ພະຍາດປາກເປື່ອຍລົງເລັບ ແມ່ນພະຍາດຕິດແປດ ສໍາລັບສັດເລັບຄູ່ທຸກຊະນິດ ມັນແຜ່ຂະຫຍາຍເປັນວົງກວ້າງໄວ ເຮັດໃຫ້ສັດປາກໂພງ, ມີຕຸ່ມເປື່ອຍ ແລະ ກົກເລັບເປື່ອຍເຊື້ອພະຍາດນີ້ ແມ່ນເຊື້ອກາລະໂລກ/ໄວຣັສ ປະກອບດ້ວຍ 7 ຊະນິດ ຄື: ຊະນິດ C, ຊະນິດ 0, ຊະນິດ A, ຊະນິດ A1, ຊະນິດ SAT1, SAT2, SAT3. ເຊື້ອໄວຣັສ ທົນຕໍ່ອາກາດໜາວໄດ້ດີ: ອຸນນະພູມ -15 ອົງສາ C ຢູ່ໄດ້ 13 ເດືອນ, ຢູ່ໃນເຟືອງ/ຫຍ້າແຫ້ງ 100 ວັນ, ຕີນລົດ/ເກີບ 102 ວັນ, ທົ່ງຫຍ້າຍາມໜາວ 30 ວັນ ແລະ ຍາມແລ້ງ 3 ວັນ, ຢອດນໍ້າຈາກໝັກຝຸ່ນ ຫຼື ກອງຂີ້ສັດ 90 ວັນ, ແສງແດດໃນໄລຍະເວລາ 2:30 – 3:00 ໂມງ ແມ່ນສາມາດຂ້າເຊື້ອໄດ້.
ພະຍາດປາກເປື່ອຍລົງເລັບ ເປັນຊະນິດທີ່ເຮັດໃຫ້ໝູ ເປັນພະຍາດທີ່ຮ້າຍແຮງທີ່ສຸດ ສາມາດຕິດກັບສັດຫຼາຍຊະນິດ. ສ່ວນແກະ ແລະ ແບ້ ທີ່ຕິດພະຍາດນີ້ຈະສະແດງອາການໄຂ້ 2 – 3 ວັນແລ້ວກໍຫາຍ ແລະ ບໍ່ສະແດງປາກົດການໃດໆຂອງພະຍາດອອກມາ. ການຕິດເຊື້ອຄື: ສັດທີ່ປ່ວຍຈະລະບາຍພະຍາດອອກທາງນ້ຳຢາງເຫຼືອງ, ຈາກຕຸ່ມຕີນ, ນ້ຳລາຍ, ອາຈົມ ແລະ ຍ່ຽວ, ລະບາຍອອກທາງນ້ຳນົມ. ທາງລະບົບຫາຍໃຈ ແລະ ມີໄລຍະພັກເຊື້ອ 2 – 7 ວັນ ເຊິ່ງພະຍາດເຂົ້າຮ່າງກາຍສັດ ທາງລະບົບຫາຍໃຈ, ທາງອາຫານ ແລະ ບາດແຜ ທີ່ສໍາຜັດກັບພະຍາດ, ເຊື້ອພະຍາດສາມາດຜ່ານສາຍແຮ່ເຂົ້າໄປຫາລູກ.
■ ອາການສະແດງອອກກັບສັດມີ:
– ໄຂ້ສູງ 40 – 41 ອົງສາ 1 – 2 ວັນ,
– ສັດຫຍໍ້າປາກ, ມີນໍ້າລາຍເປັນຝອດສີຂາວ.
– ໝູຈະຄັນດັງ ແລະ ມີຕຸ່ມໃສໆຢູ່ດັງ
– ໜ້າລີ້ນ ແລະ ເຟັນແຂ້ວເປັນຕຸ່ມໂພງ, ແຕກ ແລະ ລອກອອກ
– ສັດຖົກຕີນ, ກົກເລັບ, ບ່ອນຕໍ່ເລັບ ແລະ ໜັງ ຈະມີຕຸ່ມນ້ອຍໆໃສໆແຕກເປັນບາດ
– ຂວັ້ນນົມເປັນຕຸ່ມ
– ດັງໝູ, ຂວັ້ນນົມ ແລະ ກົກເລັບເປັນບາດ ເຮັດໃຫ້ພະຍາດອື່ນແຊກຊ້ອນ ສາມາດເຮັດໃຫ້ເລັບຫຼ່ອນ
– ສັດຕາຍຍ້ອນພະຍາດອື່ນແຊກຊ້ອນ, ກິນອາຫານບໍ່ໄດ້ຍ້ອນເຈັບປາກ ແລະ ໄປຫາກິນບໍ່ໄດ້ເພາະເຈັບປວດຕີນ ຍ້ອນເລັບຫຼ່ອນ
■ ການປິ່ນປົວ:
– ນໍາໃຊ້ສະເປ Bleu Methylene,0xytetracycline bleu ໃສ່ບາດແຜ ຫຼື ໃສ່ປາກສັດ
– ສັກຢາຕ້ານເຊື້ອ ຕ້ານການແຊກຊ້ອນຂອງແບັດທີເຣຍ
– ໃຊ້ຢາຂ້າໜອນໃສ່ບາດກັນແມງວັນ
– ສ່ວນປະສົມຂອງນໍ້າຢາລ້າງບາດແຜ ແລະ ປາກສັດ ຫີນສົ້ມ 100 ກຣາມ, ນໍ້າສະອາດ 10 ລິດ, ອາຊິດອາເຊຕິກ 750 ມິນລີລິດ, ຢາຕ້ານເຊື້ອ 1 ເມັດ ເມື່ອປະສົມແລ້ວໃຫ້ລ້າງບາດແຜ ແລະ ປາກສັດ ເຊົ້າ – ແລງ
– ແຍກສັດອອກຈາກໝູ່, ບໍ່ໃຫ້ສັດເຄື່ອນໄຫວຫຼາຍ, ໃຫ້ອາຫານອ່ອນ ແລະ ມີຄຸນນະພາບໃຫ້ສັດກິນ ສຳລັບຄວາຍ ອາຍຸ 2 ປີ ນໍ້າໜັກ 150 ກິໂລກຣາມ.
