ໃນຕອນເຊົ້າຂອງວັນທີ 5 ກັນຍາ 2023 ນີ້ ຄະນະຮັບຜິດຊອບສິນຄ້າໂອດ໋ອບຂັ້ນເມືອງໄດ້ລົງປະເມີນການເຮັດໜໍ່ສະຫວັນ ໃຫ້ກາຍເປັນສິນຄ່າໂອດ໋ອບ ຢູ່ທີ່ ບ້ານ ຫ້ວຍອຸນ ເມືອງໃໝ່ ແຂວງ ຜົ້ງສາລີ ໂດຍເປັນກຽດເຂົ້າຮ່ວມຂອງ ທ່ານ ສົມແປນ ວົງອິນປອນ ຫົວໜ້າຫ້ອງການ ອຸສາຫະກຳ-ການຄ້າ ເມືອງໃໝ່ ມີ ທ່ານ ພອນບຸນ ລໍວັນທອງ ນາຍບ້ານ ຫ້ວຍອຸນ ມີບັນດາຄະນະຮັບຜິດຊອບ, ກອງເລຂາ ສິນຄ້າໂອດ໋ອບຂັ້ນເມືອງ ຕະຫຼອດຮອດພໍ່ແມ່ປະຊາຊົນຂັ້ນເມືອງເຂົ້າຮ່ວມ.
ການລົງເຮັດວຽກຄັ້ງນີ້ກໍເພື່ອປະເມີນຄວາມເປັນໄປໄດ້ໃນການແປຮູບໜໍ່ໄມ້ໃຫ້ກາຍເປັນໜໍ່ຫວັນ ແລະ ຍົກລະດັບໃຫ້ກາຍເປັນສິນຄ້າໂອດ໋ອບຂອງເມືອງ ທີ່ຈະຊ່ວຍໃຫ້ປະຊາຊົນມີອາຊີບເສີມ ມີລາຍຮັບເຂົ້າໃນຄອບຄົວເພີ່ມຂື້ນ ຈາກນັ້ນຄະນະຮັບຜິດຊອບສິນຄ້າໂອດ໋ອບຂັ້ນເມືອງໄດ້ພ້ອມກັນເກັບກຳຂໍ້ມູນຢ່າງລະອຽດ ກ່ຽວກັບວິທີການແປຮູບ, ຕົ້ນທຶນການຜະລິດ ຂັ້ນຕອນໃນການຜະລິດນັ້ນແມ່ນນຳເອົາໜໍ່ໄມ້ມາ ຊອຍ, ຕົ້ມ, ປຸງ, ນຳໄປຕາດແດດໃຫ້ແຫ້ງ.
ໃນການປຸງແຕ່ງປະກອບດ້ວຍ 3 ສູດ: ສູດທີ 1 ແມ່ນການເອົາໜໍ່ມາປຸງໃສ່ກັບຊອດຫອຍ, ສູດທີ 2 ແມ່ນເອົາໜໍ່ປຸງໃສ່ ນ້ຳຕານ, ສູດທີ 3 ແມ່ນການເອົາໜໍ່ມາປຸງໃສ່ ຊອດຫອຍ ກັບ ນຳ້ຕານ ທັງສາມສູດນີ້ພາຍຫຼັງປຸງແຕ່ງສຳເລັດແລ້ວ ແມ່ນນຳໄປຕາກແດດໃຫ້ແຫ້ງ ຈາກນັ້ນກໍເກັບຮັກສາໄວ້ເພື່ອນຳໄປປຸງແຕ່ງເປັນອາຫານ ໂດຍສະເພາະແມ່ນການຈືນກິນເປັນອາຫານ.
ສຳລັບປະລິມານໃນການແປຮູບນີ້ແມ່ນ ໜໍ່ໄມ້ດິບ 15 ກິໂລ ຈະໄດ້ໜໍ່ສະຫວັນທີ່ສຳເລັດ ສົມບູນ 1 ກິໂລ ແລະ ພາຍໃນບ້ານໄດ້ຜະລິດໜໍ່ສະຫວັນເປັນກຸ່ມຄອບຄົວຕົວແບບທັງໝົດ 5 ຄອບຄົວ ພ້ອມນັ້ນ ທ່ານ ສົມແປນ ວົງອິນປອນ ໄດ້ມີຄຳເຫັນວ່າຈະພະຍາຍາມສືບຕໍ່ສົ່ງເສີມບັນດາບ້ານໃນທົ່ວເມືອງ ທຳການຜະລິດ ຜະລິດຕະພັນພື້ນບ້ານ ໃຫ້ກາຍເປັນສິນຄ້າໂອດ໋ອບ ພາຍໃນ 1 ປີ ໃຫ້ໄດ້ 2 ຜະລິດຕະພັນໃນທົ່ວເມືອງ ແລະ ຍັງໄດ້ຮຽກຮ້ອງໃຫ້ເອົາໃຈໃສ່ສືບຕໍ່ຜະລິດໜໍ່ສະຫວັນ ໂດຍສະແມ່ນເນັ້ນໃຫ້ມີຄວາມສະອາດ, ປອດໄພ ແລະ ມີປະລິມານຫຼາຍຂື້ນ ຈົນສາມາດສົ່ງລົງທອງຕະຫຼາດ ພາຍໃນ ບ້ານ, ເມືອງ, ແຂວງ, ປະເທດ ຫຼື ຕ່າງປະເທດໄດ້.
