ຜະລິດຕະພັນທີ່ເປັນເປົ້າໝໃນການສົ່ງເສີມ ແລະ ນໍາໃຊ້ ຢູ່ພາຍໃນປະເທດລາວ ໄດ້ເນັ້ນໜັກໃສ່ກຸ່ມວັດສະດຸກໍ່ສ້າງ 4 ປະເພດໄດ້ແກ່: ຊີມັງ, ເຫຼັກເສັ້ນ-ເຫຼັກຮູບປະພັນ, ທໍ່ນ້ຳ ແລະ ນ້ຳສີ.
ກອງປະຊຸມປຶກສາຫາລືກ່ຽວກັບການສົ່ງເສີມການຜະລິດ ແລະ ຊົມໃຊ້ຜະລິດຕະພັນພາຍໃນ ໄດ້ຈັດຂຶ້ນໃນວັນທີ 18 ສິງຫາ 2023ຜ່ານມາ ໂດຍການເປັນປະທານຂອງທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ.
ໂອກາດດັ່ງກ່າວ ທ່ານ ສໍາລີ ບຸດສະດີ ຮັກສາການຫົວໜ້າກົມອຸດສາຫະກຳ ແລະ ຫັດຖະກຳ ກ່າວ ວ່າ: ເພື່ອປະຕິບັດຕາມມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງຄະນະສະເພາະກິດຮັບຜິດຊອບແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 19/ກມສພ, ລົງວັນທີ 30 ມິຖຸນາ 2023 ແລະ ຂໍ້ຕົກລົງຂອງນາຍົກ ລັດຖະມົນຕີ ວ່າດ້ວຍການແບ່ງວຽກໃນຄະນະສະເພາະກິດຮັບຜິດຊອບແກ້ໄຂບັນຫາເຄັ່ງຮ້ອນຂອງເສດຖະກິດ-ການເງິນ, ບັນຫາເງິນເຟີ, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ສະບັບເລກທີ 91/ນຍ, ລົງວັນທີ 13 ກໍລະກົດ 2023. ກົມອຸດສາຫະກໍາ ແລະ ຫັດຖະກຳ ໄດ້ສັງລວມຂໍ້ມູນລາຍການຜະລິດຕະພັນທີ່ມີເປົ້າໝາຍໃນການສົ່ງເສີມ ແລະ ນໍາໃຊ້ ຢູ່ພາຍໃນປະເທດໃນເບື້ອງຕົ້ນ ໂດຍສະເພາະໄດ້ເນັ້ນໜັກໃສ່ກຸ່ມວັດສະດຸກໍ່ສ້າງ ໄດ້ແກ່ ຊີມັງ, ເຫຼັກເສັ້ນ-ເຫຼັກຮູບປະພັນ, ທໍ່ນ້ຳ ແລະ ນ້ຳສີ ທີ່ເຫັນວ່າ ມີຄວາມສາມາດຕອບສະໜອງການຊົມໃຊ້ຢູ່ພາຍໃນປະເທດໃນລະດັບໃດຫນຶ່ງ.
ທ່ານກ່າວຕື່ມວ່າ ກົມອຸດສາຫະກຳ ແລະ ຫັດຖະກຳ ມີໜ້າທີ່ໃນການການສົ່ງເສີມ ແລະ ຄຸ້ມຄອງ ໂຮງງານອຸດສາຫະກຳປຸງແຕ່ງ ໃນຂອບເຂດທົ່ວປະເທດ. ຊຶ່ງມີບັນດາເຄື່ອງມື ແລະ ກົນໄກຕ່າງໆ ໃນການຈັດຕັ້ງປະຕິບັດ. ໃນນັ້ນ ການສ້າງແຜນການເຄື່ອນໄຫວປະຈໍາປີຂອງໂຮງງານແມ່ນເຄື້ອງມືໜຶ່ງທີ່ໄດ້ກຳນົດໃນຂໍ້ຕົກລົງວ່າດ້ວຍໂຮງງານອູດສາຫະກຳປຸງແຕ່ງ. ແມ່ນການປະເມີນ, ວາງແຜນ ຫຼື ການຄາດຄະເນ ການດຳເນີນການຜະລິດຂອງໂຮງງານອຸດສາຫະກໍາປຸງແຕ່ງ ເພື່ອເປັນການຄຸ້ມຄອງ-ຕິດຕາມ ແລະ ທັງເປັນການຊູກຍຸ້ສົ່ງເສີມການຜະລິດ ໃຫ້ໂຮງງານອຸດສາຫະກຳປຸງແຕ່ງ ສາມາດກຳນົດແຜນການຜະລິດ, ແຜນການຈໍາໜ່າຍ, ແຜນຄວາມຕ້ອງການວັດຖຸດິບ, ເຄື່ອງຈັກ, ອຸປະກອນ, ຊິ້ນສ່ວນ-ອາໄຫຼ່, ທາດເຄມີ ແລະ ອື່ນໆ ເພື່ອຮັບໃຊ້ການຜະລິດຢູ່ໂຮງງານຂອງຕົນ ໄດ້ຢ່າງມີປະສິດທິຜົນ ແລະ ສາມາດກຳນົດຕົ້ນທຶນການຜະລິດຂອງຜະລິດຕະພັນໄດ້ຢ່າງເໜາະສົມ.
ພ້ອມນີ້ກໍກຳລັງສືບຕໍ່ ສູມໃສ່ ເກັບກຳຂໍ້ມູນລະອຽດ ແລະ ສັງລວມໂຮງງານ, ບັນຊີ ຜະລິດຕະພັນອຸດສາຫະກໍາປຸງແຕ່ງ ທີ່ສາມາດຜະລິດ ແລະ ສະໜອງໄດ້ຢູ່ພາຍໃນປະເທດ ເພື່ອມີຂໍ້ມູນລະອຽດລາຍງານລັດຖະບານ ກໍານົດນະໂຍບາຍ ແລະ ກົນໄກ ຊຸກຍູ້ສົ່ງເສີມຕາມຄວາມເໝາະສົມ.
