ຟີຟາ ຮ່ວມກັບ ສຕລ ຈັດພິທີເປີດບານເຕະໃນໂຮງຮຽນ FIFA FOOTBALL FOR SCHOOLS ທີ່ ສປປ ລາວ

39

ສະຫະພັນບານເຕະນາໆຊາດ ຮ່ວມກັບ ສະຫະພັນບານເຕະແຫ່ງຊາດລາວ (ສຕລ) ໄດ້ຈັດພິທີເປີດໂຄງການ ບານເຕະໃນໂຮງຮຽນ FIFA FOOTBALL FOR SCHOOLS ຂື້ນໃນວັນທີ 28 ພະຈິກ 2023 ທີ່ສະໜາມກີລາແຫ່ງຊາດ ຫຼັກ 16 ໂດຍມີຄູພະສຶກສາຈາກ 80 ໂຮງຮຽນ ແລະ ຫຼານນ້ອຍເຍົາວະຊົນເຂົ້າຮ່ວມເກືອບ 400 ຄົນ.

ພິທີດັ່ງກ່າວໃຫ້ເຂົ້າຮ່ວມຂອງ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກີລາ, ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ, ທ່ານ ນ. ຟັດມາ ຊາມູຣາ ( Fatma Samba Diouf Samoura ) ເລຂາທິການ ສະຫະພັນບານເຕະນາໆຊາດ, ຜູ້ຕາງຫນ້າກະຊວງສຶກສາທິການ ແລະ ກີລາ ພ້ອມດ້ວຍບັນດາຄູອາຈານທີ່ສິດສອນວິຊາພະລາສຶກສາຈຳນວນ 80 ທ່ານ ຈາກ 80 ໂຮງຮຽນທົ່ວນະຄອນຫຼວງວຽງຈັນ ແລະ ນັກຮຽນຫຼານນ້ອຍເຍົາວະຊົນເຂົ້າຮ່ວມເກືອບ 400 ຄົນ.

ໂອກາດດັ່ງກ່າວ ທ່ານ ວີເພັດ ສີຫາຈັກຣ ປະທານ ສະຫະພັນບານເຕະແຫ່ງຊາດລາວ ໄດ້ກ່າວເປີດພິທີວ່າ: ມື້ນີ້ໄດ້ພິທີເປີດພິທີໂຄງການ ກີລາບານເຕະໃນໂຮງຮຽນ FIFA FOOTBALL FOR SCHOOLS ຂຶ້ນທີ່ ສປປ ລາວ ຢ່າງເປັນທາງການ ໃນວັນທີ 30 ພະຈິກ 2023 ເພື່ອໃຫ້ຫຼານນ້ອຍເຍົາວະຊົນລາວໄດ້ເຂົ້າເຖິງການຫຼິ້ນກີລາບານເຕະພາຍໃນໂຮງຮຽນຫຼາຍຂຶ້ນ ແລະ ໄດ້ຮັບການຝຶກແອບຢ່າງຖືກວິທີ ສອນໂດຍຄູອາຈານພາລະສຶກສາພາຍໃນໂຮງຮຽນ 80 ທ່ານຈາກ 80 ໂຮງຮຽນພາຍໃນນະຄອນຫຼວງວຽງ ເພື່ອເປັນຕົວແບບ ແລະ ເປັນອີກໂຄງການໜຶ່ງສຳລັບປີຕໍ່ໆໄປ ເຊິ່ງຄູຝຶກເຫຼົ່ານີ້ຈະເປັນຜູ້ນໍາເອົາຄວາມຮູ້ທີ່ໄດ້ໄປຂະຫຍາຍສິດສອນຕໍ່ຄູພະລະຄົນອື່ນໆຕື່ມອີກ.

ໂອກາດດຽວກັນ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກີລາ ກ່າວວ່າ: ມີຄວາມພາກພູມໃຈທີ່ ສະຫະພັນບານເຕະແຫ່ງຊາດລາວ ( ສຕລ ) ໄດ້ຮັບການສະໜັບສະໜູນຈາກ ຟີຟາ ເພື່ອດໍາເນີນການຈັດຕັ້ງປະຕິບັດໂຄງການບານເຕະໃນໂຮງຮຽນ ເພື່ອກໍ່ສ້າງໃຫ້ບັນດາຄູອາຈານພະລະສຶກສາໃນໂຮງຮຽນຕ່າງໆ ໄດ້ມີຄວາມເຂົ້າໃຈດ້ານພາກທິດສະດີ ແລະ ການປະຕິບັດຕົວຈິງຢ່າງຖືກວິທີ ກ່ຽວກັບກີລາບານເຕະໃນໂຮງຮຽນ ເຊິ່ງຈະເປັນການສ້າງໂອກາດໃຫ້ແກ່ນ້ອງນັກຮຽນສາມາດເຂົ້າເຖິງກີລາບານເຕະໃນໂຮງຮຽນ ໃຫ້ນັບມື້ນັບຫຼາຍຂຶ້ນ ແລະ ທັງເປັນກາງສ້າງເງື່ອນໄຂໃຫ້ແກ່ການສ້າງນັກກີລາຮຸ່ນສືບທອດ ເພື່ອສະໜອງໃຫ້ກັບທີມຊາດລາວ ໃນອະນາຄົດ.

ຂະນະດຽວກັນ ທ່ານ ນ. ຟັດມາ ຊາມູຣາ ( Fatma Samba Diouf Samoura ) ເລຂາທິການ ສະຫະພັນບານເຕະນາໆຊາດ ໄດ້ກ່າວວ່າ: ຮູ້ສຶກເປັນກຽດທີ່ໄດ້ມາປະເທດລາວໄດ້ເຂົ້າມາເປີດໂຄງການບານເຕະໃນໂຮງຮຽນ FIFA FOOTBALL FOR SCHOOLS ເຊິ່ງໂຄງການດັ່ງກ່າວໄດ້ຈັດຂຶ້ນໃນຫຼາຍປະເທດ ໂດຍໂຄງການນີ້ບໍ່ພຽງແຕ່ຝຶກແອບບານເຕະໃຫ້ນັກຮຽນເທົ່ານັ້ນ, ແຕ່ຍັງຈະສອນໃຫ້ເຂົາເຈົ້າໄດ້ຮັບຮູ້ເຖິງທັກສະການໃຊ້ຊີວິດອີກດ້ວຍ. ຫວັງຢ່າງຍິ່ງວ່າ ຜູ້ເຂົ້າຮ່ວມຈະນຳເອົາຄວາມຮູ້ໃນການເຂົ້າຮ່ວມໃນຄັ້ງນີ້ ເພື່ອໄປພັດທະນາ ໂຮງຮຽນຂອງຕົນເອງ ໄປສິດສອນບານເຕະໃຫ້ ກັບບັນດາເຍົາວະຊົນແລະ ສະແດງຄວາມຊົມເຊີມມາຍັງ ສຕລ ທີ່ສາມາດສ້າງແຜນຍຸດທະສາດພັດທະນາກີລາບານເຕະຍິງ ແລະ ຈັດການແຂ່ງຂັນລາວລີກຍິງ ເປັນຄັັ້ງທໍາອິດ ສໍາລັບໂຄງການບານເຕະໃນໂຮງຮຽນ FIFA FOOTBALL FOR SCHOOLS ແມ່ນໄດ້ເລີ້ມຕົ້ນໂຄງການໃນປີ 2019 ໂດຍໃນປັດຈຸບັນ ມີຫຼາຍກວ່າ 100 ປະເທດສະມາຊິກ ທີ່ເຂົ້າຮ່ວມໂຄງການດັ່ງກ່າວ ຂ້າພະເຈົ້າຫວັງວ່າ ຈະໄດ້ນັກກິລາເຍົາວະຊົນ, ຄູອາຈານ ເປັນຕົວແທນຂອງປະທດ ( FIFA F4S AMBASSADORS ) ແລະ ຈະໄດ້ຮຽນຮູ້ທັກສະການຫລິ້ນກິລາບານເຕະ ເພື່ອກ້າວເປັນນັກກິລາອາຊີບໃນຕໍ່ຫນ້າ.
ຂ່າວ-ຮູບ: Larh Creators