ເຂດນິຄົມອຸດສາຫະກຳ ແລະ ການຄ້າວຽງຈັນໂນນທອງ ( ນອຄວ ) ໄລຍະທໍາອິດມີນັກລົງທຶນມາຈັບຈອງເນື້ອທີ່ເຕັມແລ້ວ ເຊິ່ງມີທັງໝົດ 71 ບໍລິສັດ ມີທຶນຈົດທະບຽນ 81 ລ້ານກວ່າໂດລາ ມູນຄ່າການສົ່ງອອກສິນຄ້າບັນລຸຫຼາຍກວ່າ 462 ລ້ານໂດລາສະຫະລັດ. ປັດຈຸບັນກຳລັງສຸມໃສ່ການພັດທະນາໂຄງການໄລຍະທີ 2 ໃນເນື້ອທີ່ 142 ເຮັກຕາ.
ທ່ານ ສອນທະນູ ສິງດາລາ ປະທານສະພາບໍລິຫານ ນອຄວ ກ່າວວ່າ: ປັດຈຸບັນມີນັກລົງທຶນຕ່າງປະເທດ ໄດ້ເຂົ້າມາຈັບຈອງເນື້ອທີ່ເພື່ອລົງທຶນ ແລະ ຂຶ້ນທະບຽນດໍາເນີນທຸລະກິດໃນເຂດນິຄົມອຸດສາຫະກຳ ແລະ ການຄ້າວຽງຈັນໂນນທອງ ( ນອຄວ ) ໄລຍະທໍາອິດເຕັມ 100% ໃນຈໍານວນເນື້ອທີ່ 110 ເຮັກຕາແລ້ວ ຈໍານວນ 71 ບໍລິສັດ ມີທຶນຈົດທະບຽນທັງໝົດ 81 ລ້ານກວ່າໂດລາສະຫະລັດ. ໃນນີ້, ໄດ້ດຳເນີນການເຄື່ອນໄຫວຕົວຈິງ ມີ 29 ບໍລິສັດ, ກຳລັງກໍ່ສ້າງ 1 ບໍລິສັດ/ໂຮງງານ, ສ່ວນທີ່ເຫຼືອແມ່ນຢູ່ໃນໄລຍະກະກຽມການສ້າງຕັ້ງໂຮງງານບໍລິສັດ; ນັກລົງທຶນສ່ວນໃຫຍ່ແມ່ນມາຈາກ ຈີນ, ຍີ່ປຸ່ນ, ໄທ ສາມາດສ້າງວຽກເຮັດງານທຳໄດ້ 6.568 ຄົນ ( ໃນນັ້ນຕ່າງປະເທດ 98 ຄົນ ).
ມູນຄ່າການນຳເຂົ້າສິນຄ້າ ( ວັດຖຸດິບ, ເຄື່ອງຈັກ, ວັດຖຸອຸປະກອນຮັບໃຊ້ການຜະລິດ ແລະ ກໍ່ສ້າງ ) ມາຮອດປີ 2022 ມີທັງໝົດ 90 ລ້ານກວ່າໂດລາສະຫະລັດ ແລະ ມູນຄ່າການສົ່ງອອກສິນຄ້າ 462 ລ້ານກວ່າໂດລາສະຫະລັດ ( ສິນຄ້າສົ່ງອອກມີ ເຄື່ອງນຸ່ງຫົ່ມ, ຊິ້ນສ່ວນອຸປະກອນເອເລັກໂຕຣນິກ, ສາຍໄຟສຳລັບປັບອຸນຫະພູມແອເຢັນ, ເຄື່ອງຫຼິ້ນເດັກນ້ອຍ, ທູບຈອດ, ເຄື່ອງອຸປະກອນການຜະລິດເຕັກນິກ, ໝາກລໍ້ແກ່ເຄື່ອງ, ເຄື່ອງມືອຸປະກອນການແພດ ແລະ ແຜ່ນແພ, ສິນຄ້າຈຳໜ່າຍພາຍໃນປະເທດມີ ອາຫານສັດ, ນໍ້າດື່ມ ແລະ ເຄື່ອງປຸງອາຫານ, ຜະລິດຕະພັນພລາສຕິກ, ລົດຈັກ ແລະ ນ້ຳຢາປະສົມຄອນກຣີດ ).
ການລົງທຶນທີ່ເປັນລາຍໃຫຍ່ ມີຄື: ບໍລິສັດມັດສຄອດອິນເຕີເນເຊີນ໌ ( ລາວ ) ໂຊນ ຈຳກັດ ດຳເນີນກິດຈະການຕັດຫຍິບເຄື່ອງນຸ່ງຫົ່ມ ເພື່ອສົ່ງອອກຕ່າງປະເທດ ມູນຄ່າການລົງທຶນ 20 ລ້ານໂດລາສະຫະລັດ, ນັກລົງທຶນຈາກປະເທດການາດາ ແລະ ມີການຈ້າງງານ 2.967 ຄົນ, ບໍລິສັດ ເອັມເອັມຊີ ອີເລັກໂທຣນິກລາວ ຈຳກັດ ດຳເນີນກິດຈະການຜະລິດຊິ້ນສ່ວນເອເລັກໂທຣນິກ ເພື່ອສົ່ງອອກຕ່າງປະເທດ ມູນຄ່າການລົງທຶນ 20 ລ້ານໂດລາສະຫະລັດ, ນັກລົງທຶນຈາກປະເທດຍີ່ປຸ່ນ ແລະ ມີການຈ້າງງານ 741 ຄົນ.
ທ່ານກ່າວວ່າ: ການຂະຫຍາຍເຂດນິຄົມອຸດສາຫະກຳ ແລະ ການຄ້າ ວຽງຈັນ – ໂນນທອງ ໄລຍະ 2 ໃນເນື້ອທີ່ 142 ເຮັກຕາ ແມ່ນໄດ້ດຳເນີນການຊົດເຊີຍໃຫ້ແກ່ຜູ້ຖືກຜົນກະທົບຈາກໂຄງການພັດທະນານິຄົມສຳເລັດແລ້ວ ເກືອບ 50%.
ທ່ານກ່າວຕື່ມວ່າ: ບັນຫາທີ່ທ້າທາຍໃນການພັດທະນາພາຍໃນເຂດນິຄົມອຸດສາຫະກຳ ແລະ ການຄ້າ ວຽງຈັນ – ໂນນທອງ ຍັງມີຫຼາຍບັນຫາທີ່ເປັນສິ່ງທ້າທາຍ ຄື:
1). ໂຄງການພັດທະນານິຄົມໄລຍະ 2 ມີປະຊາຊົນຈຳນວນໜຶ່ງຍັງບໍ່ເຂົ້າໃຈນະໂຍບາຍ ແລະ ບໍ່ຍອມຍົກຍ້າຍອອກຈາກໂຄງການຂອງລັດຖະບານ ບໍ່ຍອມຮັບຄ່າຊົດເຊີຍໂຄງການ.
2). ການພັດທະນາພື້ນຖານໂຄງລ່າງ ເປັນຕົ້ນ ໄຟຟ້າ ແລະ ນໍ້າປະປາ ປັດຈຸບັນນິຄົມກຳລັງເລັ່ງບຸກເບີກ ແລະ ພັດທະນາໂຄງການໄລຍະ 2 ເພື່ອຮອງຮັບໃຫ້ແກ່ການລົງທຶນ ເຊິ່ງກໍມີນັກລົງທຶນລາຍໃຫຍ່ຫຼາຍລາຍມີຄວາມສົນໃຈຢາກມາລົງທຶນໃນພື້ນທີ່ໂຄງການໄລຍະ 2. ສະນັ້ນເພື່ອຮັບປະກັນການນໍາໃຊ້ພະລັງງານໄຟຟ້າໃຫ້ພຽງພໍກັບຄວາມຕ້ອງການຂອງຜູ້ລົງທຶນ, ນິຄົມໄດ້ສະເໜີຂໍຂະຫຍາຍຕິດຕັ້ງໝໍ້ແປງໄຟຟ້າເພີ່ມຕື່ມອີກ 80 MV ຈາກ 30 MW ເປັນ 110 MW ຈຶ່ງສະເໜີຂໍຄວາມຮ່ວມມືນຳໃຫ້ລັດວິສາຫະກິດໄຟຟ້າລາວ ຊ່ວຍພິຈາລະນາໃນການຕິດຕັ້ງໝໍ້ແປງໄຟຟ້າເພີ່ມດັ່ງກ່າວໂດຍໄວ, ການຂະຫຍາຍທໍ່ສົ່ງນ້ຳປະປາເຂົ້າມາຮັບໃຊ້ໃນນິຄົມ ກໍແມ່ນບັນຫາທີ່ຕ້ອງໄດ້ເລັ່ງ ເຊິ່ງຜ່ານມາກໍໄດ້ມີການປຶກສາຫາລືເບື້ອງຕົ້ນໃນຂັ້ນນະຄອນຫຼວງ, ສະເໜີໃຫ້ນະຄອນຫຼວງ ສືບຕໍ່ຊ່ວຍຊຸກຍູ້ການຂະຫຍາຍທໍ່ສົ່ງນໍ້າປະປາດັ່ງກ່າວ.
3). ບັນຫາການຂາດແຄນແຮງງານ ກໍເປັນບັນຫາໜຶ່ງທີ່ທ້າທາຍ ເນື່ອງຈາກສະພາບເງິນກີບອ່ອນຄ່າ ຫຼື ໄພເງິນເຟີ້ ເຮັດໃຫ້ຄ່າຄອງຊີບສູງຂຶ້ນ ເຊິ່ງເປັນປັດໄຈຫຼັກເຮັດໃຫ້ແຮງງານພາຍໃນຕັດສິນໃຈອອກໄປໃຊ້ແຮງງານຢູ່ປະເທດເພື່ອນບ້ານ ແລະ ຕ່າງປະເທດທີ່ໃຫ້ເງິນເດືອນສູງກວ່າ ເຊິ່ງເຫັນວ່າເປັນບັນຫາທີ່ຕ້ອງໄດ້ມີການແກ້ໄຂຢ່າງເປັນລະບົບ, ສະເໜີໃຫ້ກະຊວງແຮງງານ ແລະ ສະຫວັດດີການສັງຄົມ ຄົ້ນຄວ້າປັບປຸງຄ່າແຮງງານຂັ້ນຕ່ຳຢ່າງເໝາະສົມ ແລະ ໃຫ້ການໂຄສະນາ, ຂົນຂວາຍການປະກອບອາຊີບໃຫ້ແກ່ປະຊາຊົນຫຼາຍຂຶ້ນ ແລະ ສົ່ງເສີມການນໍາໃຊ້ແຮງງານພາຍໃນ ໂດຍຍົກລະດັບຄ່າແຮງງານຂຶ້ນຕື່ມ.
[ ຂ່າວ: ພຸດຕີ້; ຮູບ ຄໍາໃຍ ]
