຸບັນເພີ່ມຂຶ້ນ 250 ເຮັກຕາ, ໄດ້ເອົາແນວພັນງົວມາຊຸກຍູ້ສົ່ງເສີມປະຊາຊົນບ້ານອອມ ແລະ ບ້ານກໍໄຮ ຈໍານວນ 209 ໂຕ ລວມເປັນມູນຄ່າທັງໝົດ 1.254.000.000 ກີບ, ມີກຸ່ມລ້ຽງງົວ 10 ກຸ່ມ ໃນນີ້ ບ້ານອອມ 72 ຄອບຄົວ ມີ 7 ກຸ່ມ, ບ້ານກໍໄຮ 32 ຄອບຄົວ ມີ 3 ກຸ່ມ.
ຜ່ານການຈັດຕັ້ງປະຕິບັດຂອງໂຄງການ ມາຮອດປັດຈຸບັນມີງົວທັງໝົດ 446 ໂຕ, ງົວຜູ້ 129 ໂຕ ໃນນີ້ງົວເກີດໃໝ່ຢູ່ 2 ບ້ານ ມີຈໍານວນ 292 ໂຕ, ງົວຜູ້ 139 ໂຕ, ງົວທີ່ເກີດໃໝ່ 272 ໂຕ, ແມ່ພັນທີ່ເອົາມາຊຸກຍູ້ປະຊາຊົນຕາຍຍ້ອນສະພາບດິນຟ້າອາກາດປ່ຽນແປງ ແລະ ພະຍາດຕ່າງໆ ທັງໝົດ 36 ໂຕ ຍັງເຫຼືອ 173 ໂຕ, ຜ່ານການລົງປະເມີນຖອນງົວຄືນຕົ້ນທຶນຂອງໂຄງການ ສາມາດຖອນຄືນໄດ້ຕົວຈິງທັງໝົດ 179 ໂຕ, ໃນນີ້ ງົວຜູ້ 70 ໂຕ, ງົວແມ່ 109 ໂຕ ທຽບໃສ່ຕົ້ນທຶນ 209 ໂຕ ແມ່ນສາມາດຖອນໄດ້ 86 %, ຍັງເຫຼືອເປັນແນວພັນໃຫ້ປະຊາຊົນ 242 ໂຕ.
ໃນໂອກາດນີ້ ຄະນະປະທານ ກໍ່ໄດ້ຜັດປ່ຽນກັນມີຄໍາຄິດ-ຄໍາເຫັນໂອ້ລົມຕໍ່ພິທີສະແດງ ຄວາມຍ້ອງຍໍຊົມເຊີຍ ປະຊາຊົນ ທັງ 2 ບ້ານ ທີ່ມີຄວາມດຸໝັ່ນຂະຫຍັນພຽນ ທີ່ໄດ້ພ້ອມກັນປະຕິບັດຕາມຄໍາແນະນໍາຂອງໂຄງການ ຈົນສາມາດບັນລຸຜົນສໍາເລັດ ແລະ ມອບ-ສົ່ງ ງົວຄືນ ໃຫ້ແກ່ກຸ່ມບໍລິສັດ ທັນຕາມກໍານົດທີ່ໂຄງການວາງໄວ້ ແລະ ຈໍານວນງົວທີ່ສົ່ງຄືນໃຫ້ບໍລິສັດນັ້ນ ທາງບໍລິສັດຈະໄດ້ນໍາໄປມອບໃຫ້ຄອບຄົວທຸກຍາກອື່ນໆທີ່ມີເງື່ອນໄຂ ພາຍໃນແຂວງໄຊສົມບູນຕໍ່.
[ ຮູບ – ຂ່າວໂດຍ :
ສຸກສັນ ອ້ວນລິທິກຸນ ]
